Ăp bu ranh ƀon, nuĭh geh nsing nơm (tâm nê geh âk đảng viên) ta Gia Lai way lah nuĭh leo lor trong kloh ang an rgâl nău mĭn, nău kan tâm nkual rnoi mpôl đê̆. Khân păng dơi ŭanh lah ăp ndru tơm nkŭm n’hâm an ƀon lan đăp mpăn. Âk năm rlău aơ, ăp nuĭh geh nsing nơm, bu ranh ƀon lah ntung njŏ ndơ̆ ăp trong nchrăp Đảng, trong kơl, pháp luật bah Ngih dak đah ƀon lan.

Bu ranh ƀon Rơ Chăm Tích (nuĭh Jarai) ta ƀon Mook Đen 2, xã Ia Dom, nkuâl Đức Cơ, n’gor Gia Lai lah ngoăy tâm âk đảng viên ntoh lư tâm nău kan nsum đah ăp gưl ủy Đảng, n’gâng kan n’hanh ăp đơn vị gay nkoch trêng, rgŏ jă nuĭh ƀon lan mât njrăng trong n’har bri, n’gâng ntăm. Âk năm aơ păng đăp dêh hăn tât tĭng rnăk nkoch trêng, rgŏ jă kônh wa n’hao nău gĭt êng, mô nchuăt hăn rlău n’har bri; ntlơi ăp nău kan rŭn in neh ƀư mir ta nkual n’har bri; ntik uĕh nuih n’hâm tâm rnglăp, jut jăng nău way ơm rluk mâl, tâm rlong pah kan jan sa, ƀư cao su, cà phê gay wăng sa rnăk wâl hun hao. Bu ranh ƀon Rơ Chăm Tích an gĭt: Ia Dom lah xã n’har bri jêr jŏt mha êng, nuĭh rnoi mpôl đê̆ mô hŏ gĭt âk mpeh pháp luật. Nde tâm nău dja, ăp mpôl rlơn lơh tay neh dak way têk klônh, nsŭk nsôr nuĭh ƀon lan nchuăt hăn rlău n’har bri, ƀư jêng tâm rkeh rnoi nuĭh. Đah păng, đăp mpăn trong n’har bri n’gâng ntăm, mât nâp ƀư tơm rnă njrăng n’har bri neh dak lah nău kan geh nkô̆ khlay n’hanh huêng khlay.

“Mpeh rnă njrăng ta aơ dŭt đăp mpăn, mpeh pah kan n’har bri lah gâp hao ta pôih pah kan ndrel pôih, lah rsong hăn mât chăm n’gâng ntăm ta n’har bri. Ăp năm hăn đŏng, gay nkoch trêng an kônh wa mô dơi lăp tih rlău bah ri n’har bri; ƀư mir ba  neh mpeh bah he nơm. Lơn lah rơh mom ndăm mpeh nkô̆ nău tâm gŭ ur sai mô tŏng năm deh nkoch trêng âk đŏng yor trong nchrăp bah Đảng n’hanh Ngih dak mpăng, rơh mom ndăm mô dơi tâm gŭ ur sai mô hŏ tŏng năm deh”.

Wa Lê Thị Khánh Hòa, Bí thư Đảng ủy xã Ia Dom, nkuâl Đức Cơ an gĭt: Ta xã geh 4 bu ranh ƀon. Ăp bu ranh ƀon way hăn lor tâm  ăp trong leo ƀư ta ntŭk, rgop hun hao wăng sa- rêh jêng kon nuĭh, mât đăp mpăn rnă njrăng chính trị n’hanh đăp mpăn lam rêh jêng kon nuĭh ta ntŭk ƀon lan gŭ. Lơn lah, Ia Dom lah xã nkual n’har bri jêng ăp bu ranh ƀon, lah đảng viên leo lor, way ndrel ăp nhih pah kan, n’gâng kan, tahen n’har bri nkoch trêng, rgŏ jă nuĭh ƀon lan râng mât njrăng trong n’har bri, n’gâng ntăm, mât njrăng n’har bri neh dak.

