VOV4.K’ho- Càr Lâm Đồng pơn jat tai git gŏ 2 nă cau lơh sơnơm bơtờp kòp Covid-19. 2 nă cau lơh sơnơm geh git gŏ bơtờp kòp Covid-19 geh dùl nă cau lơh broă tàm khoa Nội A, hìu sơnơm dờng càr Lâm Đồng mờ dùl nă cau gam wơl là cau lơh sơnơm bơh kơnhoàl Di Linh dê. Tơnguh khà cau lơh sơnơm lơh broă tàm càr Lâm Đồng bơtờp kòp Covid-19 tus 5 nă cau, tàm hơ̆ uă ngan geh git gŏ tàm ƀòn dờng Dà Làc. Bơdìh hơ̆ tai, dùl nă kuang bàng griap ƀòn ndai kung gơtìp bơtờp kòp Covid-19 tŭ gam tus bal lơh broă rơcang sơndră kòp. Kờp tus tŭ do, Lâm Đồng geh 2 rbô 556 nă cau bơtờp kòp Covid-19, tàm hơ̆ geh 8 nă cau chơt mờ 676 nă cau geh sơm bời mờ rê bơh hìu sơnơm. Khà cau bơtờp kòp uă là ƀòn dờng Dà Làc mờ 606 nă, pơn jat hơ̆ là kơnhoàl Đức Trọng mờ 590 nă. 2 kơnhoàl geh khà cau bơtờp kòp Covid-19 êt ngan rlau jơh bơh càr Lâm Đồng dê là Cát Tiên 18 nă mờ Lạc Dương 16 nă.

Cau mblàng K’Duẩn