VOV4.K’ho - Tơmù ờ uă ngan broă di gơlan gơtờp kòp ai ală y bác sĩ mờ ală mpồl cau gam drơng broă tàm ală tiah tam cah is, ală hìu sơnơm ing tam dră mờ kòp Covid-19, ală robot VIBOT-dùl phan geh lơh bơh tơngu me khoa học công nghệ (KHCN) cấp Dà lơgar geh Bộ Khoa học mờ công nghệ jào Học viện Kỹ thuật ling klàng lơh jăt neh geh tàm ală tiah tờm bơh càr Bắc Giang mờ tŭ do là ƀòn dờng Hồ Chí Minh. Lơh broă sùm ngai kung bè mang, ală robot VIBOT gơtùi ala, dong kờl cau lơh sơnơm ală broă drơng, sền gàr cau kòp mờ cau geh pin gơtòp kòp, cèng phan sa, dà hùc, sơnơm...

Tàm hìu sơnơm ing sồ 7 (sơnah ƀòn An Khánh, ƀòn dờng Thủ Đức, ƀòn dờng Hồ Chí Minh), 2 nơm robot VIBOT-2 neh mờ gam dong kờl, ala cau lơh sơnơm jun phan sa, sơnơm, phan ngui mờ ală phan ngui ndai bơh bơdìh mŭt tàm tiah tam cah is mờ sơlơ̆u wơl. Lơh broă sùm ngai kung bè mang, tơl robot VIBOT-2 drơng bơh 4 tus 5 cờn tàm 10 cờn bơh hìu sơnơm dê, dong kờl tơmù ƀà broă geh uă mờ bơh 6 tus 7 nă cau lơh sơnơm, cau lơh broă nùs nhơm dong kờl pal dờp pah ngai. Bi Tô Tuấn Hải, cau lơh broă nùs nhơm dong kờl tàm hìu sơnơm ing sồ 7 pà git: “Bol añ tam pà bơh 6 tus 7 nă cau lơh gơs 14 cờn den tàng glar bòl ngan. Mơya kơnờm mờ 2 nơm robot do den tàng bol añ kung ờ hoan glar đao, gàr bơta pràn kơl dang să jan. Añ gŏ robot do niam ngan, ƀuơn lơh broă mờ ngăc ngar”.

VIBOT là phan bơh tơngu me KHCN cấp Dà lơgar “Kơlôi sơnơng, lơh gơs robot lơh sơnơm jun lòt tàm tiah tam cah is kòp gơtờp di gơlan gơtờp uă” geh Bộ KH & CN jào Học viện Kỹ thuật ling klàng in lơh bơh nhai 4 nam 2020. VIBOT geh gơnoar ala cau lơh sơnơm jun ală phan sa, sơnơm, phan ngui mờ ală phan ndai bơh tiah tơrgùm (hờ bơdìh tiah tam cah is) tus tàm ală jơdŭ piam kòp (tàm tiah tam cah is) nàng ai cau kòp in; jun phan ơn siồ siă tus mờ ală jơdŭ piam kòp nàng dờp siồ siă mờ jun lik bơdìh tiah tơrgùm siồ siă; ntrờn tus ală jơdŭ piam kòp nàng y bác sĩ, cau hìu nhă cau kòp (hờ bơdìh tiah tam cah is) boh bơr bơh ngài mờ cau kòp... GS.TS Nguyễn Văn Kính, Chủ tịch Mpồl kòp gơtờp Việt Nam đơs: “Pal tơmù ờ uă tơngai tìp mờ cau kòp... den he ngui robot nàng ala kòn bơnus, dùl đah pleh mờ broă gơtờp kòp bơh broă tìp rềp. rơlao tai, bơta pràn lơh broă bơh robot kung niam rơlao mờ uă cau geh ờ mŭt tìp mờ cau kòp”.

Lài mờ hơ̆, tơngu me kơlôi sơnơng geh lơh jăt 2 tơngai: Tơngai sơnrờp, broă lơh robot lơh sơnơm jun VIBOT-1 geh anih gròi sền, đơng lam mờ 01 robot ntrờn jăt gùng neh lam lài. Tơngai dơ̆ 2, lơh tờm công nghệ mờ lơh gơs broă lơh robot VIBOT-2 ntrờn is. Robot lơh broă niam, ngăc ngar tàm bơta ơnàng, ntrờn gan ală tiah ờ ơnàng mờ kal ke rơlao, kơnòl lơh broă kung uă bơta rơlao... Thiếu tướng Nguyễn Lạc Hồng, Phó kuang atbồ Học viện Kỹ thuật ling klàng đơs: “Bol añ geh bơta ƀuơn niam ngan là broă pơgồp bal bơh Học viện ling klàng mờ ală hìu măi bơh ling klàng dê, ală hìu măi cơ khí, hơ̆ sồng ală hìu măi ndai tai, den tàng tŭ phan do geh sền là niam mờ lơh broă gơtùi jơh bơta pràn den bol añ gơtùi pơgồp bal mờ ală hìu măi tàm ling klàng nàng lơh mờ khà uă di pal mờ jơnau kờñ bơh ală mpồl lơh broă kờñ”.

