VOV4.K’ho- Tus mho ngai 17/9, Lâm Đồng geh 272 nă cau bơtờp kòp Covid-19, tàm hơ̆ geh 228 nă cau kòp neh sơm bời mờ ai rê bơh hìu sơnơm. Tàm 272 nă cau bơtờp kòp Covid-19 geh sền gŏ tàm càr Lâm Đồng, geh uă ngan cau kòp bơtờp bơh tiah kòp Hìu măy Brài Dà Làc mờ ală cau măy rơndeh, cau drơng broă tàm rơndeh pơn diang phan bơna lòt ală càr.

Tàm hơ̆, ƀòn dờng Dà Làc geh khà cau bơtờp uă ngan rlau jơh mờ 162 nă, pơn jat hơ̆ là kơnhoàl Đơn Dương mờ 45 nă, kơnhoàl Đức Trọng 27 nă. Ală kơnhoàl Bảo Lâm, Cát Tiên, Lâm Hà mìng geh 1 nă cau kòp lơm. Mìng is kơnhoàl Lạc Dương là kơnhoàl mìng dùl lơm bơh càr dê ờ hềt geh cau bơtờp kòp Covid-19 lơi. Ngan là, tàm khà ală cau bơtờp kòp Covid-19 tàm Lâm Đồng geh uă ngan cau kòp neh geh sơm bời mờ ai rê bơh hìu sơnơm. Tŭ do mìng gam 44 nă cau kòp gam sơm kòp tàm Hìu sơnơm kơnòm dềt Lâm Đồng mờ 2 kơnhoàl Đơn Dương mờ Đức Trọng.

Cau mblàng K’Hạnh