VOV4.K’ho- Mho ngai 29/8, mpồl cau lơh sơnơm bơh càr Gia Lai dê neh lòt gùng tus bal tam dră kòp Covid- 19 tàm ƀòn dờng Hồ Chí Minh. Mpồl lơh broă, geh 4 nă bác sĩ mờ 17 nă cau sền gàr cau kòp bơh càr Gia Lai dê lơh broă tàm ală hìu sơnơm: Hìu sơnơm dờng càr, Hìu sơnơm Kơnòm dềt, Hìu sơnơm Y học Cổ truyền mờ Pràn wơl să jan càr mờ Hìu sơnơm ală kơnhoàl, thị xã, ƀòn dờng.

Mpồl geh lòt tus hờ hìu sơnơm ing sơm kòp Covid-19 quận Tân Phú, ƀòn dờng Hồ Chí Minh lơh jăt kơnòl broă dong kờl sơm kòp kơn jơ̆ mờ sơm kòp ai cau kòp Covid-19 tàm ù tiah quận dê in. Tơl nă cau tàm mpồl lơh broă do geh càr Gia Lai dong kờl bơnah phan 10 tơlak đong mờ pà tơl ală phan ngui, phan sền gàr să jan, phan dong rơcăng sơndră kòp. Lài mờ tŭ lòt gùng lơh kơnòl broă, mpồl kung bàng lơh sơnơm bơh càr Gia Lai dê geh bơto pơlam bè broă lơh ờs mờng tàm broă kham kòp mờ broă pơlam sơm kòp, sền gàr cau kòp Covid-19, Ală broă lơh rơcăng sơndră lài, gròi sền lơh bơtờp kòp Covid-19. Ală broă ai mẫu, prăp gàr, jun mẫu kòp Sars CoV-2.

Cau mblàng Lơ Mu K’Yến