VOV4.K’ho- Tềng đăp mờ bơta kal ke bơh kòp Covid-19 tàm uă tiah gùt lơgar lơh gĭt nđờ rơbô nă kơnòm dềt tàm tiah gơtìp kòp pal lòt tam cah tơrgùm bal mờ ờ geh cau pròc mhàm, cau tàm hìu nhă lòt bal mờ khà do pơn jăt tai gơguh pah ngai. Bơdìh mờ ală bơta di gơlan gơtờp kòp mờ pal lơh is ală broă tàm rài kis pah ngai, ală kơnòm dềt gam di gơlan gơtìp uă bơta gơrềng ờ niam tàm nùs nhơm, geh tŭ gơtìp pơnjồh, sơgràm aniai, den tàng pal geh tai uă broă lơh ngan sền gàr mờ gàr niam ờ do ờ dă ai kơnòm dềt in tàm ală tiah tam cah is in.

Jăt ală cau jăk chài bè nùs nhơm yal, kơnòm dềt là cau F0, F1 lòt tam cah is tơrgùm bal ờ geh cau tàm hìu nhă lòt bal di gơlan gơtìp bè bơta sơgràm aniai, lơh gơtìp ờ niam nùs nhơm. Jăt cau jăk chài bè nùs nhơm Nguyễn Thị Thu Hiền đơs, geh uă jơnau kơlôi sơnơng ai gŏ là, broă tam cah is geh bơta ndrờm bal mờ tam lơh pù pờng mờ sơgràm aniai kơnòm dềt, tàm hơ̆ uă ngan tàm sơnam pa tào dờng. Do là sơnam gơrềng mhar ngan jơh bè broă tơnguh bơtàu mờ nùs nhơm den tàng broă rơcang lài jơnau gĭt wă ai sơnam do in là kuơ màng ngan. Bŭ lah ală mpồl lơh broă gơrềng bal tus mờ cau tam cah is ndrờm geh bơto pơlam bè broă rơcang sơndră mờ bơta aniai kơnòm dềt tàm tiah tam cah is, mơya kơnòm dềt ờ geh cau pròc mhàm bal lơh gơmù ală bơta sền gàr. Bơta do gơsồr, lài mờ tŭ ai cèng tam cah is, cau mè, cau bèp, cau pròc mhàm pal bơto jơnau gĭt wă ai ală kơnòm dềt in nàng pleh mờ ală bơta di gơlan gơtìp: “Mè bèp di gơlan geh bơto ai ală mpồl kơnòm dềt dờng rơlao, hơ̆ là kơnòm dềt pa tào, bơdìh mờ ală bơta tơngŏ ală bơyô neh geh bơsram bơh dềt, ală kơnòm dềt pal gĭt gròi sền broă lơh mờ gròi sền ală bơta bè nùs nhơm. Di gơlan tài kal ke ir, di gơlan tài kờñ geh cau kơl dìng kung là lơh gơguh bơta di gơlan gơtìp sơl. Den tàng, broă sền nàng gĭt ală broă lơh di gơlan gơtìp, gĭt lài ală broă lơh di gơlan gơtìp tàm tiah tam cah is, hơ̆ di gơlan là gơtìp sơmờm, gơtìp sơmờm, di gơlan gơtìp sơgràm aniai tàm broă bĭc bài, bơta bè do geh dong kờl ai ală kơnòm dềt in geh rơcang lài rơlao”.

