VOV4.K’ho- Jơnau yal tàm dơ̆ pơrjum yal bè broă lơh rcang sơndră kòp tàm ù tiah ƀòn dờng Hồ Chí Minh mho ngai 16/9, pà gŏ, khà cau chơ̆t tài bơh kòp Covid-19 tàm ƀòn dờng Hồ Chí Minh gam gơmù sùm jat ngai, mơya khà cau bơtờp kòp pa kung gam uă sơl.

Ngan ngồn, tàm ngai 15/9, ƀòn dờng Hồ Chí Minh geh 160 nă cau chơ̆t, lơyah ngan rlau jơh tàm rlau 1 nhai do mờ ndrờm mờ tơngai bồ nhai 8 pa do; geh rlau  2 rơbô 500 nă cau geh rê bơh hìu sơnơm, tơnguh khà cau rê bơh hìu sơnơm bơh nhai 1 nam 2021 tus tŭ do là 161 rơbô nă, tŭ do gam sơm kòp ai rlau 41 rơbô nă cau kòp in. Mơya dùl broă pal đơs ngan là khà cau bơtờp kòp Covid-19 kung gam uă sơl. Mblàng lơh loh bè broă do, Phó Kuang atbồ Sở Y tế ƀòn dờng Hồ Chí Minh ồng Nguyễn Hoài Nam pà gĭt: ƀòn dờng ngui broă lơh xét nghiệm sơr băc mhar tàm uă tiah mờ lơh uă dơ̆ xét nghiệm tàm “tiah pơhìn kòp uă ngan”, “tiah pơhìn kòp uă”, geh tiah tus 7, 8 dơ̆ tơn. Khà cau bơtờp kòp pa neh gơmù uă ngan, mìng ơm tàm khà bơh 4 rơbô tus 6 rơbô nă cau.

Cau mblàng K’Hạnh