VOV4.K’ho - Mho òr (20/10), Anih tờm gròi sền kòp tê jê să càr Dăk Lăk pà git: Tàm ƀòn dờng Buôn Ma Thuột pa geh gŏ tai 17 nă cau xét nghiệm mhar geh gŏ mờ virus Sars CoV-2, tàm sơnah ƀòn Tân Tiến mờ Tân Lập.

                                Ƀòn ơm kis tềng gùng Hồ Tùng Mậu, sơnah ƀòn Tân Tiến gơtìp wàng se

Tàm 17 nă cau gơtìp kòp tàm 2 sơnah ƀòn do, geh 4 nă cau kis tềng gùng Hồ Tùng Mậu, sơnah ƀòn Tân Tiến neh ai gŏ cồng nha xét nghiệm PCR geh gŏ mờ virus Sars CoV-2. Tơnơ̆ mờ tŭ gŏ, mpồl lơh broă geh gơnoar neh wàng se, bơyai lơh xét nghiệm ai rơlao 1 rơbô nă cau tàm mpồl ƀòn 3 sơnah ƀòn Tân Tiến mờ gŏ tai 1 nă cau geh gŏ mờ virus Sars CoV-2. Bơdìh hơ̆ tai, tàm drim ngai òr (20/10), bàr nă ùr bơklao gam kis tàm gùng dềt 129 Ama Khê, sơnah ƀòn Tân Lập gŏ tàm să gơlơh glar den tàng neh tus tàm hìu kham cau dùl nă să lơh is nàng kham gròi sền bơta pràn kơl dang să jan. tàm do, 2 nă cau do geh xét nghiệm mhar, cồng nha geh gŏ mờ virus Sars CoV-2. Gơrềng tus mờ bơta kòp Covid-19 tàm càr Dăk Lăk, tàm ngai òr (20/10), ƀòn dờng Buôn Ma Thuột neh gŏ tai 35 nă cau geh gŏ mờ kòp Covid-19 tàm ờ uă kơnhoàl, thị xã tàm càr.

Cau mblàng Ndong Brawl