VOV4.K’ho- Tŭ do, jơh ală càr, ƀòn dờng tàm tiah ring dà dờng Cửu Long neh geh broă rơndap lơh cit sơnơm vaccine ai ală oh kơnòm bơsram phổ thông in. Tàm tŭ lam lơh, ală càr sền gròi uă ngan tus broă kham rơ wah nền nòn, gàr ờdo ờdă jơh ală bơta ai cau cit in. Sơn đờm bơh ngai do, 03/11, Kiên Giang lam lơh cit sơnơm vaccine ai rlau 13 rbô 300 nă kơnòm bơsram ơdŭ 12 hệ phổ thông mờ giáo dục thường xuyên in tàm gùt càr.

Ală kơnòm bơsram ơdŭ 12 geh cit tàm 1 ngai mờ cit wơl ai ală cau gam ờ hềt cit in tàm ngai tơnơ̆ tàm hìu bơsram, tiah mờ kơnòm bơsram gam bơsram halà hìu sơnơm kơnhoàl, hìu sơnơm xã, sơnah ƀòn. Tàm càr Hậu Giang, jat broă rơndap lơh bơh Ủy ban Nhân dân càr dê bơh ngai 04 tus ngai 06/11 do, càr geh lam lơh cit sơnơm vaccine rơcang sơndră kòp Covid-19 ai kơnòm dềt bơh 12 tus hơ đơm 18 sơnam in mờ sơnơm vaccine Pfizer jat jơnau sồr bơh Bộ Y tế dê.

Cau mblàng K’Duẩn