Nar 24 khay 12 năm 1958, Wa Hồ sĭt khâl Nhih nti Tahen Quân khu 1. Wa Hồ ntĭnh: “Lam nhih nti ân ntĭm uĕh, nti uĕh, tâm rnglăp uĕh đah ƀon lan ăp rnoi mpôl đê̆ n’hanh rdâk njêng Nhih nti jêng du Nhih nti tahen ntĭt leo lor”. Tĭng nău wa ntĭm, 75 năm aơ, Nhih nti Tahen Quân khu 1 hŏ tĭng ƀư âk trong nkra tâm pah kan ntĭm nti mât đăp mpăn rnă njrăng neh dak, ƀư lôch jêh uĕh nău kan dơi jao.

Ndrel đah nău dơn kan mât, ntĭm nti, tiăr nti nuĭh hạ sỹ quan chỉ huy, trung cấp, cao đẳng, đại học n’gâng kan tahen tâm dâng, kơi năp nti nău gĭt blău n’gâng kan rnă njrăng n’gang neh dak đối tượng 2.., Nhih nti tahen Quân khu 1 dơi jao nău dơn kan ƀư nsum đah Học viện Chính trị mât jrô ntĭm nti glêh nar an cán bộ chính trị gưl trung, sư đoàn, ntĭm nti rơh 1, sỹ quan gưl phân đội trình độ đại học bah Học viện Quân y. Rnôk râng jrô ntĭm nti, ăp nuĭh nti n’hao nău gĭt êng, dŏng geh nău tam tâm ngăn ngăn ta đơn vị, ntŭk gŭ pah kan. Wa Lý Ngọc Minh, Chỉ huy trưởng Ban chỉ huy quân sự phường Vĩnh Trại, nkual ƀon têh Lạng Sơn dôl tĭng jrô ntĭm nti liên thông cao đẳng hao đại học N’gâng kan tahen tâm dâng, an gĭt:

“Rnôk dơi nti nău gĭt blău mhe bah ăp nai ntĭm nti gâp saơ geh nău tam têh, năp an cán bộ trong pah kan khoa học. Mpeh nău mĭn dŏng tâm nău kan geh nău tam lơn lor rnôk gâp dơi nti”.

Gay n’hao nău tam pah kan ntĭm nti, Ban Giám hiệu Nhih nti tahen Quân khu 1 hŏ rgŏ jă âk trong leo tâm rlong “Tâm rnglăp, ntĭt leo lor, dăp grep, blău ƀư mhe, nsrôih geh nău dơi”, “Tâm rnglăp uĕh, tĭng jăp, tâm rlong njêng geh nău dơi”... Bah nê njêng suan ring lam, rgŏ jă cán bộ, nai ntĭm, nuĭh nti tâm rnglăp, blău mhe, rgâl mhe, âk trong ƀư  uĕh, nău mĭn mhe kỹ thuật dơi pơk hvi. Ta tâm nchră tâm rlong cán bộ mât bôk kan tiăr nti blău, nai ntĭm nti blău năm 2023 nhih nti hŏ geh 57 nai ntĭm blău gưl khoa, 31 cán bộ mât bôk kan blău gưl tiểu đoàn, 44 nuĭh geh nău jăp blău gưl nhih nti. Tâm năm rlău aơ, nhih nti hŏ râng nghiệm thu 01 đề tài, 02 nău blău mhe rgâl têh uĕh kỹ thuật, 03 giáo trình tài liệu gưl n’gâng kan, 01 đề tài, 01 trong blău ƀư mhe gưl Quân khu; 04 trong blău rgâl mhe kỹ thuật gưl nhih nti n’hanh dơi Quân khu dăn đă nkhôm rnê 01 du trong blău ƀư njêng mhe gưl Bộ Quốc phòng. Thiếu tá Phạm Tuấn Việt, nai ntĭm nti Khoa Binh chủng, Nhih nti tahen Quân khu 1 đah đề tài khoa học mpeh ndơ ntrŭp gân rkăng an pháo, nkoch:

“Đề tài dja mbra nkra bah dơi lĕ rngôch ăp ntŭk hôm rbăn lhơ mô hŏ sŏng găl. Rnôk mô hŏ geh ndơ ntrŭp gân rkăng tahen ân dŏng kŭk pel gay kuĭh jâng n’gân gay an gân rkăng. Rnôk mâp geh neh rhuh dŭt jêr jŏt ngăn đŏng, mông ƀư an gân rkăng roh 2 mnĭt. Rnôk dŏng đề tài ntôl mông dơn roh ntơm bah 10- 15 giây dơm”.

