Tus tŭ do, càr Dăk Nông mìng rơ̆p pa ai priă ờ hềt tus 50% khà priă bơcri dà lơgar dê geh jào tàm nam 2024. Sồr lơh pràn broă lơh do, Củ tịc Anih duh broă Làng bol càr Dăk Nông neh sồr bơyai lơh tus sền tơn tàm ală rơndăp broă lơh geh khà ai priă ờ uă. Jăt broă rơndăp lơh, tàm poh tus, Anih duh broă Làng bol càr Dăk Nông rơ̆p bơyai lơh 2 mpồl lòt sền, geh Củ tịc mờ Phó củ tịc lam bồ tơl mpồl, tus tơn sền 11 rơndăp broă lơh tàm ală kơnhoàl Dăk Mil, Cư̆ Jút, Dăk Rlấp, Krông Nô mờ ƀòn dờng Gia Nghĩa.

Do là ală rơndăp broă lơh bơcri priă dà lơgar tàm gah lơh gùng lòt, bơtơ̆t rơbòng dà, geh kwơ màng gơwèt mờ broă bơtàu tơnguh lơh sa mpồl bơtiàn tàm ală kơnhoàl dê, mơya broă lơh gơtìp lơyài, khà ai priă ờ uă. Broă lòt sền, bal mờ broă sền wơl, nàng git ală bơta kal ke, gơkòl tŭ lơh jăt ală rơndăp broă nàng geh broă bơsong, Anih duh broă Làng bol càr Dăk Nông rơ̆p sền wơl kơnòl broă tàm broă đơng lam, sồr lơh, lam lơh, sền ală mpồl lơh broă, cau tờm bơcri priă, tàm hơ̆ uă ngan là kơnòl bơh cau lam bồ. Anih duh broă Làng bol càr Dăk Nông rơ̆p lơh glài nền nòn ală mpồl lơh broă, cau dùl nă să lơh kal ke, gơkòl, ờ geh kơnòl lơh lơyài broă lơh rơndăp broă. Gơwèt mờ ờ uă rơndăp broă ờ geh bơta pràn lơh, Anih duh broă Làng bol càr Dăk Nông lơh ngan tam gơl priă ai ală rơndăp broă lơh niam rơlao in.