Ủy ban Dân tộc mhe ƀư Tâm nchră pơk sŏng dăng lam dak n’glôch jêh pah kan rnoi mpôl đê̆ năm 2024 n’hanh an ƀư nău dơn kan năm 2025. Groi Thủ tướng Rnâng kan Chính phủ Nguyễn Hòa Bình lah rjăp, pah kan rnoi mpôl đê̆ n’hanh trong kơl rnoi mpôl đê̆ dơi Đảng n’hanh mât uănh khlay ma bôk nău kan gưl neh dak hŏ lăp tâm nău rêh ƀon lan rnoi mpôl đê̆ n’hanh mpeh yôk yang.  

Tâm bah ri aơ nơh ƀon lan rnoi mpôl đê̆ n’hanh mpeh yôk yang tâm  lam dak hŏ nsrôih tâm nău an  tĭng ƀư ăp kôp trong kơl ta nkual ƀon lan rnoi mpôl đê̆ n’hanh mpeh yôk yang n’hanh ăp trong kơl đăp mpăn lam rêh jêng kon nuĭh jêng nău rêh bah ƀon lan nar lơn ma rgâl geh, dăp rgum wăng sa geh nău rgâl uĕh, joi geh trong rêh bah nuĭh ƀon lan nar lơn ma âk mpưm ntil trong wăng sa; nsĭt geh wăng sa n’hao têh. Rnoh rnăk ach o hŭch âk, ntĭm nti, dak si dơi ŭanh khlay; văn hóa, nău way ơm uĕh lăng bah rnoi nuĭh dơi rdâk ƀư tay uĕh lăng. Nô nău rnă njrăng dơi mât nâp; tâm rnglăp lam rnoi nuĭh dơi rdâk nsing nâp n’hanh n’hao dăng. Rnoh ngăch hun hao wăng sa ăp n’gor nkual ƀon lan rnoi mpôl đê̆ n’hanh mpeh yôk yang hao âk, tâm nê geh ăp n’gor nkual Tây Bắc rĭng hao 8,0%/năm, Tây Nguyên rĭng hao 7,5%/năm, Tây Nam Bộ rĭng hao 7,0%/năm…

Tĭng Bộ trưởng, Chủ nhiệm Ủy ban Dân tộc Hầu A Lềnh, tâm năm rlău aơ, pah kan rnoi mpôl đê̆ hôm mpăng đêt, tâm nê, nău an ƀư du đêt Đề án, Bôk nău kan hôm kŏ kol, tâm nê bôk nău kan gưl neh dak ƀon lan rnoi mpôl đê̆ n’hanh mpeh yôk yang mô hŏ dơi tât rđĭl đah nău ŭch geh ndơ̆ luh:

Nău leo an ƀư ăp n’gor ri geh ăp n’gor ƀư dŭt nsrôih đŏng, geh tât du rnoh n’gluh tơm prăk dŭt âk lĕ mpeh ntuh kơl n’hanh way sŏk dŏng, yơn hôm geh ăp n’gor lah nău an ƀư hôm đêt lơn, mô hŏ dơi tât rđĭl đah nău ŭch geh ndơ̆ luh. Rĭng lam dak, Bôk  nău kan gưl neh dak tât rnoh n’gluh tơm prăk âk đŏng, yơn lah, rđĭl đah rnoh tât nsum bah Chính phủ n’gluh ri  mô hŏ dơi tât nău đă geh. Nău gĭt wât bah nuĭh ƀon lan, nău du nuih n’hâm râng bah nuĭh ƀon lan hôm mpăng đêt.

Năm 2025, Ủy ban Dân tộc n’gluh 12 nău dơn kan rgum tơm, tâm nê nsrôih an ƀư, wat jêh dăp rgum lam nhih pah kan rnoi mpôl đê̆ ta Trung ương n’hanh n’gor lăp kan dĭl ntơm bah bôk năm 2025. Ta tâm nchră, ntơh măt ăp n’gor nkoch du đêt jêr jŏt, kŏ kol tâm rnôk an ƀư pah kan rnoi mpôl đê̆ ta n’gor đŏng, nkre dăn đă geh trong nkra droh rklaih.

Lah ta tâm nchră, Groi Thủ tướng Nguyễn Hòa Bình lah rjăp, pah kan rnoi mpôl đê̆ n’hanh trong kơl rnoi mpôl đê̆ way dơi Đảng n’hanh Ngih dak uănh khlay ma bôk nău kan gưl neh dak hŏ lăp tâm nău rêh ƀon lan rnoi mpôl đê̆ n’hanh mpeh yôk yang. Wăng sa hun hao, nău rêh bah ƀon lan rnoi mpôl đê̆ n’hanh mpeh yôk yang hŏ dơi rgâl geh, bah nê an saơ dơi trong kơl bah Đảng n’hanh Ngih dak hŏ lăp tâm nău rêh. Bol ma kơt nê̆, tâm năm 2024, Ủy ban Dân tộc nha hôm 7/14 nău kan mô hŏ wat jêh đŏng, jêng Groi Thủ tướng Nguyễn Hoà Bình đă ân ƀư wat jêh ăp nău kan dja tâm quý 1 năm 2025. Ủy ban Dân tộc ân ntrŏng năl tay nău dơn kan, nău nsrôih kan chính trị đah ƀon lan rnoi mpôl đê̆ n’hanh mpeh yôk yang, grêt dăch tĭng trong nchrăp bah Đảng, Nghị quyết bah Quốc hội ăp trong nchrăp têh:

Gung trong âk, tơm ndơ ntuh kơl âk, jêng he mô ƀư dơi luh saơ du ntil ndơ an kônh wa, an ƀon lan ri he geh nău khoah âk. Jêng he ân gŭ mĭn ƀư dăp rgum tay nuĭh kan aƀaơ bah he glêh tam geh nău yach ngăch lơn n’hanh nuĭh kan mhe nchrăp wơt dơn ăp nău kan mhe. Geh ăp nău dơh yơn geh ăp nău jâk r’ah đŏng. Jâk r’ah lah nău  kan âk mpưm lơn, jâk r’ah lah nuĭh kan mbra geh r’goh n’gơ bah lơ tât tâm dâng, yơn trong dơh  lah n’hao âk tay tơm ndơ nkra nău n’hao nău rêh bah kônh wa ƀon lan hao.

Groi Thủ tướng Nguyễn Hoà Bình đă, năm 2025 nsrôih ân ƀư lôch jêh jay gŭ an nuĭh ach o ma ăp nău nsrôih, nkre năm 2025 ân n’glôch jêh bôk nău kan gưl neh dak hun hao wăng sa – rêh jêng kon nuĭh nkual ƀon lan rnoi mpôl đê̆ n’hanh mpeh yôk yang rơh bôk năp n’hanh nchrăp uĕh an rơh tâl II bah bôk nău kan, mô an nău kan rơh bôk năp bah bôk nău kan rsŭn tay an bah kơi.