“Đah xã ri ăp bu ranh ƀon, kruanh ƀon, nuĭh geh nsing nơm ta ntŭk ntik uĕh nău khlay dơn kan. Ntơm bah ndŭl deh keh na, rnăk wâl, băl  mpôl, leo lor tâm nău ƀư nđăp nsao, khĭt yot, tĭng ƀư nău rêh gĭt blău uĕh, nkoch trêng mpeh nkô̆ nău tâm gŭ ur sai mô tŏng năm deh, rgŏ jă kon se hăn nti, rvăt bảo hiểm an kônh wa ri ntơm bah nê khân păng djăt n’hanh ƀư tĭng”.

Tâm ban kơt nê đŏng, ta nkuâl n’har bri Chư Prông, ăp bu ranh ƀon, đảng viên ntô̆ n’hao dơi nău khlay kan, nău nsing nơm bah he đŏng, rgŏ jă ndŭl deh keh na, nsum mpôl lam ƀon lan râng hun hao wăng sa- rêh jêng kon nuĭh, rdâk njêng Đảng n’hanh lam trong kan chính trị; mât đăp mpăn rnă njrăng, rdâk njêng tâm rnglăp lam rnoi nuĭh. Wa Rơ Lan H’Lêk, bu ranh ƀon Klah, xã Ia Mơ, nkuâl Chư Prông an gĭt:

        “Ntŭk xã n’har bri jêng nău rgŏ jă nsum mpôl lam ƀon lan n’hanh pah kan nkoch trêng dŭt jêr jŏt yơn săk gâp nơm ƀư nău kan dja mbro gay rƀah gĭt nô nău tâm ƀon lan. Săk gâp nơm kônh wa hŏ sơch gâp ƀư bu ranh ƀon ri gâp nsrôih tay. He hôm n’hôr n’hâm lah he rhŏ dŏng tay an kônh wa gay mhâm ƀư kônh wa gĭt wât dơi trong kan pháp luật bah Đảng n’hanh Ngih dak đah nkual n’har bri, nkual rnoi mpôl đê̆”

Lam n’gor Gia Lai aƀaơ geh 955 nuĭh bu ranh ƀon, nuĭh geh nsing nơm ntoh lư tâm nkual rnoi mpôl đê̆, tâm nê geh âk đảng viên. Tâm lvang năm 2021 -2023, ăp nuĭh geh nsing nơm ntoh lư ta Gia Lai hŏ way nsrôih kan nsum ndrel n’gâng kan tâm dâng nkoch trêng, rgŏ jă ƀon lan rgop, ntop kơl trong leo ƀư “Lam ƀon lan tâm rnglăp rdâk njêng ƀon lan mhe, nkual ƀon têh ăp văn minh” đah rlău 700 rmen prăk, rong rlău 132.000 m2 neh n’hanh rgop rlău 47 rbăn nar luh kan. Bah meng nê, nuĭh nsing nơm kơl rlău 20.000 rnăk ach o ƀon lan rnoi mpôl đê̆ rgâl nău mĭn, nău kan, nsan hao klaih rlău  ach o, rgop hŭch rnoh rnăk ach o ta n’gor. Wa Hồ Văn Niên, Uỷ viên Trung ương Đảng, Bí thư Tỉnh ủy Gia Lai uănh năl: Ntô̆ n’hao nău khlay kan, nău dơn kan đah nsum mpôl lam ƀon lan, nuĭh geh nsing nơm ta Gia Lai hŏ ntik uĕh nău khlay kan bah he tâm nău rgŏ jă nsum mpôl tĭng ƀư nău dơn kan hun hao wăng sa- rêh jêng kon nuĭh, râng mât nâp đăp mpăn rnă njrăng ta ntŭk.

“Nău khlay bah nuĭh nsing nơm kơl an nău rêh bah nuĭh ƀon lan ta ăp thôn ƀon tâm ban kơt nô nău rnă njrăng chính trị, đăp mpăn lam rêh jêng kon nuĭh ta ăp thôn ƀon dơi mât nâp n’hanh ntĭk n’hao. Mât dơi săk tơm văn hóa bah tĭng ƀon lan rnoi mpôl đê̆, jêng gưl ủy n’gâng kan ta ntŭk bah nkuâl n’hanh bah n’gor mpôl hên dŭt uănh khlay đah nău kan bah bu ranh ƀon n’hanh lah nuĭh nsing nơm”./.