Ôi 12/5, ta nkual ƀon têh Gia Nghĩa, Bộ Công an kan nsum đah UBND n’gor Dak Nông ndrel ăp đơn vị ntop kơl ƀư Rơh rgŏ jă luh hăn kơl mon mhe, jut jăng nhih jay truh sat, nkưp nde; nkre dơn prăk ƀư n’hanh jao jay ntĭt lor ta n’gor. Bộ Công an hŏ rgum n’hanh ndơ̆ kơl 30 rmen prăk gay ntop kơl mon mhe 500 mblâm jay an rnăk ach o, dăch kêng ach o n’hanh rnăk dơi kơl geh jêr jŏt mpeh jay gŭ ta n’gor Dak Nông.

Ta rơh rgŏ jă, Trung tướng Phạm Thế Tùng – Thứ trưởng Bộ Công an mbah rhơn ăp rnăk dơn geh jay , nkre njuăl nău lah uĕh tât ăp nuĭh tơm kơl, ăp n’gâng kan ta n’gor Dak Nông hŏ ndrel hăn, kan nsum ndrel Bộ tâm pah kan jut jăng jay truh sat, nkưp nde ta n’gor. Tĭng trong nchrăp, n’gor Dak Nông mbra ntlơi jăng lĕ rngôch 1.755 mblâm jay truh sat, ntop kơl rnăk ach o, dăch kêng ach o, rnăk dơi kơl n’hanh ƀon lan rnoi mpôl đê̆ ta lam n’gor. Kơp tât rnôk aƀaơ, n’gor hŏ ƀư lôch jêh nklăp 75% rnoh âk nău kan n’hanh nchrăp mbra ƀư lôch jêh bah năp nar 30/8/2025.