Tàm càr Gia Lai, tàm tơngai do, trồ tiah gơlik geh kal ke ờ gơtùi gĭt lài, bơta duh mrềt tam gơl sùm tàm ngai lơh khà cau kòp là kơnòm dềt mŭt piam kòp tàm hìu sơnơm gơrềng tus ală bơta kòp gùng tă nhơm gơguh uă nisơna. Rềp ndo, Hìu sơnơm Kơnòm dềt càr Gia Lai geh bơh 300 tus 400 nă kơnòm dềt tus kham kòp pah ngai, gơrềng tus ală kòp gùng tă nhơm.

Bơh bồ nam tus tŭ do neh geh mờr 1 rbô nă kơnòm dềt pal mŭt piam kòp tàm hìu sơnơm tài bơh bơtờp ală kòp gùng tă nhơm, bè: as sồt klờm soh, as sồt phế quản, hian...gơguh uă pơndrờm bal dùl tŭ mờ nam 2022. Jăt Thạc sĩ, ƀak sĩ mò Từ Thị Mai Linh, Phó Kwang ătbồ Hìu sơnơm Kơnòm dềt càr Gia Lai dê yal, uă kơnòm dềt gơtìp kòp tài bơh bơta ờ rơcăng ngăc bơh mè bèp dê den tàng tŭ mŭt tàm hìu sơnơm gơ ơm tàm bơta kòp as sồt klờm soh kơn jơ̆, duh să uă, rơpơ̆t să jan...Hìu sơnơm bơto sồr ală hìu bơnhă pal sền ngăc rơcăng lài mờ ală kòp gùng tă nhơm mờ gùng lơh lề phan sa ai kơnòm dềt in tàm tơngai trồ tiah bè tŭ do. Mơkung kờñ pal gĭt gờñ ală tềl tơngŏ kòp nàng jun kơnòm dềt tus hờ hìu sơnơm di tŭ.