VOV4.K’ho - Drim òr (03/08), càr Dăk Nông geh dờp tai 7 nă cau geh gŏ mờ virus Sars CoV-2. Tàm hơ̆ geh 6 nă cau là cau rê bơh tiah gơtìp kòp ală càr hờ đah jum dà lơgar, 1 nă cau là F1 bơh cau kòp là cau ùr H.L.T, deh nam 2004, kis tàm kơnhoàl Dăk Glong rê bơh ƀòn dờng Hồ Chí Minh.

                        Jơh ală cau gơtìp kòp tàm càr Dak Nông ndrờm neh geh tam cah is

Jơh ală cau do neh geh tam cah is tơnơ̆ mờ tŭ bơh tiah gơtìp kòp rê. Tơnơ̆ mờ tŭ geh cồng nha gŏ mờ virus Sars CoV-2, gah lơh sơnơm bal mờ mpồl lơh broă geh gơnoar neh jun jơh ală cau kòp do tus tiah tam cah is tơrgùm bal càr dê. Gah lơh sơnơm neh mhar jòi gĭt mờ geh 25 nă cau F1 tìp rềp mờ gam mhar lùp sền broă lòt rê, bơta kòp mờ ală tiah ală cau do neh geh tŭ lòt tus tàm 14 ngai lài. Tus tŭ do, càr Dăk Nông neh gŏ geh 96 nă cau gơtìp mờ kòp Covid-19 tàm jơh ală kơnhoàl, ƀòn dờng tàm càr. Tàm hơ̆ geh 3 nă cau neh geh sơm bời, rê bơh hìu sơnơm.

Cau mblàng Ndong Brawl