Lài mờ ƀòn dờng Hồ Chí Minh, VIBOT-2 neh geh lơh tơrlòng tàm hìu sơnơm Ling klàng Dà lơgar 108, tơnơ̆ mờ hơ̆, tus lồi nhai 4 nam 2021 robot geh ai lơh broă tàm tiah tam cah is, sơm kòp cau kòp Covid-19 tàm hìu sơnơm Bạch Mai-tiah 2 (tàm Phủ Lý-Hà Nam). Tus lồi nhai 5 nam 2021, VIBOT-2 pơn jăt tai geh lơh broă tàm tiah sơm kòp cau kòp F0 bơh hìu sơnơm càr Bắc Giang, dong kờl sơm kòp git nđờ rơhiang nă cau kòp Covid-19, pơgồp bal tàm broă tơmù kal ke tus mờ cau lơh sơnơm, rơcang sơndră mờ gơtòp kòp bơrlŭ bal tàm tiah tam cah is, sơm kòp.

Bơh broă tơrlòng, ngui tàm ală hìu sơnơm, hìu tam cah is, sơm kòp Covid-19 neh pà gŏ broă lơh robot lơh sơnơm jun VIBOT lơh broă niam mờ geh cồng nha, pơgồp bal tàm broă dong kờl rơcang sơndră mờ kòp gơtờp. Ngai 23 nhai 7 lài do, Mpồl duh broă KHCN pơlam, sền nàng git kơnòl KHCN cấp Dà lơgar neh pơrjum, sền cồng nha lơh jăt kơnòl geh khà jăk ngan mờ dan pơn jăt tai lơh gơs công nghệ, bơcri priă lơh tai ală robot VIBOT nàng drơng tàm broă rơcang sơndră mờ kòp gơtờp. GS.TS Đào Văn Hiệp, Chủ tịch Hội đồng khoa học tơngu me “Kơlôi sơnơng, lơh robot lơh sơnơm ntrờn tàm tiah tam cah is kòp gơtờp di gơlan gơtờp uă” đơs: “Tơngai sơnrờp ngan mìng geh lơh tàm 1 nhai pal geh robot di pal mờ broă lơh kơnòl tềng đăp măt tàm ală tiah tam cah is. Tơngai dơ̆ 2 den geh tìp mờ bơta ngăc ngar uă rơklao, hơ̆ là robot ngăc ngar. Broă ntrờn ờ jăt gùng geh ai lài tai, mờ pal ntrờn jăt rùp gùng- rùp gùng do di gơlan là gùng neh geh ai lài ha là geh robot lơh is. Ờ di mìng 1 nơm robot mờ là 1 mpồl robot, den tàng anih đơng lam pal đơng lam jơh mpồl robot. Rơlao mờ hơ̆ tai, ală robot pal geh lơh broă bal is, hơ̆ sồng geh lơh broă mờ cau lơh sơnơm mờ ờ gơrềng tàm anih tờm đơng lam tai”.

Cồng nha lơh jăt tơngu me “Kơlôi sơnơng, lơh robot lơh sơnơm ntrờn tàm tiah tam cah is kòp gơtờp di gơlan gơtờp uă” mờ cồng nha ngui phan kơlôi sơnơng (broă lơh robot VIBOT) tàm mùl màl rơcang sơndră mờ kòp Covid-19 neh mờ gam pà gŏ bồ tơngoh kơlôi sơnơng jŏ jòng, ai geh gùng dà broă lơh di pal bơh Bộ KH&CN bal mờ bơta pràn, broă lơh ngan bơh mpồl lơh robot, ală cau jăk chài bơh Học viện Kỹ thuật Ling klàng tàm broă lơh jăt di tŭ ală kơnòl KHCN geh nùs nhơm công nghệ cao tàm broă dong kờl ai broă rơcang sơndră mờ kòp gơtờp đơs is kung bè tàm gùng dà tơnguh bơtàu KHCN dà lơgar dê đơs bal.

Cau mblàng Ndong Brawl