Thiếu tá H’Quý Rơ Chăm pah kan tâm Rmôt nkoch trêng nau ueh-Jrâu kan Chính trị N’gâng kan rđau kan n’gor Dak Lak. Rlau 20 năm ƀư nau kan nkoch mbơh nau ueh, nau ơm, yuh hăn tât ăp ƀon nkuăl jêr jŏt bah n’gor, ŭch leo nau mprơ rgop nau kơl an kônh wa rgâl nau mĭn nau kan, n’hao nau gĭt tât nau ntrŭnh bah pháp luật bah Đảng, Ngih dak. Êp nê, đah nau ƀư Kruanh rmôt bu ur N’gâng kan rđau kan tahen n’gor Dak Lak, ntơm năm 2019 tât rnôk aơ, yuh H’Quý Rơ Chăm hŏ ntrŭnh ƀư sakư tam nau kan, kơt” Bu ur blau nau kan ngih dak, jăp nau kan rnăk vâl, “nau kan rnăk vâl tahen đăp mpan’, ndơn kơl an 3 nŭih kon bah tahen geh nau rêh jêr jŏt, râng ngăn nau kơl an tâm nau rêh tâm dâng...Thiếu tá H’Quý Rơ Chăm nkoch tât nau mhâm ƀư ân jêh nau kan bah nơm:

‘Tĭng ăp rnôk, kơt lah rnôk ma rmôt hên dôl geh nau kan têh, ăp nau kan ân ƀư âk, gâp ndăn pah tay tâm mông rlu tâm nar rlu, gay mhâm ƀư nau kan bah nơm ân geh ƀư ueh ngăn đah nau kan ndrel ăp nau ma ntop đŏng. Rnôk sĭt tâm ngoh, gâp nsôih ƀư ân jêh nau dơi bah nŭih Me, nŭih bur tâm rnăk nơm đŏng”.

Hôm yuh Trần Thị Hải Yến, Bí thư Đảng uỷ, Chính trị viên Rnâng kan rđau tahen nkuăl têh Quảng Phú, nkuăl Cư M’gar, nau ƀa ƀơ kơt tĭng nti nau mhe ndrel nau kan hŏ kơl an yuh 5 năm mro geh dơi nkhôm cán bộ ntĭm nti chính trị loại giỏi tâm n’gor Dak Lak. Năm 2023, yuh tâng nau tâm rlong lam tahen chính trị viên glau yor N’gâng kan neh dak ƀư ndrel geh giải khuyến khích. Yuh Trần Thị Hải Yến, nkoch:

‘Bah năp nơh, gâp kan tâm Jrâu kan Tư pháp ndrel hŏ ƀư âk ngăn nau hăn nkoch trêng tâm ăp thôn, ƀon tâm nkuăl mpeh nau kan pháp luật. Rnôk pah kan tâm Ban Pháp chế HĐND nkual, kŏ tă ƀư nau kan mêt uănh nau kan săch lăp tahen hŏ mĭn rjăp nau ntrŭnh tâm ntŭk kan aơ, ri ma rnôk leo hăn kan tâm dâng, pah kan ntĭm nti chính trị ân tahen mô geh nau jêr. Hôm đah nau ntrŭnh ƀư nau kan neh dak, ri nau nsôih bah nơm nkre ƀư nau kan, nkre nti, kŏ ân ƀư tâm ban nau kan geh jao”.

Nkre nsôih blau nau kan ngih dak, lĕ ma H’Quý Rơ Chăm ndrel yuh Hải Yến kŏ geh dơi ueh nau kan tâm rnăk vâl, mât ân rnăk vâl mro đăp mpăn. Nô Lê Ngọc Nghĩa, sai yuh Hải Yến mbơh, gĭt nau kan bah ur, ri ma nô mra kơl an nau kan tâm rnăk vâl:

‘Ăp rnôk ur gâp geh nau kan ndal, mô lah hăn kan ngai, nơm ân ndơn gay ma mât chăm, răk rong oh kon. Bonh đă ăp kon kơt me nơm gay ma ntĭm nti oh kon, yor me lah nŭih leo trong pah kan ueh, geh kan tam. Âk rnôk kŏ mbơh nau rhơn kơt ân ăp kon, ân jêh aơ kon nơm khân păng geh nau nsôih gay ma ƀư ân dơi kơt me nơm đŏng”.

Nkoch tât ăp đồng chí H’Quý Rơ Chăm ndrel Trần Thị Hải Yến, Đại tá Trần Minh Trọng-Chính uỷ N’gâng kan rđau tahen n’gor Dak Lak mbơh, aơ lah ăp nŭih blau nau tâm rlong nsôih geh nau dơi tâm rơh rlau aơ:

‘Ăp đồng chí H’Quý Rơ Chăm ndrel Trần Thị Hải Yến ngăn ngên lah ăp nŭih blau ngăn tâm nau kan tâm rlong nsôih geh nau dơi bah rmôt tahen n’gor lvang năm 2019-2024. Ơ ngăn lah ăp “nkau ueh” tâm mir nkao tâm rlong bah rmôt tahen tâm n’gor, mra njêng n’hâm rêng ndrel nkoch nau ŭch kơt ân cán bộ, tahen, kŏ kơt lah ăp nŭih bu ur tâm rmôt tahen bah n’gor Dak Lak”.

Đại tá Trần Minh Trọng lah rjăp, kơt tĭng nau ntĭm bah Wa Hồ: ‘Tâm rlong lah rŏng dak, rŏng dak ri ân tâm rlong. Nŭih tâm rlong lah ăp nŭih rŏng dak ngăn”, ăp năm rlau aơ, nau kan tâm rlong nsôih geh nau dơi tâm rmôt tâm rlong bah n’gor Dak Lak hŏ rêng lơn ma jru. Ntơm nau kan, hŏ saơ geh âk jêt nŭih, rmôt kan blau, âk nau kan ueh, nau kan mhe, rgop nau ndâk rmôt tahen n’gor Dak Lak nar lơn geh nau nâp, nau blau, tŏng dơi ăp nau đă nau kan tâm rnôk mhe./.