Broă lơh “Nam pa Sền gàr tiah nhàr lơgar- ram nùs làng bol ƀòn lơgar” nam pa Ất Tỵ 2025 pa geh Gah đơng lam Mpồl ling sền gàr tiah nhàr lơgar càr Gia Lai bơyai lơh tàm xã Ia Pnôn, kơnhoàl Đức Cơ, mờ uă broă lơh geh kwơ, bè: “Drà sa tềp jero đong”, broă lơh mbar lơm pòng mờ tìp mat lơh kwèng niam chài đơs crih tam ya gờm chờ Dà lơgar tam gơl pa, gờm chờ Đảng, gờm chờ Nam pa Ất Tỵ 2025. Tàm do, Gah đơng lam Mpồl ling sền gàr tiah nhàr lơgar càr Gia Lai neh jàu pà 100 bơnah phan pà ai ală hìu bơnhă geh sră dong kờl Dà lơgar mờ hìu bơnhă geh rài kis kal ke. Mơkung, 20 nă kơnòm bơsram tàm broă lơh “Dong kờl oh lòt bơsram” mờ kòn ròng ală Pôs đồng ling sền gàr tiah nhàr lơgar neh geh dờp phan sa tềp. Geh pà phan, bi Siu Kỳ, ơm tàm ƀòn Bua, xã Ia Pnôn, kơnhoàl Đức Cơ pà gĭt:“Să tờm añ brơn brài ngan, tàm nam pa, Gah đơng lam Mpồl ling sền gàr tiah nhàr lơgar càr Gia Lai neh rê tàm xã bơyai lơh pà phan, kham pràn kơl dang să jan ai làng bol in, làng bol tàm xã  mờ 4 thôn ƀòn, ưn ngài uă ngan bơta sền gròi bơh Gah đơng lam Mpồl ling sền gàr tiah nhàr lơgar mờ ală mpồl lơh broă bal lơh jat”.

Ia Pnôn là xã tiah nhàr lơgar kơnhoàl Đức Cơ, càr Gia Lai mờ uă ngan làng bol là làng bol jơi bơtiàn dồ êt nă cau, rài kis gam gơtìp uă ngan kal ke. Tŭ do khà hìu bơnhă rƀah bơh xã dê gam 16,49%. Mờ gùng dà broă lơh ờ gŏ di lời cau lơi gơtìp lời wơl bơh ngkời mờ gàr niam tơl hìu bơnhă làng bol ndrờm geh sa tềp, broă lơh  neh lam lơh uă broă lơh geh ngan.

Tàm càr Dăk Lăk broă lơh “Nam pa Sền gàr tiah nhàr lơgar ram nùs làng bol ƀòn lơgar” kung pa geh Gah đơng lam Mpồl ling sền gàr tiah nhàr lơgar càr dê bơyai lơh tàm xã Ia Lốp, kơnhoàl Ea Súp. Bơnĕ bơnài bal mờ nùs nhơm hơn chờ bơh ngai chờ dê, ală gùng tam ya khua luống bơh làng bol kòn cau Thái bè jơnau kơ̆p kờñ ai mìu càl niam, phan tam geh tơnhào uă. Bi Hà Thị Tằm, làng bol ơm tàm thôn Nừng Nhạt, xã Ia Lốp pà gĭt, bơta nhơl bơh yau do ờ mìng là dùl broă lơh lơh rài bồ tơngoh lơm mờ gam cèng bềng gơtha niam chài, nùs nhơm tam klăc bal mờ là dơ̆ nàng làng bol in tơngŏ bơta chài ngan, nùs nhơm mpồl bơtiàn dê: “Añ bơsram bơh tàm tŭ gam dềt, jat ồng mò, añ pal bơto wơl ai rơnàng kơnòm să in, dilah ờ là gơ hŭi bơhiàn niam chài bơh jơi bơtiàn he dê. Khua luống geh gơtha kơ̆p kờñ ai mìu càl niam, lơh sa bơtàu tơnguh”.

