VOV4.K’ho- Drim ngai 14/9, tàm hìu lơh broă Bộ Ngoại giao geh lơh dơ̆ dờp ai lơh pơn yơu gời 1 tơlak 500 rbô ding sơnơm vaccine AstraZeneca bơh Chính phủ lơgar Tây mờ lơgar Italia dong kờl ai lơgar Việt Nam in bơh broă lơh COVAX. Đơs tàm dơ̆ bơyai lơh, Thứ trưởng ồng Tô Anh Dũng ưn ngài mờ đơs niam bơta dong kờl kuơmàng mờ di tŭ bơh Chính phủ mờ làng bol lơgar Tây mờ lơgar Italia dê, pơgồp bơnah ngan ngồn ai broă lơh rơcang sơndră kòp Covid-19 tàm lơgar Việt Nam.

Do là cơng tàng pà gŏ ai bơta bơtàu tơnguh ngac ngar bơh git gơp lơh broă bal jŏ jòng đah Việt Nam mờ Tây, Italia tàm ală nam do kung bè git gơp lơh bơyô, bơta tam klac bal, bal mờ gơp tam pà kal ke, sơrlèt gan kòp dờng. Thứ trưởng Bộ Y tế ồng Trần Văn Thuấn đơs nền, geh gờñ tam pà khà sơnơm vaccine do ai ală tiah in mờ gàr niam broă ngui ngan ngồn, geh cồng nha ngan rlau jơh.

Cau mblàng K’Duẩn