Tàm dơ̆ tìp măt kâp dờng, Tổng Ƀí thư đơs nền, Đảng, Dà lơgar mờ làng bol Việt Nam sùm cih kah bơta kờñ bal, dong kờl bal bơh Thượng viện, Quôk hội, Cíñ phủ, mpồl ling klàng mờ làng bol lơgar Campuchia dê gơ wèt mờ làng bol Việt Nam tàm broă lơh tam dră mờ bol sò tơm dong klàs jơi bơtiàn lài do mờ bơ̆t bơtàu dà lơgar tŭ do; mờ đơs sùm Đảng, Dà lơgar Việt Nam sùm sền dờng màng mờ lời bơta ai lài khà dùl ai broă bơ̆t bơtàu, bơtàu tơngguh bơta gĭt gơ̆p đah 2 lơgar in sùm bơtàu tơngguh niam bơnĕ.

Bơtau lơgar Campuchia ồng Norodom Sihamoni chờ hờp bal mờ ală cồng nha dờng ngan, geh gơtha kah yau mờ làng bol Việt Nam neh lơh geh tàm broă lơh tam gơl pa, bơ̆t bơtàu mờ bơtàu tơngguh dà lơgar, pin dờn ngan ngồn là, bơh bơta đơng lam bơh Đảng Kộng sản Việt Nam dê, lam bồ là Tổng Ƀí thư ồng Tô Lâm, làng bol Việt Nam rơ̆p pơn jăt tai lơh geh ală cồng nha pa, dờng rlau tai, lơh jăt geh cồng nha jơnau kờñ mờ Đảng neh sồr, pơgồp bơnah tàm bơta bơtàu tơngguh bal bơh kơnhoàl ù tiah do mờ tàm dunia dê. Bơtau lơgar Campuchia đơs nền kơ̆p kờñ mờ bơta jơh nùs uă ngan bơh ală Kwang đơng lam bồ mờ làng bol Campuchia dê pơn jăt tai prăp gàr mờ sền gàr bơta gĭt gơ̆p đah 2 lơgar.

Lài hơ̆, tơnơ̆ dơ̆ bơyai lơh wă rò ngan ngồn tàm Hìu duh broă Củ tịc dê, Củ tịc lơgar ồng Lương Cường neh tìp măt kâp dờng mờ Bơtau lơgar Campuchia.