Rnăk vâl wa Phan Văn Xuân ta ấp 2, xã Phú Lễ, nkuăl Ba Tri tâm ban kơt âk rnăk ƀon lan kan lŏ mir êng ta aơ mô hôm nđơr đah nău kan mât rong ndrôk tăch poăch. Yorr 2 năm ba năp, rnoh poăch ndrôk, ndrôk ntil lĕ hŭch jŭr thuk, nuĭh rong roh dơm âk. Wa Xuân nkoch. " Rong ndrôk rĭ du năm n’gul deh kon ndrôk me tăch geh 15 rkeh prăk, rmeh geh 5 rkeh prăk ma ê hŏ kơp mông nar mât chăm, nuh srê đong. Hôm ndrôk dăm rĭ du mblâm tăch ê hŏ tât 3 rkeh prăk rmeh ma rong bâh 13 tât 15 khay. Pih rĭ nơm tăm, lah mô geh neh tăm rĭ manh neh bu tăm. Rnôk nĕ nơh, gâp rong 4 mblâm ndrôk me, ăp năm deh 8 mblâm ndrôk, aƀaơ kanŭng hôm 1 mblâm dơm, rong mô hôm dơi, mô geh rmeh jêng lah mô hôm rong”.

Hôm wa Nguyễn Văn Tân, nuĭh ƀon lan xã Phú Lễ an gĭt, lĕ mô hôm rong ndrôk yor mô geh rmeh tâm nău wăng sa: “Rnoh tăchndrôk mô khlăy. aƀaơ ƀon lan rơih lĕ ndrung n’gar yor aƀaơ rong ndrôk sŏk poăch râng geh ƀon lan roh dơm rlău 5 rkeh prăk. ăp năm ndrôk sŏk poăch geh rnoh khlăy 40 rkeh prăk/mblâm aƀaơ hôm 30 rkeh prăk/mblâm. Lâk, ndơ sa rĭ mô hŭch, ta aơ hôm geh 10 jay aơ kanŭng 3-4 jay rong dơm”.

Rong ndrôk sŏk poăch, ndrôk deh kon lah nău wăng sa tơm bâh ƀon lan xã Phú Lễ đah lĕ rnoh ndrôk rlău 5.800 mblâm, dŭt âk lah ta nkuăl Ba Tri. Yơn dăch aơ, âk rnăk ƀon lan nklơi dơm ndrung n’gar, rgâl jêng nău kan êng, mô hôm geh ŭch nđơr đah nău rong ndrôk. Wa Hạ Văn Chức, groi kruanh UBND xã Phú Lễ ngơi. " Bar năm dăch aơ mpôl ndrôk bâh xã Phú Lễ lĕ hŭch âk, yor ndơ sa rvăt khlay ma tăch ndrôk mô khlăy jêng ƀon lan mô hôm geh rong âk kơt ntơm ma săch ntil i ueh mơ geh rong. Aƀaơ, ta ntŭk lĕ geh mbơh tơih rgŏ jă đah ƀon lan mô dơi tăch lĕ rngôch ma an geh uănh năl na nê̆ joi ndơ sa ta ntŭk, n’hanh rnoh ndơ sa bâh rnăk vâl “Sŏk gleh rong jong” gay ma đăp mpăn rnoh ndrôk.

 Tĭng rnoh kơp bâh UBND nkuăl Ba Tri, lĕ rnoh ndrôk bâh ta ntŭk aƀaơ geh bơi tât 97 rbăn mblâm rgum âk ta ăp xã An Đức, Phú Lễ, An Bình Tây, An Hiệp, Tân Xuân...geh 2/3 mpôl ndrôk bâh lam n’gor. Ta rnôk aơ, rnoh poăch ndrôk khlăy klâp ma 17 rkeh prăk/tạ, ndrôk me ntil bâh 14-16.500 prăk/mblâm. Bâh năm 2016, Cục sở hữu trí tuệ lĕ pă nău kơp dơn nău ntơ ntil “Ndrôk Ba Tri”. Rlău ma nău tâm rlong mpeh rnoh khlăy bâh ndrôk rvăt bâh dak bah dih, ndrôk ta ntŭk dăch aơ lĕ geh ntưp nuh srê ngăn lah pŭn môr ntô săk, nuĭh rong geh roh tay âk prăk mât săm, n’huch nău geh rmeh. N’gâng kan, ntŭk kan ta ntŭk lĕ geh mât kơl, kơl an ƀon lan kan lŏ mir hun hao ndrôk tĭng trong mât ueh yơn ntŭk tăch rĭ ê hŏ dơi geh. Wa Dương Minh Tùng, kruanh UBND nkuăl Ba Tri an gĭt." Rnoh khlăy tăch ndrôk  ntŭk tăch rgâl mbơh dơm he mô dơi mbơh rnoh nău nĕ he mô dơi gĭt. Nkuăl lĕ geh ƀư âk trong kan, rdâk njêng nău ntơ ndrôk Ba Tri đŏng, gâp lĕ geh mbơh tơih mpeh ndrôk Ba Tr, ăp tơ̆ rƀŭn nchră ta n’gor geh nău dăn đă...Gâp geh kuăl đă ntuh kơl ntŭk tăch rvăt bôk năp, ndơ mât rong tuch tăm, geh rnoh neh yơn lah 2-3 nuĭh ntuh kơl lĕ joi uănh năl, sĭt dơm yơn ê hŏ ƀư săm ƀut ntuh kơl, dŭt jêr ngăn”.

Ba Tri lal ntŭk dăch dak lêng, geh nău tât âk mpeh rgâl mih sial, nău rêh bon lan hôm âk nău jêr. Nău ndâk nsơm tay wăng sa ngăn lah mât n’hanh hun hao ndrôk tăch poăch bâh ƀon lan ta aơ gay ma nta nău rêh an ƀon lan ueh lơn lah nău dŭt khlăy ma n’gâng kan n’hanh n’gâng kan ta ntŭk an geh ntrong kan tơm khlăy, geh săk rnglăy lơn.