Bơyai lơh bal ală broă lơh niam chài, ală cau ling Pôs đồng ling sền gàr tiah nhàr lơgar gam pơgồp bal mờ mpồl y ƀák sĩ bơh Hìu sơnơm Đại họk Y dược Buôn Ma Thuột kham kòp mờ pà sơnơm ờ sa priă ai làng bol in. Bi Cầm Thị Sáu ơm tàm thôn Đóng, ngoh rơngăc đơs: “Ưn ngài Mpồl ling sền gàr tiah nhàr lơgar neh bơyai lơh ngai chờ do nàng làng bol in geh lòt kham pràn kơl dang să jan, geh klơm mbar lơm pòng, geh tus bal tìp mat lơh kwèng đơs crih tam ya”.

Mò Lăng Thị Nguyên, Phó Củ tịc Anih Duh broă Làng bol xã Ia Lốp, kơnhoàl Ea Súp, pà gĭt, xã geh rlau 1 rơbô 800 hìu bơnhă, mờ 15 jơi bơtiàn oh mi ơm kis bal, khà hìu bơnhă rƀah rlau 54%. Broă lơh “Nam pa tiah nhàr lơgar ram mhŭ nùs nhơm làng bol ƀòn lơgar” neh cèng wơl ai làng bol tiah do in dùl nam pa ram mhŭ:“Broă lơh nam pa Sền gàr tiah nhàr lơgar ram nùs làng bol ƀòn lơgar gơwèt mờ 1 xã tiah nhàr lơgar geh broă lơh do là bơta chờ hờp, hơn chờ mờ bơta pơndờm pơnđiang dờng ngan gơwèt mờ làng bol xã Ia Lốp dê. Neh cèng wơl dùl nam pa hờm ram ai làng bol in tàm tơngai sa tềp nam pa Ất Tỵ”.

Tàm broă lơh, mờr 400 bơnah phan pà neh jàu tus ală hìu bơnhă geh sră dong kờl Dà lơgar mờ hìu bơnhă rƀah bal mờ dùl nơm hìu “Tam klăc dờng” kờp priă 100 tơlak đong. Is ồn, ală priă bơsram kung geh jàu ai kơnòm bơsram rƀah bơsram jak in, dong kờl ai ală kơnòm in cơnđoà mut tàm rài tơnơ̆ do. Đại tá Rơ Lan Ngân, Phó Cíñ ủy Mpồl ling sền gàr tiah nhàr lơgar càr Dăk Lăk pà gĭt: “Di dơ̆ sa tềp nam pa Ất Tỵ 2025, Mpồl ling sền gàr tiah nhàr lơgar càr neh bơyai lơh hòi jà ală cau geh nùs nhơm niam lơh uă broă lơh, tàm hơ̆ geh broă lơh bol añ neh lam lơh bè kòn ròng pôs đồng ling sền gàr tiah nhàr lơgar, dong kờl oh lòt bơsram,  yăng phe bơta kờñ gơboh, hìu ơm ram mhŭ tiah nhàr lơgar dong ai làng bol in geh ală bơta wă rò sa tềp niam rlau tai. Bol añ kung kơ̆p kờñ nùs nhơm bơh làng bol tàm tiah nhàr lơgar sơlơ bơrkoăt kơ̆ rlau tai mờ Mpồl ling sền gàr tiah nhàr lơgar mờ bal mờ Mpồl ling sền gàr tiah nhàr lơgar lơh jat niam ngan kơnòl broă sền gàr gơnoar tờm lơngăp lơngai tiah nhàr lơgar”.

Broă lơh “Nam pa Sền gàr tiah nhàr lơgar- ram nùs làng bol ƀòn lơgar” geh bơyai lơh tàm 2 kơnhoàl tiah nhàr lơgar bơh càr Gia Lai mờ Dăk Lăk dê ờ mìng là phan pà phan bơna lơm mờ gam là dang che bơrkoăt nùs nhơm ling klàng làng bol, bơrkoăt kơ̆ rlau tai bơta gĭt gơ̆p đah mpồl ling sền gàr tiah nhàr lơgar mờ làng bol ală jơi bơtiàn, lơh geh bơnàng jă kơ̆ kơl jăp ai dùl tiah nhàr lơgar ring lơngai, hờm ram.