Hơ̆ là săp ntas trah mòn rùp màh bơh hìu bơnhă ồng Kinh Văn Cần dê mờ mò Đàng Thị Mỹ Trâm ơm tàm thôn Bàu Trúc, sàh Ninh Phước, càr Khánh Hoà. Kềng mum hìu, bi Kinh Thị Mộng Ngưng- cau kòn mìng dùl lơm ồng Cần mờ Mò Trâm dê gam tàm pơn jăt tàm pơdờn broă lơh mò pang yau dê. Ờ geh măy mŏk, mìng geh dùl nơm pơnhàt mờ mŭt, tàm dồ êt gời lơm neh lơh mòn gơs rùp să phan bơna dê. Bi Ngưng pà gĭt, ală ngai sơnrờp pa bơsram lơh den lơh tus kàr lơi là ờ gơtùi tơn tus kàr hơ̆ sơl, tŭ do den kwèng tê, lơh niam mờ gơ gơs cau chài lơh phan tờm rao. Săp ntas trah mòn rùp tŭ do kung neh gơgơs mờng kwèng ngan tàm rài kis tàm pơn jăt pah ngai bơh hìu bơnhă bi dê.

“Bơh sơnrờp bơsram broă, trah mòn sùm mờ gơ kung ờ gơtùi gơgơs dùl bơta phan lơi sơl. Mơya pah ngai lơh dồ êt, tài bơh broă do kờñ pal kong kal ke mờ kơ̆ nùs den hơ̆ sồng lơh gơtùi. Kal ke ngan là broă trah mòn bơr sơlàu ơn nha sa cùr. Mè oh dê broă lơi lơh kung gơtùi lơm, ai bèp oh dê den mìng là lơh broă crăp hơ̆ là lơh gơgơs phan. Kung kơ̆p kờñ ngan sơl oh kòn kòn sau tơnơ̆ do rơ̆p geh cau jăt bơsram, dilah ờ den là roh gơ broă do”.

Ồng Kinh Văn Cần mờ mò Đàng Thị Mỹ Trâm nam do neh rlau 70 sơnam, jơh bàr nă ùr bơklau ồng lòt gan bal ală nam nhai kơnòm să mờ broă trah mòn rùp màh. Tŭ do tàm sơnam neh kra, ngai pah ngai sùm khi kung gam iang ngan mờ ală broă lơh mờ geh bal cau gam kơnòm kung kal ke ngan jăt bàn sơl. Ală phan bơna lơh gơlik geh là ală phan ngui, bè: sơlàu nha sa cùr, hồp prăp nha sa cùr, ding chŏ nha sa cùr, sơlàu ơn biăp piang…Hơ̆ là ală phan ngui geh cau Prum ngui uă ngan là ală dơ̆ lơh yàng lơh chờ Katê, Ramưwan, ală broă lơh yàng tàm bồ sơnam là ñô bau, lăp bau…

Mò Đàng Thị Mỹ Trâm pà gĭt, chi dềt den lời nàng ơn nha sa cùr plai bơñàng, chi dờng den lời nàng ơn plai chi, jơh ală là nàng ơn pơdơng duh khuai yàng, mò pàng, ồng mò. Rùp sền tềng ală phan do ơn pơyua tàm hơ̆ là ală jơnau kah kir sơnrai jrô ơnàng ngan bơh cau Prum dê.

“Bơh chờm là ồng kra lơh, tơnơ̆ hơ̆ bơto wơl ai añ in. Tơnơ̆ do añ geh bơklau hơ̆ sồng bơto wơl broă do ai bơklau in. Tơnơ̆ tŭ ồng kra roh, ùr bơklau añ tàm pơdờn broă do tus tŭ jiơ do tơn. He mìng gĭt lơh gơlik gời lơm, geh cau tus ai lòt tăc tàm uă tiah, bơdìh càr kung geh sơl. Kơnờm geh broă lơh do mờ ròng 9 nă kòn bơsram, tŭ do ală kòn geh broă lơh broă sa jơh lơm”.

