Jat rơndăp ù tiah gùng lòt rê jun pơndiang càr lơgar Hà Nội tus nam 2030 mờ broă rơndăp lơh tus nam 2050, ală gùng rơndeh ồs tiah drà càr lơgar kờp jơh geh bơta jòng pơgăp 410 kơi sồ. Jơnau kờñ geh priă bơcri lơh bơh tŭ do tus nam 2030, Hà Nội kờñ geh pơgăp 15 tơmàn dolar Mỹ. Tàm ƀòn dờng Hồ Chí Minh, rơndăp broă lơh tam gơl wơl rơndăp ù tiah bal tus nam 2040, broă rơndăp lơh tus nam 2060, ală gùng rơndeh ồs geh 12 gơl gùng, mờ kờp jơh bơta jòng pơgăp 510 kơi sồ. Kờp jơh jơnau kờñ geh priă bơcri lơh tus nam 2035 là pơgăp rlau 36 tơmàn dolar Mỹ.

Đơs pơndŭt pơrjum, Thủ tướng ồng Phạm Minh Chính sồr tàm tŭ lơh ală Jơnau neh lơh nền pal geh bồ tơngoh kơlôi sơnơng jak chài ngan, broă rơndăp lơh broă lơh kwơ màng, jŏ jòng, cèng wơl cồng nha uă. Thủ tướng sồr Ƀộ Gùng lòt rê Jun pơndiang, ală Ƀộ, gah broă mờ Hà Nội, ƀòn dờng Hồ Chí Minh pơgồp bal lơh sir kơrnoat boh lam, broă jàu, broă lơh geh gơrềng lơh ală gùng rơndeh ồs tiah drà. Sồr lơh gùng rơndeh ồs tiah drà rơwah măi mok pa ngan, di pal mờ ală bơta tàm lơgar Việt Nam dê; lơh ngan ngồn ală priă jền geh bal priă jền Dà lơgar, priă jền cau dồ nă să mờ priă càn dê.