VOV4.K’ho- Drim ngai 23/7, càr Lâm Đồng sền gŏ tai 2 nă cau bơtờp kòp pa là cau măy rơndeh mờ cau drơng broă tàm rơndeh rê bơh tiah kòp bơh ƀòn dờng Hồ Chí Minh. 2 nă cau bơtờp kòp pa là cau kòp sồ 78434, 78435, lơh broă măy rơndeh, drơng broă tàm rơndeh gùng jòng, geh broă lòt rê bơh ƀòn dờng Hồ Chí Minh.

Lâm Đồng sền gŏ 2 nă cau bơtờp kòp mờ 1 nă cau pin bơtờp kòp Covid-19 ndrờm là cau măy rơndeh mờ cau drơng broă tàm rơndeh

Tơnơ̆ tŭ sền gĭt 2 nă cau măy rơndeh, cau drơng broă tàm rơndeh bơtờp kòp Covid-19, Sở Y tế càr Lâm Đồng neh ai jơnau yal jal mhar nàng jòi cau geh mat tàm ală tiah pơhìn bơtờp kòp geh gơrềng tus tàm ù tiah kơnhoàl Đức Trọng mờ ƀòn dờng Bảo Lộc. Mờ ală mpồl lơh broă geh gơnoar bơh càr dê kung jal mhar jòi gĭt tiah lòt rê ală cau F1,F2, cau ơm rềp mờ ală cau kòp. Tŭ do, neh sền gŏ geh 14 nă cau F1 mờ 50 nă cau F2, tàm hơ̆ uă ngan là ală cau tàm dùl tiah tam biăp tàm kơnhoàl Đức Trọng. Bè hơ̆, tus klo ngai, ngai 23/7, Lâm Đồng geh 28 nă cau bơtờp kòp Covid-19, tàm hơ̆ geh tus 10 nă cau là cau măy rơndeh mờ cau drơng broă tàm rơndeh.

Cau mblàng K’Hạnh