Bơta ngăc chài, bơta niam tàm tơl phan bơna bal mờ bơngă pin dờn tàm broă lơh den tàng cau năc blơi phan bơh ồng mò dê ờ mìng tàm càr Khánh Hoà lơm mờ gam tàm ală càr ndai bè Lâm Đồng, Đồng Nai, Tây Ninh, ƀòn dờng Hồ Chí Minh lòt dan blơi phan. Bi Bá Minh Truyền, là cau lơh broă sền gàr mờ ătbồ phan lời wơl Hìu prăp gàr phan kwơ yau Khánh Hoà pà gĭt, broă trah mòn rùp màh bơh cau Prum dê tiơng pơnrơ ngan lài do, tŭ do neh hŭi roh tĕ, bơtuah ngan gam đau wơl dồ hìu bơnhă cau Prum tàm Bàu Trúc gam gàr broă.

“Gơ wèt mờ cau Prum, ală phan ngui trah mòn mờ màh kwơmàng ngan. Pơnyơu bè ală sơlàu ơn nha sa cùr plai bơñàng, hồp ơn nha sa cùr plai bơñàng, gri ồs….hơ̆ là ală phan ngui mờ cau Prum sền dờng màng ngan, tàm dơ̆ duh khuai lơh yàng hơ̆ sồng cèng ai ơn phan ơn pơdơng lơh yàng nàng ơn pơdơng duh khuai mò pàng, ồng mò in; tơnggŏ bơta ki ngàm ngan gơ wèt mờ yàng, ồng mò, mò pàng”.

Rlau 40 nam đềt mềr mờ broă lơh trah mòn rùp màh, ùr bơklau ồng Kinh Văn Cần neh pơgồp bơnah prăp gàr broă lơh ờs mờng bơh yau hìu bơnhă dê mờ drơng geh kwơ ngan ngồn ai rài kis niam chài đah hwềng đah hwềng bơh mpồl bơtiàn kòn cau Prum.

Ồng Đàng Chí Quyết, Bí thư Chi bộ thôn Bàu Trúc, sàh Ninh Phước, càr Khánh Hoà pà gĭt, tàm ƀòn lơgar tŭ do geh bàr ƀòn broă lơh tiơng pơnrơ ngan là broă lơh ù buh Bàu Trúc mờ broă lơh tàñ ồi Mỹ Nghiệp. Is tàm thôn Bàu Trúc gam geh tai broă trah mòn rùp màh kung tiơng pơnrơ ngan sơl. Broă lơh do kung geh ƀòn lơgar pơlam gùng ai tơmŭt tàm broă lơh broă nàng bơtàu tơngguh lòt nhơl bal mờ broă lơh ù buh.

“Kơ̆p kờñ gơnoar ătbồ ală kâp, ală gah sền gròi gùng dà broă lơh bơto broă lơh, kung bè ai tơl bơta nàng lơh sră nggal dờn dờp ùr bơklau ồng Cần mờ mò Trâm là Cau chài Jak. Nàng pơn jờng nùs nhơm ồng mò, pơgồp bơnah bơto wơl broă do ai rơnàng kơnòm să in”.

Dilah geh sền gròi bơcri priă, broă trah mòn rùp màh cau Prum dê rơ̆p geh kis wơl bal mờ broă lơh ù buh Bàu Trúc lơh gơlik gơs ală phan bơna lòt nhơl krơi is ngan, hơ̆ là bơta tàm bơrlŭ bal đah phan lời wơl rài Bơtau Prum yô yau dê bal mờ pin dờn làng bol ơm kis bơh jŏ tàm tiah do dê mờ broă lơh mờ tê ờs mờng bơh yau, pơgồp bơnah lơh gơlik gơs măt kă bro phan lòt nhơl niam chài càr Khánh Hoà dê.