VOV4.K’ho - Bơh 3 nam do,  pah dơ\ tus mut nam bơsram pa, kes pria\ sền gàr mờ bơtàu tơngguh brê càr Kon Tum geh bơyai lơh broa\ lơh yal tơnggit Lòt bal mờ oh tus hìu bơsram. Do la broa\  lơh geh pơrya ngan bal mờ bơta dong kờl ala\  kơnòm bơsram, ngan la oh kòn làng bol kòn cau kis tàm tiah kal ke càr dê geh tai sra\ cih tàm nam bơsram pa, broa\ lơh la tu\ nàng ala\ oh tơngguh git wa\ bè brê, bơh hơ\ pơ gồp bal sền gàr brê, sền gàr tiah kis slơ ngai slơ niam rlau.

            Mo tơn lài mờ ngai ngan ngồn mut nam bơsram pa, 355 na\ kơnòm bơsram bơh hìu bơsram kấp 2 Lý Tự Trọng, xã Đăk Kan, kơnhòal Ngọc Hồi, càr Kon Tum geh tus bal dùl bùi  sinh họat ngoại khóa  geh sơnđan ‘’ Lòt bal mờ oh tus hìu bơsram’’ bơh Kes pria\ sền gàr mờ Bơtàu tơngguh brê càr Kon Tum bơyai lơh. Chờ hờp tus bal mpồl  vẽ rùp bơh ơdu\ 9A geh yal tơnggit jơnau sền gàr tiah kis geh is ai tus rnàng  tơnơ\ do kơ\ kơljap, oh Dương Thị Thùy Dung ngoh rngac yal tơnggit broa\ sơnơng bơh mpồl bè rùp dềt mơya gơ cèng bơta  yal tơnggit dờng:

             Sau vẽ rùp do mờ  3 bơta gơbàn la lài do-tu\ do- tơnơ\ đo. Tàm lài do den tiah kis, brê mờ dà  bơh bol he la tơlir niam. Tơl phan kis mờ chi kis bal kis gơs dờng kràn. Mơya,  bơta mùl màl do tu\ do kòn bơnus bol he neh mờ gam lơh aniai brê la ua\ ngan. Pah ngai, ala\ ba\ brê làch mờ ala\ rơndeh pơndaing dơm chi, ala\ ntas mờ ma\y òk chi gam koh chi brê mờ dilah sùm bè hơ\ la rnàng tơnơ\ do bơh brê bol he geh gơs dòr chơt lơh aniai tus rài kis bơh bol he. Den tàng ngan bol he pal sền gàr brê bơh ngai do. Kơnòl bol he dê ờ di la bơh dùl na\ cau lơi mờ tơl rnàng làng bol, tơl rnàng drờm gơtùi lơh geh mờ bơh ala\ broa\ lơh dềt ngan.

             Tus bal broa\ lơh yal tơnggit Lòt bal mờ oh tus hìu bơsram  bơh kes pria\ sền gàr mờ bơtàu tơngguh brê càr Kon Tum bơyai lơh, bal mờ bơta dong kờl  git nđờ rhiang rbô pang sra\ cih geh lip ala\ jơnau yal tơnggit bè chính sách jào pria\ sền gàr brê, bơta kuơ màng bơh brê tus mờ rài kis, ala\ kơnòm bơsram gam geh tus bal  ua\ ngan broa\ lơh, bè: vẽ rùp bơta kơp kờ`, ai ala\ jơnau tơnggit bè sền gàr brê,  ai go\ git wa\ bè tiah kis phan  bơna geh is bơh broa\ lơh tam pơrlòng tơmoh phan chờ. Oh Bùi Thị Kiều Loan,  kơnòm bơsram ơdu\ 7B hìu bơsram kấp 2 Lý Tự Trọng, xã Đăk Kan, kơnhòal Ngọc Hồi chờ hờp đơs:

             Sau go\ bùi ngai do  la geh kuơ ngan ai sau in git tai bè bơta kuơ màng bơh brê. Mờ tu\ rê hờ hìu,  sau geh mblàng ai mè bèp in mờ oh mi ba` kơl mus  brê mờ sau ơm tàm hìu geh tam ua\ chi tơlir.

            Bal mờ  ala\ kơnòm bơsram,  nùs nhơm bơh  bùi yal tơnggit jơnau yal tơnggit Lòt bal mờ oh tus hìu bơsram neh gơ rềng tus ala\ cau pơgru,  Klau pơgru Nguyễn Tài Duệ, Hiệu trưởng hìu bơsram cấp 2 Lý Tự Trọng ai git jơnau đơs  he dê bè broa\ lơh:

             Broa\ lơh lòt bal mờ oh tus hìu bơsram bơh kes pria\ sền gàr mờ bơtàu tơngguh brê càr Kon Tum geh 2 bơta pơrya kuơ màng dờng ngan tus mờ ala\ oh kơnòm bơsram bơh hìu bơsram. Lài jơh bơh broa\ lơh do bơdĩh mờ cau pơrgu bơto den ala\ oh kơnòm bơsram  gam git wa\ rlau tai jơnau yal tơnggit  bơh tài bol he pal sền gàr mờ sơng ka  brê. Dơ\ 2 la broa\ lơh lòt bal mờ oh tus hìu bơsram geh dong ala\ oh kơnòm bơsram bơh hìu bơsram, ngan la ala\ oh geh rài kis kal ke nàng  geh tai  pria\ jền kờ` ala\ oh geh lòt bơsram.

            Dờp go\ cồng nha ngan ngồn bơh broa\ lơh yal tơnggit lòt bal mờ oh tus hìu bơsram, bồ nam bơsram  pa do Kes pria\ sền gàr mờ bơtàu tơngguh brê càr Kon Tum neh geh kơrnuat pờ ơnàng bơta mut lơh. Dilah nam 2017 broa\ lơh mìng geh lơh tàm 105 hìu bơsram den nam do hìu bơsram geh lơh gơguh tus 180 hìu tàm hìu bơsram kấp 2  bơh 75 xã, thị trấn gơ ơm tàm tiah jào pria\ sền gàr brê. Ồng Hồ Thanh Hoàng,  atbồ kes pria\ sền  gàr mờ bơtàu tơngguh brê càr Kon Tum ai git:

             Broa\ lơh  jơnau yal tơnggit lòt bal mờ oh tus hìu  bơsram  geh bơto bơtê rnàng kơnòm sa\  git wa\ bè  kơnòl sền gàr brê. Mơ kung bơh ala\ oh neh lơh gơ rềng tus mè bèp kơnòm bơsram, ala\ cau pơgru mờ jơh bal mpồl bơtìan tiah ala\ oh gam kis. Bơh hơ\,  neh trơ gùm geh jơh tàm mpồl bơtìan attê bal mờ Kes pria\ sền  gàr mờ bơtàu tơngguh brê mut lơh niam broa\ lơh sền gàr brê mờ chính sách jào pria\ sền gàr brê tàm càr Kon Tum.

            Cau mblàng K’ Brọp