VOV4.K’ho –Poh lài, tàm [òn dờng Dà Làc, càr Lâm Đồng, ồng Nguyễn Xuân Phúc, Thủ tướng Chính phủ neh đơng lam Pơrjum gùt lơgar Sồr mpồl lơh sa kă bro bơcri priă mờ gah broă lơh sa sươn sre.

Đơs uă, lơh broă sa sươn sre lơgar Việt Nam dê gam uă bơta pràn bơtàu tơnguh, Thủ tướng đơs loh, Chính phủ mờ ală mpồl lơh sa kă bro pal bal mờ gơ\p tơrgùm bal pràn nàng ai Việt Nam brồ guh ơm khà dùl dunia bè phan lơh gơs bơh sươn sre.

Jat kờp du\, jơh gùt lơgar geh 49 rbô 600 mpồl lơh sa kă bro bơcri priă tàm gah lơh broă sa sươn sre, geh tus pơgăp 8% kờp jơh mpồl lơh sa kă bro gùt lơgar. Ală mpồl lơh sa kă bro bơcri priă tàm gah lơh broă sa sươn sre neh lơh geh rlau 4 tơlak 500 rbô broă lơh, geh tus 32,5% cau lơh broă bơh jơh ală mpồl lơh sa kă bro dê.

Ală kuang bàng đơs tàm dơ\ pơrjum jơh ală ndrờm đơs uă, nàng sồr mpồl lơh sa kă bro bơcri priă tàm gah lơh broă sa sươn sre den pal sền mpồl lơh sa kă bro lơh gơnoar broă cau tàm gùl, anih kơldìng, cau lơh broă sa là mpồl cau tờm mờ lơh pràn ngui công nghệ cao tàm gah broă lơh do.

Bal mờ hơ\ là geh gùng dà broă lơh nàng sồr ală priă jền bơcri tàm gah lơh broă sa sươn sre; lơh geh ală bơta [ươn nàng ală mpồl lơh sa kă bro [ươn càn priă jền; crơng gơs ală anih lơh bal bơh lơh gơlik phan tus kă bro phan; sồr bơtàu tơnguh ală hợp tác xã nàng lơh geh ală anih lơh bal lơh gơlik phan mờ kă bro phan; lơh gơs ală phan bơna drơng bơtàu tơnguh lơh broă sa sươn sre; tàm yal tơngi\t bal jơnau drà kă bro; rơndăp ù tiah nàng kờ` geh tơl bă ù ai lơh gơlik phan kă bro in.

Nàng lơh gơs mat phan kă bro, ală mpồl lơh sa kă bro kung đơs là, ngan ală mpồl lơh sa kă bro kung pal tam gơl bồ tơngoh kơlôi sơnơng bơdìh mờ broă gàr geh bơta niam uă bơh phan bơna dê. Mò Nguyễn Thị Thành Thực, Chủ tịch mơkung là Giám đốc Công ty Bagico, sồr.

Việt nam neh pờ mpồng wa\ rò uă ngan cau bơcri priă, lơh ală tiah bơcri priă ai cau bơcri priă lơgar ndai in, bơcri priă tàm ală bơta pràn bơh khi dê bè điện tử, công nghệ, bè hơ\ lơh broă sa sươn sre bơh bol he dê là dùl bơta pràn, `chi gơlơh bol he ờ go\ lơh jơnau sơlơ\u wơl.

Bol he geh dùl tiah ala mat ai lơgar Việt Nam in nàng bol a` tu\ tus tàm hơ\ kă bro sền hơ\ là hìu he dê, bol a` geh sền gàr, bol a` geh lơngăp lơngai ờdo ờdă. A` dan yal, dilah bol a` kờ` bơcri priă tàm drà kă bro bơh Alibaba dê, den pal dan tong lài priă gi\t nđờ tơmàn mờ anih prăp phan geh niam, den ờ go\ di là mpồl lơh sa kă bro dềt lơi kung lơh geh jơnau hơ\ ờ.

Ồng Nguyễn Thiện Nhân, Bí thư Thành ủy [òn dờng Hồ Chí Minh den đơs là, tàm tu\ tơngai tu\ do, pal tam gơl ală rơndăp tăp sèng lơh sa sươn sre, broă lơh sa lơgar Việt Nam dê pal tam gơl bơh hìu bơnhă lơh sa is tus Hợp tác xã, tơrgùm bal Hợp tác xã mờ mpồl lơh sa kă bro, tơrgùm bal đah Hợp tác xã mờ mpồl lơh sa kă bro.

Bol a` dan là Chính phủ mờ gơnoar atbồ [òn lơgar kờp sền bơta dong kờl mpồl lơh sa kă bro bơh bơta yal loh pah nam, tàm tơl càr, Dà lơgar dong ai nđờ Hợp tác xã in, nđờ mpồl lơh sa kă bro nàng lam lơh broă lơh sa sươn sre jat gùng dà công nghệ cao geh cồng nha.

Đơs gùng dà broă lơh pal loh làng, tơl càr he dong geh Hợp tác xã mbè sơnđan mat, mpồl lơh sa kă bro lơi. Mờ pal yal pe jơnau, priă lơh geh cau lơh broă sa dê là nđờ; khà cau lơh broă sa, Hợp tác xã là nđờ; ù lơh broă sa sươn sre geh làng bol mờ Hợp tác xã mờ mpồl lơh sa kă bro tam phan là nđờ.

