Tâm xã Ia Hiao, n’gor Gia Lai (geh njêng bah nau rnglăp 3 rmôt kan hành chính geh xã Chrôh Pơnan, xã Ia Hiao ndrel xã Ia Peng, nkuăl Phú Thiện ơm) nau pah kan tâm ăp nar dŭt năm jêng ueh ngăn. Tĭng ăp trong hăn ƀon lan, cán bộ, đảng viên ndrel kônh wa hăn doh lơi ntŭk, pă lơi neh gay nkra trong têh tơm. Ntơm bah trong lăp thôn Sômơlơng A lah ngih wa Siu Hiếu, Kruanh Uỷ ban MTTQ Việt Nam xã Ia Hiao. Neh trong hăn ăp mét geh rnoh ma rhiăng rkeh prăk geh pă ân nau nkra trong ma mô geh rvê. Wa Siu hiếu, nkoch nau:

            ‘Ƀư ueh nau kan bah Kruanh mặt trận, lah nŭih hăn lor tâm nau kan bonh đă nŭih ƀon lan gay ma nkra trong. Ăp nau kan ta aơ ri mô knŭng êng bah hôn ma lĕ lah lam rmôt kan xã Ia Hiao. Ŭch lah kônh wa nơm tâm kơl an, ŭch trong hăn nar lơn ma hvi ndrel kloh lơn gay ma kônh wa ƀư nơih tâm nau kan hăn ro”.

            Nau ntrŭnh n’hao nkra trong ƀon lan hvi ntơm 3m hao 5,5m geh ntrŭnh ƀư tâm ban. Knŭng tâm geh mông, 52 rnăk hŏ pă bơi tât 4.5m2 neh, doh rklaih rlau 1.200 n’gâng n’gar B40, 4 trong hăn ndrel mương hoch dak, jong bơi tât 2,5 km, mra geh ndâk ƀư ân tâm di, rklaih ngăn gay nau kan ƀư dak bŭk, mô kloh, tă geh ƀư nau jêr ân ƀo lan bah âk năm ma aơ. Nŭih ƀon lan Ia Hiao ndơn nau ntrŭnh aơ đah nau rnơm ndrel nau kan. Wa Kpă Nghing, thôn Sômalơng A, nkoch:

            ‘N’gâng kan, Ngih dak ƀư trong ri gâp rhơn ngăn yor lah trong ơm huêt ngăn, jêh aơ âk nŭih, ƀon lan hăn ri âk mra mô dơi. Tal bar lah ndeh klư nhăn âk kŏ tâm der. Ndri ma nau kan Ngih dak pơk trong ting nau kan ma nŭih ƀon lan mra pă kơl an neh”.

            Tâm thôn Bình Trang, wa Nguyễn Văn Nhâm kŏ gơih ƀư tĭng đŏng:

            Hun hao ƀon lan mơ geh dơi pơk hvi trong hăn ri ma hên ŭch ngăn đŏng nau kan ndrel kơl an. Rnôk aơ trong ri mhâm mhâm pơk trong nơih ân kônh wa pơk trong hoch dak tal bar lah n’gâng n’gar pơk luh ân ueh ân kônh wa ri ma kônh wa ƀon lan hên ŭch ngăn ndrel geh nau kơl an đŏng”.

            ‘Rgum bonh đă ƀon lan pă ân neh, pơk hvi ăp trong hăn ƀon lan” lah ngoai tâm 5 nau kan mhe geh Đảng bộ xã Ia Hiao năl nkre ta Đại hội tal I. Aơ lah nau kan geh ndâk ƀư tă bah nau dơi geh bah nkual, ƀư nau dơi gay gưl uỷ, n’gâng kan ndrel ăp rmôt kan ƀư ân ngăn ăp nau kan ân lam năm kan. Tâm nê, rmôt kan bu ur xã geh nau kan ƀư tơm bonh đă ƀon lan, du gưl nau jêr yơn ân geh nau ŭch, nâp. Wa Trần Thị Minh Hiền, Kruanh Rmôt bu ur xã Ia Hiao, mbơh:

            ‘Rmôt kan bu ur xã hŏ geh âk nar hăn tât ăp ngih, ăp nŭih gay ma bonh đă ƀon lan gĭt mpeh nau ntrŭnh gay pơk trong ndrel ƀư trong mương hoch dak. Mbơh kloh ân ƀon lan gĭt nê lah trong hăn ndrel ƀư trong hoch dak mương luh mô êng lah ƀư ueh nâp ân thôn ma hôm ndâk ân ƀon lan mhe ma hôm pơk trong nơih gay ƀon lan rêh tâm nkuăl geh hăn ro ân nơih, n’huch nau khuch dêh ngăn rnôk mih daklip tât lah mra geh nau dak lip băm”.

            Đại hội kŏ năl kloh nau kan: Đảng bộ kloh, n’gâng kan ƀư rjăp, blau nau mhe, nau kan, Mặt trận ndrel ăp ntŭk kan chính trị-rêh jêng lah ntŭk tơm bah nau tâm rnglăp lam ƀon lan. Ntơm bah ăp ntŭk kan jao nau ƀư du ntil nau kan tơm, nkoch mbơh nau blau dăng kan ma n’gâng kan, pơk jêng ntrong kan bonh đă ân kloh, ngăch, ƀư nau kan rjăp ndrel tâm ban ngăn. Yơn lah, jêr hôm đŏng. Wa Bùi Hữu Tâm, Groi Bí thư Rnâng kan Đảng uỷ xã Ia Hiao, mbơh kloh:

            ‘Rnâng kan hŏ năl kloh nau kan jêr tâm rnôk ƀư, rơh ƀư gay ƀư nau kan nê lah nau pă tơm prăk dŏng knŭng geh nar ƀư ân jêh tât 31 khay 12 năm 2025 ri ma tâm nau ƀư ân geh ƀư âk nau kan ngăch ndal. Tâm rnôk ntrŭnh ƀư nau kan, bah nau mât ăp nau mbơh đă bah ƀon lan ri saơ nŭih ƀon lan tâm ban nuih n’hâm, tâm kơl an nau kan pơk hvi ndrel n’hao nau nchrăp kan aơ? Jêh nê geh nuih n’hâm mra pă neh, pă ndoh ndơ mô kâp geh đă trok tâm”.

            Tâm ăp trong mhe dôl geh pơk hvi, ăp trong aơ dôl geh ndâk nkra...nê lah nau mpơl saơ kloh ngăn ân nuih n’hâm “Ƀon lan gĭt, ƀon lan tâm nchră, ƀon lan ƀư, ƀon lan geh dŏng”. Rnôk nau ntrŭnh têh geh ƀư ngăn đah ăp nau kan n’hêl, đah nau ngăn ngên leo trong bah cán bộ, nau tâm ban nuih n’hâm bah ƀon lan mra jêng n’hâm dăng rêng ueh tâm nau rêh. Nê lah rnôk nau ntrŭnh bah Đảng ngăn ngên lăp tâm nau rêh, pơk trong ueh gay ma rgâl nkre tâm ăp nkuăl ƀon lan gŭ./.