Mat facebook “H'Tuyết ồi kòn cau Jrai" geh gĭt nđờ rơbô dơ̆ cau jat sền, hơ̆ ngan là dùl gah yal tơngĭt, dong bi H’Tuyết ơm tàm mpồl 10, thị trấn Phú Thiện, kơnhoàl Phú Thiện tăc bơh 70 tus 100 nơm phan, priă lơh geh gĭt nđờ tơlak đong pah nhai. Bi H’Tuyết pà gĭt, tàm anih tăc phan tơn geh yồng gùt dar là măi tàñ mai mờ ào hàng niam geh tàñ mai bơh ồi kòn cau, bi sùm livestream yal ală jơnau yal tàm rài kis, geh tŭ lơh jài đơs jơnau đơs crih jài nàng gơ hòi gơ jà cau mut sền.

Ồi kòn cau Jrai geh bi tàñ mai gơ gơs ală phan bơna ào kăp, ồi rà lòt tam bau, ào ghi le cau klau, halà ào ồi lơh pa ai kơnòm dềt in,... jat di mờ jơnau sồr, rùp bơka bơh năc dê. Kơnờm bơh hơ̆, bi lơh geh broă lơh ai 4 nă cau tàñ mai in, mờ priă nhai pah nhai 6 tơlak đong dùl nhai mờ blơi phan bơna ồi kòn cau bơh ală cau chài ơm tàm xã Ia Sol, kơnhoàl Phú Thiện tàm uă nam do. Bi H’Tuyết đơs: “Añ cùp rùp, quay video pờ tơlik tơn tàm  facebook, Zalo bơh hơ̆, uă năc khi gĭt mờ jòi tus mờ añ. Cau den pơyoa jơnau cih, cau den dan blơi phan. Să tờm añ den kung dờp jơnau yal bơh tàm facebook, Zalo sơl nàng bơsram bơh ală oh mi tàm ală tiah ndai bè: Dăk Lăk, Lâm Đồng, Kon Tum,... Añ kung ưn ngài ngan ală cau neh lơh geh màng xã hội. Kơnờm geh màng xã hội dong añ bơsram tai nàng tơnguh uă rlau tai bơta chài tàñ mai phan. Kung kơnờm bơh tàm màng xã hội mờ uă cau neh cih jơnau cih pơyoa añ in mờ dan blơi phan sùm là ală năc tàm lơgar mờ gam geh năc bơh tàm lơgar ndai tai sơl”.

Bơta niam bơnĕ ồi kòn cau Jrai dê neh geh cau bơceh  tàñ mai phan Minh Hạnh- Kwang atbồ bơceh lơh Kông ty Việt Mốt, cau neh ai ào kăp, biài bơrteh, ồi kòn cau bơh ală tiah tàm lơgar dê tus mờ uă drà kă bro tàm dunia, sền gròi mờ yal tơngĭt. Lồi nhai 10 nam 2023 pa do, tàm broă lơh đơs crih tam ya “Gia Lai ơi” bơh Ủy ƀan Ñân zân càr Gia Lai bơyai lơh, dơ̆ sơn rờp ồi kòn cau Jrai, Bahnar dê neh geh cau tàñ mai Minh Hạnh bơceh lơh gơ gơs ală phan bơna hàng niam is rơmis ngan là ồi, ào kăp, cèng tơl 4 kàl: kàl mrềt prang, kàl prang, kàl hàm mờ kàl mrềt. Tàm hơ̆, ờ mìng rùp bơka ồi kòn cau dê lơm, mờ rùp hin cèng bơta krơi is Tây Nguyên dê bè hìu rông, tờm chi jŏ nam sòl rùp tàm dà croh mờ ală plung dơm chi... geh tàm pơgồp bal bơnĕ bơnài ngan tàm biài bơrteh, lơh geh ală phan bơna hàng niam krơi is ngan. Cau bơceh tàñ mai Minh Hạnh pà gĭt, kờp dŭ dong ồi kòn cau bơh ală jơi bơtiàn dồ ết nă cau tàm càr Gia Lai dê tus tàm drà kă bro, nàng lơh kah wơl ală ƀòn lơh broă bơh yau tàm càr dê: “Khi tàñ chài ngan, rùp bơka bơh khi dê cèng gơtha tàm rài kis pah ngai, gơ kờñ ngan. Broă sơnrờp bơh bol añ dê là kơ̆p kờñ ai bơta kwơ ồi kòn cau gơguh uă. Bơta do gơwèt mờ bol añ ƀuơn ngan, tài bơh tài làng bol tàñ mờ brài tơrgùm bal den bol añ pơnđơl lơh ngan tàm tơrbŏ bal nàng tàñ mai gơ gơs ală pang ồi kòn cau mờ biài bơrteh. Hơ̆ là broă lơh ai bơta kwơ bơh ồi kòn cau gơguh uă”.

Tŭ do, càr Gia Lai tŭ do gam lam lơh uă ală broă lơh nàng kờñ lơh niam wơl, prap gàr mờ jờng rơ ală bơta kwơ niam chài bơh yau, pơgồp bơnah lơh lila uă tai ai bơta niam chài ală jơi bơtiàn Tây Nguyên. Tàm hơ̆, prap gàr kơ̆ kơl jăp geh đơs nền là pơgồp bal mờ broă ngui bơta kwơ niam chài, kă bro, dong cau tàñ mai gơtùi bơtàu tơnguh lơh sa. Phó Củ tịc Ủy ƀan Ñân zân càr Gia Lai Nguyễn Thị Thanh Lịch, pà gĭt:“Bol añ kơ̆p kờñ jờng rơ ală cau chài, lơh gơ kờñ ai ală bơyô kơnòm să in nàng prap gàr broă lơh bơh yau, pơgồp bal bơceh lơh. Dơ̆ 2 bol añ kơ̆p kờñ yal tơngĭt, nàng ală kơlôi sơnơng niam chài, ală cau bơceh lơh, cau bơceh tàñ mai phan hàng niam nàng lơh ồi kòn cau gơ gơs phan bơna geh kwơ priă lơh geh uă, bơtàu tơnguh lơh sa ai làng bol jơi bơtiàn dồ ết nă cau tàm càr Gia Lai in”.