Tĭng nau mbơh kan bah rmôt kơl an ƀon lan bah Quốc hội khay 10 ndrel 11 năm aơ, cử tri ndrel ƀon lan tâm lam dak ntoh nau rnơm đah nau rđau kan bah Đảng, rnê prêh nau ntrŭnh rgâl mhe, dăp rgum nau kan bah ntrong kan chính trị, pah kan ân nâp, săk tam. Nau lŏ rgâl mhe, dăp rgum ntŭk kan chính trị ân geh nau kan nâp bah nau kan ngăn, cử tri ndrel ƀon lan ŭch ƀư nau ntrŭnh nê njêng nau mhe ân nau mât, ndâk njêng ndrel hun hao neh dak, njêng nau mhe, ƀư jêh ăp nkô̆ nau kan bah nau ntrŭnh Đại hội ntoh măt lam dak tal 13 bah Đảng nchrăp luh. Nkre lah, cử tri ndrel ƀon lan ŭch rnôk ƀư nau ntrŭnh kan ân nâp, pah kan săk tam, ân geh kơl an nau mât đăp mpăn nau dơi ân cán bộ, công chức, viên chức, nŭih pah kan. Tâm rơh rƀŭn, Kruanh Uỷ ban Quốc phòng ndrel rnă njrăng Lê Tấn Tới, mbơh kloh:

            ‘Bah rnôk mâp ma cử tri mhe rlau aơ, gâp tâm mâp ma cử tri Long An lah êng, Đồng bằng sông Cửu Long lah nsum ri ntoh ngăn bah ƀon lan Long An lah kơl an nŭih ƀon lan mpeh nau ƀư n’huch, ƀư nâp ntrong kan tĭng nau ntrŭnh mrô 18 geh tât nau kơl an đŏng tâm ntŭk rêh jêng. Âk ngăn ƀon lan ŭch kơl an”.

            Tâm rơh rƀŭn tâm mâp ma cử tri jêh rơh rƀŭn tal 8, Quốc hội gưl 15, cử tri n’gor Dak Lak kŏ ntoh nau rnơm, ƀư tĭng prêh ueh ngăn nuih n’hâm ƀư nau kan nau ntrŭnh mrô 18/NQ-TW mpeh “Lŏ rgâl mhe, dăp rgum, ƀư nâp ntrong kan bah chính trị”. Aơ ngăn lah nau kan ƀư ngăn mpeh nau ƀư gleh nâp ntŭk kan bah ntrong kan chính trị, geh cán bộ, đảng viên, cử tri kơl an. Cử tri Vũ Mạnh Khuông, tâm Phường Thành Công, nkuăl ƀon têh Buôn Ma Thuột, mbơh:

            ‘Dăp rgum tay ntrong kan tă bah Trung ương tât nkuăl an tâm di ma nau rêh bah ƀon lan, cán bộ tâm dâng kŏ kơt lah ƀon lan rnơm ngăn nau ntrŭnh bah Đảng ngăn lah ƀư ân săk tam nau kan nơm. Ŭch lah, tâm rơh tât, Đảng ndrel Ngih dak ƀư ân rjăp gay mhâm ƀư ân dơi tŏng nau ŭch bah ƀon lan”.

            Tâm rơh rƀŭn, Uỷ ban Rnâng kan Quốc hội đă ƀư ueh lơn tay nau kan nkoch trêng. Yor nau dăp rgum geh tât kon nŭih, khuch tât nau geh dơi bah ƀon lan. Ân geh mbơh luh ăp nau ntoh luh, nau jêr ndrel ăp ntrong kan chính trị gleh, pah kan nâp, săk tam. Groi Kruanh Quốc hội Nguyễn Thị Thanh đă, uănh nau kan ân tâm di, nơh ân rmôt cán bộ tâm nau dăp rgum, ƀư n’huch nuih pah kan, ndâk tay rmôt cán bộ, công chức, viên chức, nŭih pah kan:

            ‘Phung hên mĭn ân geh nau kan ân rjăp ndrel rlet ngăn đah ăp nau kan bah năp nê, gay geh ăp nau bonh đă ăp nŭih hôm 2 năm, 3 năm, 4 năm mra dơi ân rlu ân cán bộ mom, cán bộ geh ntĭm nti geh mât ƀư tâm ntrong kan. Lah nơm mô geh nau kơl an ueh ri mô dơi nkân ôh ăp cán bộ ma nơm ŭch mât ndrel mô ndŏ luh ăp cán bộ ma nơm ân geh ntrơn hăn ƀư nau kan êng”.

            Ntoh nau tâm nar rƀŭn, Kruanh Quốc hội Trần Thanh Mẫn đă, ân ndal ƀư jêh nau kan, nau đă, rgâl ăp luật geh tât, ƀư rgâl mhe, dăp rgum trong kan gleh, pah kan nâp, săk tam. Kruanh Quốc hội đă ân rklaih ngăn nau phong dôih jŏ jong; nchŏng kloh ăp ntŭk kan geh nau dơi, nau rklaih nau phong âk nŭih, ngăn lah ân mât tâm dăch tâm nkuăl gay ma rklaih ân tâm di nuih n’hâm, nsrŭng lơi ăp nau phong tă bah tâm dâng:

            ‘Uănh gay rklaih ân nâp. Lah bu phong dôih ngăn ri nơm jă bu ân nơm geh nau nkoch, mbơh kloh. Trung ương rklaih moh nau, nkualư rklaih moh nau gay ma rklaih ân lôch ngăn. Yơn êp nê ân geh joi ăp nŭih lah nŭih leo nau phong, lah yor phung mhik ƀư nsŭk rlăm...ri ân geh rklaih”.

            Kŏ tâm rơh rơh rƀŭn aơ đŏng, Uỷ ban Rnâng kan Quốc hội hŏ yơr ti nchră mbơh nau ntrŭnh bah nau đă mpeh dăp rgum, ndâk rmôt kan hành chính gưl nkuăl, gưl xã rnôk năm 2023-2025 bah n’gor Ninh Bình./.