VOV4.K’ho - Broă cit sơnơm vaccine rơcang sơndră mờ kòp Covid-19 ai kơnòm dềt bơh 12 tus 17 sơnam tàm lơgar Việt Nam neh mùl màl lơh jăt bơh bồ nhai 11 nam 2021 tàm gùt lơgar. Tŭ do neh geh 6 tiah bơyai lơh cit là ƀòn dờng Hồ Chí Minh, Đà Nẵng, càr Bình Dương, Kiên Giang, Ninh Bình mờ Quảng Ninh. Geh ờ uă tiah ndai neh geh rơndăp broă cit sơnơm vaccine rơcang sơndră mờ kòp Covid-19 ai kơnòm dềt in tŭ sơnơm vaccine geh tam pà.

Bộ Y tế gam wèt tus bơta gơ glờm khà kờp làng bol bơh 18 sơnam rơlao hờ đang geh 100% tàm quý 4 nam 2021 mờ bồ nam 2022. Mìng is broă cit sơnơm vaccine rơcang sơndră mờ kòp Covid-19 ai kơnòm dềt (hờ đơm 18 sơnam), ai bơh tàm bơta geh sơnơm vaccine bơh gah lơh sơnơm, Bộ Y tế gam bơ̆t bơtàu rơndăp broă ngui sơnơm vaccine nam 2022 mờ dan geh jơnau đơng lam bơh Mpồl đơng lam Dà lơgar rơcang sơndră mờ kòp bè broă pờ ơnàng sơnam cit sơnơm ai kơnòm dềt hờ đơm 12 sơnam in di jăt mờ jơnau bơto sồr bơh Mpồl lơh sơnơm dunia (WHO) dê.

Cau mblàng Ndong Brawl