Đah 135 rnăk, rnoi mpôl đê̆ Jeh-triêng ta Thôn Dục Nhầy 1, xã n’har bri Đăk Dục, nkuăl Ngọc Hồi, n’gor Kon Tum, ri ăp cán bộ, tahen đồn biên phòng Dục Nông kơt lah băl mpôl tâm rnăk vâl. Ăp dĭng lĕ nŭih ƀon lan tâm thôn kŏ dŏng ăp nau ueh lăng ngăn rnôk nkah tât cán bộ, tahen Biên phòng. Nô A Luật, du hê nŭih ƀon kan tâm thôn nkoch kơt aơ:

            ‘Đồn Biên phòng uănh kơl an tât ăp rnăk vâl, rnăk jêr jŏt. Kơl an jêh ri ndơn rong ăp kon se jê̆. Mro kơl an tâm dăch tât kônh wa ƀon lan tâm nkuăl bah xã Đăk Dục. Gâp ndơn saơ ăp tahen biên phòng ta aơ dŭt tâm dăch, dŭt ueh ngăn”.

            Yuh Xiêng Thị Tuý, Bí thư Chi bộ, Kruanh Thôn Dục Nhầy 1 mbơh, 3 năm rlau aơ, Rnâng kan tahen Biên phòng Dục Nông đă Thiéu tá Dương Văn Lương tât rƀŭn nsum ma thôn. Ƀư ueh nuih n’hâm kan bah tahen biên phòng, thiếu tá Dương Văn Lương hŏ mbơh nau ân Chi bộ nchrăp luh nau ntrŭnh ueh ngăn tâm nau ndâk njêng Đảng ndrel n’hao nau rêh ƀon lan. Chi bộ thôn Dục Nhầy 1 nglăp geh 2 đảng viên mhe, n’hao rnoh đảng viên bah Chi bộ hao 19 nŭih, huch rnoh rnăk ach o lam ƀon lan hôm 6 rnăk:

            ‘Đồng chí râng gơih n’ơr ngăn, rgop nau ndâk njêng Chi bộ kơl an Chi bộ ndâk nau nchrăp jêh ri nau ntrŭnh bah Chi bộ ndrel nkô̆ nau rƀŭn rgum âk nau lơn, rgum âk lơn đảng viên. Êng ăp nau kan nê ri păng kŏ lah nŭih gơih kơl an kônh wa. Ntơm bah rnôk geh tahen n’hao ƀư tâm Chi bộ ri thôn kŏ geh Thôn kloh nâp, jêh ri mô geh rnăk vâl tih pháp luật”.

            Gay ƀư rjăp lơn nau tâm rnglăp ƀon lan, ndâk “nuih n’hâm ƀon lan” nâp, tă bah năm 2020 tât rnôk aơ, N’gâng kan rđau tahen Biên phòng n’gor Kon Tum leo sỹ quan, tahne tâm ăp Đồn Biên phòng n’hao kơl an ân 13 xã tâm êp ntrong n’har ma dak băl Lào ndrel Campuchia. Tâm nê geh 4 cán bộ Đồn râng gưl uỷ bah 4 nkuăl; 13 cán bộ râng nau kan gưl uỷ bah 13 xã n’har bri; 17 cán bộ geh săch tâm HĐND gưl n’gor, nkuăl, xã...

Trung tá A Ngọc Chiến, Đồn Biên phòng Đăk Nhoong geh N’gâng kan rđau tahen Biên phòng Kon Tum n’hao ƀư kan Groi Bí thư Đảng uỷ, Kruanh Uỷ ban mêt uănh xã n’har bri Dak Nhoong, nkuăl Đăk Glei, mbơh:

‘Gâp hŏ râng mbơh nau ân Đảng uỷ mbơh nau ntrŭnh rđau kan ndrel đă  UBND, MTTQ ndrel ăp ntŭk kan chính trị rêh jêng tâm ban nuih n’hâm lăp ƀư nchră ăp nau kan hun hao văng sa, rêh jêng, ngăn lah nau ƀư jut n’huch ach o, jăng lơi nau rluk mâl ơm gay ƀư ân kônh wa rnoi mpôl đê̆ hao rklaih ach o nâp nâl. Phung hên năl aơ lah nau kan ân tăm tơm tơm Sâm Ngọc Linh, tal bar kah hên ntrŭnh tăm sêt Linh Chi gay njêng trong hun hao văng sa prêh”.

Đah nuih n’hâm “Đồn lah ngih, n’har bri lah ƀon tơm, kônh wa ăp rnoi lah oh nô dak mham”, rmôt tahen biên phòng n’gor Kon Tum hŏ geh âk nau kan ngăn, n’hêl, ƀư rjăp nuih n’hâm ƀon lan nkuăl n’har bri. Ntoh ngăn kơt nau kan “Ndâk thôn Đăk Ga, xã Đăk Nhong, nkuăl Đăk Glei hơm tăm, nâp nâp, đăp mpăn”, ăp nau kan ƀon lan kơt: Thuỷ điện jê̆ Đăk Giao- Đăk Loong; dak dŏng hoch êng Bờ Y, Đăk Loong, Đăk Blô, nau kan kơl an, tâm njêng ma ăp rnăk geh nau rêh jêr jŏt gay rklaih hao ach o, kơl an 74 kon se tâm bôk nau kan “N’hao nhoat jâng oh hăn nti”, 15 kon rong tahen Biên phòng...Ntơm nau hăn ndrel, kơl an bah cán bộ, tahen biên phòng, nau rêh bah ƀon lan tâm nkuăl n’har bri bah n’gor Kon Tum geh nar lơn săk ntor, “nuih n’hâm ƀon lan” lơn ma nâp nâl./.