Broă kơnòm dềt ơm tàm tiah tam cah is pal sơrlèt mờ ală kal ke tài tam gơl rài kis broă lơh pah ngai, bơta ờ niam tài cau tàm hìu nhă gơtìp tàm mpồl cau F0 ha là gơtìp chơ̆t, ndrờm là ală bơta lơh gơguh nùs nhơm ờ sŭk, ngòt gơrềng tus mờ kòp gơtờp. Den tàng, ală kơnòm dềt pal geh sền gàr di tŭ tài ală cau geh bơta ngăc ngar tàm broă lơh tàm bơta kờñ mùl màl, tàm bơta geh sền gàr ờ do ờ dă. Broă bơto pơlam ha là sơm bè nùs nhơm di gơlan geh sơm ndrờm bal tŭ ală kơnòm dềt tàm tiah tam cah is. Cau jăk chài bè nùs nhơm Nguyễn Thị Thu Hiền pà gĭt tai: “Broă sền kờñ gĭt là kuơ màng ngan. He gŏ broă gơguh broă lơh ờ di pal bè di gơlan kơnòm dềt ờ bài sào, ờ bài um, di gơlan ờ boh bơr mờ ală cau ha là kal ke rơlao, ală kơnòm dềt di gơlan lơh ală broă geh nùs nhơm hờ bơdìh bè lơh ờ di mờ adăt boh lam mờ lơh bơchồt uă rơlao. Bè đah nùs nhơm den ƀuơn ngan gơjrañ mờ ƀuơn ngan moăt. Nùs nhơm do bơh ală kơnòm dềt dê ndrờm bè phan pơrlăc, pơrlăc ti pơrlăc tai jăt mờ bơta mhar mờ dơ̆ lơh uă ngan, hen gơtùi gròi sền mờ ală kơnòm dềt pal geh sền gàr di tŭ mờ ală cau geh broă lơh jăk chài".

Tus tŭ do, Bộ Lao động-Thương binh mờ Xã hội kung neh tơlĭk uă sră nggal tơnguh broă gàr niam ờ do ờ dă ai kơnòm dềt tàm tiah tam cah is kung bè tàm broă tam cah ngài mpồl bơtiàn... Gơwèt mờ ală kơnòm dềt gơtìp sơgràm aniai ha là gơtìp ală bơta bè ờ niam bồ tơngoh kung neh geh ală kơrnoăt geh ai mùl màl bè ală cau pal geh dong kờl; kơrnoăt ai geh kơnòl bơh hìu tơrgùm bal. Mò Vũ Thị Kim Hoa, Phó kuang atbồ đah kơnòm dềt gơwèt Bộ Lao động-Thương binh mờ Xã hội đơs là, ală tiah tam cah is geh kơnòm dềt pal sùm lùp mờ anih tờm sền gàr kơnòm dềt jăt sồ 111 nàng geh bơto sồr, bơto pơlam bè: Ờ do ờ dă ai kơnòm dềt in; drơng sền gàr, ring niam nùs nhơm, rơcang sơndră, gŏ gờñ mờ bơsong ală bơta ờ niam nùs nhơm bơh kơnòm dềt tàm broă tam cah is, tam cah ngài mpồl bơtiàn; dong kờl, sơmờm, bơsong mhar nàng sền gàr, rơcang sơndră mờ bơta sơgràm aniai kơnòm dềt. Mò Vũ Thị Kim Hoa sồr: “Hìu tam cah is tơrgùm bal pal pơgồp bal mờ ală anih lơh broă gơrềng bal bè UBND xã, kuang bàng sền gàr kơnòm dềt, anih lơh broă kuang àng, anih lơh broă lơh sơnơm dong kờl kơnòm dềt in. Tàm broă dong kờl ai kơnòm dềt in, he pal kah tus mờ broă lơh bè lơi nàng gŏ ală jơnau kờñ bơh kơnòm dềt dê nàng dong kờl. Bè gơrềng tus mờ broă dong kờl lơh nàng ring niam nùs nhơm ai kơnòm dềt in, gơrềng tus mờ bơta aniai bè să jan den pal geh broă tus bal bơh anih lơh broă lơh sơnơm kham, sơm sồt nàng gàr niam să jan kơnòm dềt in. Gơwèt mờ ală cau, ală jơnau tơngĭt yal yă, jơnau yal gơrềng tus mờ cau tìs bè broă sơgràm aniai kơnòm dềt den geh pơn jăt tai bơsong jăt adăt yal yă lùp khào hình sự”.

Nàng sền gàr kơnòm dềt đơs bal mờ kơnòm dềt tàm ală tiah tam cah is tơrgùm bal ờ geh cau pròc mhàm lòt bal, Đah kơnòm dềt kung sồr ală tiah pal yal sùm, yal bè bơta kơnòm dềt gơtìp kòp Covid-19. Di lah jal mhar gơrềng tus mờ kơnòm dềt pal geh yal nàng ală cấp, anih lơh broă geh gơnoar tàm ală tiah bal mờ Đah kơnòm dềt nàng geh broă bơsong, bơto sồr, dong kờl di tŭ.

Cau mblàng Ndong Brawl