Gay tŏng geh an nău kan ntĭm nti mpeh pah kan Đảng, chính trị tâm nô nău mhe, Nhih nti tahen Quân khu 1 hŏ rdâk njêng ăp giáo án, giáo trình grêt dăch tĭng ăp siƀŭt ntĭm nti, tĭng ƀư tiăr nti tŏng đah nău ŭch geh mhe. Đại tá Dương Xuân Thủy, Kruanh Khoa Khoa học xã hội n’hanh Nhân văn, Nhih nti tahen Quân khu 1, an gĭt:

Nhih nti ntĭm nti pah kan Đảng pah kan chính trị nkre đah ntĭm nti ngăn ngăn, aơ lah ăp môn ma nuĭh nti jêh aơ tay mbra ƀư ngăn ngăn, năp nău gĭt blău an khân  păng. Bộ môn dja lôch nti ta nău kan bah khân păng jêh aơ tay khân păng kơt dŏng ngăn dĭl. Ntĭt kơt ta nău kan chính vị viên, bí thư chi bộ, bí thư đoàn mpôl hên năp nău gĭt blău, nău dơi ngăn ngăn khân păng ân ƀư, kơt trong ƀư du rơh sinh hoạt chi bộ, ƀư sinh hoạt đoàn druh ndăm, mô lah nău blău mpeh nău dơi nkoch trêng ri mpôl hên way ma nău kan ngăn ngăn nkre đah khân păng da dê gay khân păng kơt ƀư”.

Tĭng ƀư Nghị quyết mbrô 1657 bah Quân ủy Trung ương, Nghị quyết mbrô 20 bah Đảng ủy Quân khu mpeh rgâl mhe pah kan ntĭm nti n’hanh tŏng đah nău ŭch geh dơn kan rdâk njêng tahen tâm nô  nău mhe n’hanh n’hao săk tam tiăr nti, Nhih nti tahen Quân khu 1 hŏ tĭng ƀư âk trong nchrăp ƀư nsrôih uĕh gay ƀư lôch jêh ăp nău dơn kan dơi jao đah trong rƀŏng rdâk njêng nhih nti nâp dăng lam lĕ rngôch “ntĭt leo lor, ntoh lư” rgop tâm n’gâng kan rdâk njêng n’hanh mât njrăng neh dak Việt Nam xã hội chủ nghĩa tâm nô nău mhe. Đại tá Đào Văn Minh, Groi Hiệu trưởng Nhih nti tahen Quân khu 1, an gĭt:

Tâm rnôk ntĭm nti mô dơn mpeh nău gĭt blău tâm săk ma hôm lĕ mpeh nău gŭ dâk kon nuĭh đŏng. Ăp năm mpôl hên hăn ôp uănh săk blău ntĭm nti lôch bah nti, nti tiểu đội trưởng 3- 5 khay lôch jêh ri trong gŭ rêh pah kan uĕh lơn ăp nuĭh mô hŏ tă dơi nti. Sỹ quan dự bị bah ăp nhih pah kan dân chính Đảng lôch rnôk dơi nti ta nhih nti sĭt pah kan bah dih bah gưl nkuâl let lơ ri trong ngăch ngăr pah kan êng lơn ngăn”.

          Tâm nuih n’hâm rhơn nđơr mbah rhơn nar nkah ndray nău way ơm mpôl tahen Quân khu 1, nkah ndray, 80 năm Nar njêng tahen ƀon lan Việt Nam ntik lĕ nău dơi hŏ geh, Đảng ủy, Ban Giám hiệu Nhih nti Tahen Quân khu 1 ntrôl dăng tay ăp trong leo ƀư tâm rlong n’hao nău dơi tam pah kan ntĭm nti, ntô̆ n’hao nău way ơm rŏng dak, nuih n’hâm nsrôih ndôr êng, nsan hao êng, nđơr an lĕ nău gĭt blău suan rhal, ƀư lôch jêh uĕh nău kan dơi jao./.