Lah du hê nuĭh ntoh măt bah n’gor Dak Lak dơi rnê rhơn ta Ƀư rnê rhơn kon hŏk, sinh viên, druh ndăm rnoi mpôl đêt gĭt blău, ntoh lư rơh tal 10, năm 2023, oh Đoàn Gia Hân, rnoi Tày, nti jrô 12 chuyên sinh, Ngih sam ƀŭt THPT Chuyên Nguyễn Du geh nău nti nsơm dŭt uĕh. Oh lĕ geh âk ndơ nkhôm kơt: giải Nhất gưl n’gor n’hanh giải Nhì gưl lam dak rgum tâm rlong Olympic Tiếng Anh kon hŏk-sinh viên năm 2022; lah “Kon hŏk 3 uĕh” gưl trung ương; nuĭh rmôt Kon hŏk blău lam dak môn Sinh học. Mô knŭng nti blău, Gia Hân hôm râng âk nău ƀư bah dih, nău ƀư rêh jêng kơt ăp ntrong leo Đoàn, Đội. Oh lah ủy viên Ban thường vụ Đoàn Ngih sam ƀŭt, nuĭh Ban Chủ nhiệm câu lạc bộ Tiếng Anh gưl n’gor. Đoàn Gia Hân nkoch: oh nsrôih sŏk mông nar tâm di gay dơi râng ăp nău ƀư, ntrong leo. Nkre mô rlu nsrôih nti nsơm gay năp nău nti.

          Oh ŭch nsrôih tay mât uĕh săk nơm kơt mkra du đêt nău mô hŏ blău gay dơi geh săk rnglăy uĕh gay nchrŏng trong tâm rgŏ năp dơi uĕh lơn. Tâm rgŏ năp đah môn chuyên lah sinh học ri oh ŭch jêng du hê khoa học, mĭn njêng mpeh công nghệ sinh học kơt kỹ thuật y sinh gay djôt tât ăp kỹ thuật mhe, tâm nău săm ji gay kơl an ăp nuĭh.

Đah Y Un Diễm, aƀaơ dôl nti năm 3 jrô Sư phạm Tiếng Anh, ngih sam ƀŭt Đại học Tây Nguyên, mpŏng ŭch tât ngih sam ƀŭt gay kơl oh rlet rlău ăp jêr jŏt, ntŭl rlong. Plơ̆ tay ngih sam ƀŭt gay tĭng tay nău ŭch jêh 3 năm geh tăch proăt, bu ur rnoi Triêng lĕ nsrôih nti n’hanh râng ăp nău ƀư ntrong leo, jêng “sinh viên 5 uĕh” gưl n’gor n’hanh Chi hội trưởng leo Chi hội geh ndơ nkhôm “Nsum mpôl Sinh viên 5 uĕh” gưl Trung ương. Oh dơn ƀư âk nău kan kơt Chủ nhiệm Câu lạc bộ Sinh viên 5 uĕh gưl ngih sam ƀŭt, Ủy viên Ban thư ký Hội Sinh viên Việt Nam n’gor Dak Lak. Nkre hăn nti, nkre ƀư ntĭm n’hanh ntop kơl ntĭm, Diễm geh tay nău blău ơm, geh prăk năp tâm nău rêh. Nkre, oh nchrăp ƀư du nău nchrăp ƀư êng n’hanh ŭch mbra jêng ngăn ta ƀon lan nơm tâm rgŏ năp lah mô ngai. Y Un Diễm nkoch:

Oh geh du nău nchrăp ƀư nĕ lah “djôt tiếng Anh sĭt ƀon”. Đah ăp băl lah nuĭh rnoi mpôl đêt kơt oh gŭ ta ntŭk dŭt jêr jŏt gay gĭt tât đah tiếng Anh. Jêng lah rnôk tốt nghiệp, jêh nti ri oh mpŏng oh mbra sĭt ƀon tơm nơm, sĭt kơl tay ăp băl gay ăp băl dơi geh nti tiếng Anh, dơi hăn tât ăp nkual neh mhe n’hanh nkoch trêng nău ŭch tât ăp băl, gay ăp băl geh nău mĭn nâp nâl, dơi geh nti kơt oh.

Dak Lak aƀaơ geh rlău 170 rbăn kon hŏk, sinh viên nuĭh rnoi mpôl đêt dôl tĭng nti ăp gưl phổ thông n’hanh cao đẳng, đại học. Hăn ndrel đah kon hŏk sinh viên, năm bah năp, n’gorr Dak Lak lĕ geh âk nău kơl gay ntop kơl, ntrŭt nsôr kon hŏk sinh viên hao, nta nơih n’hanh nuih n’hâm an ăp oh đăp mpăn nti. Oh H Phương Hoa Êban, sinh viên khoa Sư phạm tiếng Anh, ngih sam ƀŭt Đại học Tây Nguyên an gĭt:

Tâm rnôk nti nsơm, oh dơi gĭt ăp nău ntop kơl bah âk nău kơl bah Đảng n’hanh Ngih dak ri oh saơ nơm dơi rgum lơn tâm nău nti nsơm kơt tiăr nti. Bah meng nĕ ntoh bah nău ŭch dơi nti gay nsơr lĕ soan nơm an kon nuĭh lah nsum kơt nsum mpôl rnoi mpôl đêt bah nơm lah êng, oh dŭt ŭch nti âk lơn ăp nău blău ơm, gay dơi nsơr an nsum mpôl rnoi mpôl đêt nơm.

Ndrel đah ăp nău kơl bah Đảng n’hanh Ngih dak, đah nău ƀư ntoh măt n’hanh mât njrăng nău dơi geh tâm di bah sinh viên, Hội Sinh viên Việt Nam n’gor Dak Lak hôm uănh khlay mbơh ƀư bôk nău kan N’hao n’hâm soan Tiếng Anh n’hanh nău blău rgum lăp lam ntŭr neh an sinh viên; ndâk njêng Bôk nău rgop tâm nchră Hăn ndrel, ntop kơl n’hanh hun hao sinh viên rnoi mpôl đêt. Yuh H Giang Niê, Bí thư N’gor đoàn, Kruanh Hội sinh viên Việt Nam n’gor Dak Lak an gĭt: ăp sinh viên rnoi mpôl đêt ntoh lư mbra lah ăp nuĭh leo lor dŭt n’hâm nău ŭch nsơr soan, hun hao an rơh druh ndăm, ngăn lah đah ăp băl mom ta ƀon lan:

Mpôl hên mpŏng ŭch ăp oh mbra ƀư tơm bah ăp oh tâm nău ƀư nsum bah Đoàn, Hội; mât uĕh nău ƀư tơm lah kon hŏk, sinh viên, druh ndăm nuĭh rnoi mpôl đêt tâm nău mât ndrăy, ƀư uĕh văn hóa rnoi mpôl đet, râng rgâl mrô. Mpôl hên mpŏng rmôt aơ mbra mât uĕh tam n’hanh mbra ndrel đah N’gor đoàn, Hội sinh viên ƀư uĕh ăp rnoh an.

Đah ăp nău kơl hăn ndrel, ntop kơl, âk kon hŏk sinh viên nuĭh rnoi mpôl đêt ta Dak Lak lĕ janh, nsing nơm lơn tâm ăp nău ƀư, ntrong leo. Ăp oh nsrôih nti, năp nău wât mhe gay năp ăp nău uĕh ngăn an rgŏ năm đah nău ŭch mbra nsrr soan, nău dơi, nău blău bah nơm an nsum mpôl, ƀon lan.