VOV4.K’ho- Tơnơ̆ 9 ngai chồl mhar lam lơh, Hà Nội neh lơh gơs broă cit sơnơm vaccine rơcang sơndră kòp Covid-19 ai cau bơh 18 sơnam rlau hơđang in. Dilah bè lài hơ̆, Hà Nội pal roh uă nhai nàng lơh geh khà 2 tơlak 200 rbô nă cau geh cit sơnơm vaccine rơcang sơndră kòp Covid-19 den tàm dơ̆ lam lơh uă do, Hà Nội neh cit geh mờr 3 tơlak ding.

Mờ khà kờp làng bol 5 tơlak 750 rbô nă cau bơh 18 sơnam rlau hơđang, Hà Nội neh lơh geh rlau 96% khà làng bol cit êt ngan rlau jơh 1 ding sơnơm vaccine rơcang sơndră kòp Covid-19. Tàm jơh ală anih cit ndrờm geh rơndap ƀuơn ƀuài ai làng bol in lòt cit, gàr niam ală jơnau sồr rơcang sơndră kòp bè lơh kloh khuẩn tê, was khà duh să jan. Nàng kờñ gàr tŭ tơngai lam lơh, jơnau kờñ ai tơlik tàm broă lơh cit sơnơm vaccine, ƀòn dờng Hà Nội sồr ală tiah, anih cit bơyai lơh cit 3 dơ̆ tàm 1 ngai.

Cau mblàng K’Duẩn