Pơndu\t pơrjum, đơs uă broă lơh broă sa sươn sre Việt Nam ờ hềt bơtàu tơnguh ndrờm pal mờ bơta pràn, Thủ tướng pà gi\t, nhai 4 pa do, Chính phủ neh geh Nghị định sồ 57 cih bè cơ chế, gùng dà broă lơh sồr mpồl lơh sa kă bro bơcri priă tàm lơh broă sa sươn sre, [òn lơgar ala Nghị định sồ 210 bơh nam 2013 lài do.

Đơs ngan ală cồng nha lơh geh uă ngan bơh gah lơh broă sa sươn sre lơgar Việt Nam dê tàm tơngai lài, Thủ tướng kung đơs ngan, gơnoar broă kuơmàng bơh ală gah mpồl lơh sa kă bro, Hợp tác xã, lơh sa hìu bơnhă gơ wèt mờ bơtàu tơnguh lơh broă sa sươn sre.

Bulah bè hơ\, Thủ tướng kung yal bàr pe broă tàm gah broă lơh sa sươn sre tu\ do, hơ\ là công nghiệp lơh gơs phan niam ờ hềt geh mờ uă ngan là kung gam là lơh gơs phan ờ hềt niam; broă ngui kơldung nilông tàm nđờ phan bơna uă ir.

Bơh ală broă bơh lơh broă sa sươn sre dê, Thủ tướng yal bơta sền sơnơng, jơnau kờ` bơtàu tơnguh lơh broă sa sươn sre lơgar Việt Nam tàm tu\ tơngai dơ\ tam gơl bơta yau gơs bơta pa công nghiệp 4.0 gam sơnđan là dơ\ kăc mạng công nghiệip dơ\ 4.

Lơh broă sa sươn sre lơgar Việt Nam gam uă ngan bơta pràn mờ tu\ tơngai niam gơtùi lơh, ngan là tàm tu\ tơngai dơ\ tam gơl bơh bơta yau gơs bơta pa công nghiệp dơ\ 4. Chính phủ mờ ală mpồl lơh sa kă bro pal bal mờ gơ\p tơrgùm bal pràn nàng ai Việt Nam brồ guh ơm khà dùl dunia bè phan lơh gơs bơh sươn sre.

Tàm pơrjum do, a` kơ\p kờ` gah lơh broă sa sươn sre, tàm 10 nam tus, lơh broă sa sươn sre lơgar Việt Nam ơm tàm mpồl 15 bơh ală lơgar bơtàu tơnguh ngan rlau jơh dunia, tàm hơ\ gah lơh gơlik phan lơh geh bơh sươn sre ơm tàm mpồl 10 dunia.

Lơh broă sa sươn sre lơgar Việt Nam là dùl tiah tờm lơh gơlik phan niam bơh lơh broă sa sươn sre dunia dê, là dùl tiah tờm logistic bơh kă bro phan lơh gơs bơh sươn sre gùt plai ù dê. Bol he geh gơnoar kơ\p kờ` ală broă bè hơ\ mờ gơtùi lơm lơh geh jơnau hơ\.

Nàng lơh geh bơta sền sơnơng mờ jơnau kờ` do, Thủ tướng đơs uă, bơta tờm kung gam là bơta bơtàu tơnguh bơh ală mpồl lơh sa kă bro bơcri priă tàm gah lơh broă sa sươn sre dê sơl. Chính phủ neh geh Nghị định sồ 57 mờ sồr ală kấp ală gah lơh jat niam Nghị định do.

Nàng lơh geh ală bơta ai mpồl lơh sa kă bro in bơcri priă tàm lơh broă sa sươn sre, bal mờ sơlơ lơh niam wơl tiah bơcri priă lơh sa kă bro, Thủ tướng sồr kờp sền koh tơrmù 50% sră nggal hành chính tàm gah broă lơh sa sươn sre, [òn lơgar.

Ală bộ, gah sơnah lơh broă dà lơgar dê kung pal kơlôi sơnơng, dan geh gùng dà broă lơh lơh gơs ală cơ chế lơh broă bơh drà kă bro gơnoar ngui ù dê. Mhar kơlôi sơnơng cơ chế lơh tơrlòng lài bè tơrgùm bal sre, ù; kơlôi sơnơng yal mờ Chính phủ mờ Quốc hội in tam gơl Adat ù tiah jat gùng dà lơh geh bơta [ươn ai mpồl lơh sa kă bro in tàm broă geh ngui ù, tàm hơ\ broă ngui geh cồng nha ù lơh broă sa sươn sre brê bơnơm dà lơgar dê lơh sa kă bro.

Tàm dơ\ pơrjum, Thủ tướng hòi jà ală mpồl lơh sa kă bro, ală cau lơh sa kă bro lơgar Việt Nam dê pơn jat tai lơh jat pràn kơldang nùs nhơm sơnđờm mu\t lơh broă, nùs nhơm lơh sa kă bro, bơ\t bơtàu bơta niam chài mpồl lơh sa kă bro, bơtàu tơnguh mpồl lơh sa kă bro kơ\ kơl jăp, rềp mềl mờ tiah ơm kis; lơh jat niam nùs nhơm pơ`ìơ să jơi bơtiàn, nùs nhơm tam klac, nàng bơ\t bơtàu bơtàu tơnguh ală gah mpồl lơh sa kă bro lơgar Việt Nam.

Jơh ală lơh ngan bal, pơđơl pràn bal, tơrgùm bal pràn, dùl nùs dùl tồr bal, bal mờ Chính phủ mờ làng bol ai phan bơna lơh broă sa sươn sre Việt Nam dê tăc mờ dunia.

Cau mblàng Lơ Mu K’Yến