Jêh nau khuch Bŏ khĭt ơm, Me nchlơi êng oh A Ứng, rnoi Jrai, ƀon Grập, xã n’har bri Mô Rai, nkuăl Sa Thầy, n’gor Kon Tum geh cán bộ, tahen Đồn Biên phòng Mô Rai leo nsĭt rong. Rlau 4 năm, rnôk aơ A Ứng hŏ nti jrâu 7 ndrel mơng ma nau rêh, nau gŭ bah Đồn Biên phòng. A Ứng kŏ ƀư tĭng 11 nau nchâp tâm nar ndrel 3 nau kan tâm pơh kơt lah du hê tahen. Ntơm bah kon se vay prêng, rnôk aơ geh cán bộ, tahen Biên phòng Mô Rai kơl an, bonh đă, A Ứng lơn nar lơn janh oi:

            ‘Ăp nar ri ăp kônh kơl an âk ngăn, ăp kônh n’gon piăng ân gâp sông. Lôch sông ri gâp hăn nti săm ƀŭt. Mông ru ri kơl mpih jrâu bĭch, kơl ăp kônh pah kan. Gâp ŭch nti môn Toán, jêh aơ gâp ŭch ƀư tahen kơt ăp kônh gay ma mât nkuăl n’har bri”.

            Lah nŭih geh Rđau kan tahen Biên Phòng Mô Rai jao nau kan ăp nar hăn vơt, ntĭm, nti ân A Ứng nti, Trung uý Hoàng Như Thanh, Kruanh rmôt vũ trang mbơh: A Ứng geh nau gĭt ngăn, gơih nti đŏng. Gay ƀư jêh nau kan bah Bŏ jao,

Trung uý Hoàng Như Thanh hŏ geh kơt tĭng nti gay ma geh nau gĭt tay nau blau răk rong kon:

            ‘Gâp ri mhe lôch nti rnôk 23 năm, ê mâp ƀư Bŏ kon se ôh, ri ma ê gĭt tât, yơn ma nau kan, nau đă nơm gay ma kơl an mom ri gâp kŏ nsôih đŏng. Gâp nsôih kơt nti, joi ăp nau kan mpeh nau ntĭm nti kon se ntơm bah rnôk kon se. Tât moh rnôk, moh rơh ân geh moh nau ntĭm nti ân mom moh nau ri gâp nsôih joi, tâm rgop ma ăp nar tâm tahen kŏ geh ăp nô, ăp kônh kơl mbơh ntĭm”.

            Tât rnôk aơ, geh 14 ntŭk tahen Biên phòng ta Kon Tum ndơn 14 kon se rong. Ăp mon lah kon se rêh kon đơi, geh nau rêh jêr jŏt ngăn. Đah ăp kon se geh nau rêh jêr, nsôih nti, ƀư ueh bôk nau kan “N’hao nhoat jâng kon se hăn nti” cán bộ, tahen Biên phòng Kon Tum hŏndơn kơl an 75 kon se, ăp khay kơl an du mom 500 rbăn.

            Ndrel ma nau kan “N’hao nhoat jâng ân kon se hăn nti-Kon rong đồn Biên phong” tâm ăp năm rlau aơ, tahen Biên phòng Kon Tum hôm kơl an âk ngăn kon se tâm 13 xã n’har bri bah n’gor nsih nau ŭch bah nơm tât hăn nti bah nau kơl an năn ndrel ăp nau kan n’hêl.

Yuh Y Ly, rnoi B’râu, ngih tâm ƀon Đăk Mế, xã Pờ Y, nkuăl Ngọc Hồi, mbơh, lah mô geh nau kơl an bah Đồn Biên phòng mpông đah dak ba dih Bờ Y, kon yuh moh lah Y Uyên dôl nti jrâu 8 mô geh hăn nti ôh.

            ‘Ăp nô kơl an prăk hăn nti ân ăp mom, đah ma prăk ngêt sa, prăk phe, ba ăp nô rvăt ân đŏng. Rnăk hên dŭt n’hâm lah ueh. Bar hê ur sai hân kŏ đă kon hăn nti ân ueh, gay mô geh nau khuch tât nuih n’hâm kơl an bah ăp nô hŏ kơl”.

            Ntơm bah nau kơl an bah ăp cán bộ, tahen Biên phòng Kon Tum, ăp kon se lah kon rong đồn biên phòng, tâm bôk nau kan “N’hao nhoat jâng ăp oh hăn nti” mô lah geh nau rêh jêr jŏt kŏ geh nau nsôih gơih nti ndrel gĭ blau, geh nau nsôih tâm nau hăn nti. Tâm lôch ăp năm rlau aơ, ndrel ma nau mât nkuăl n’har bri bah neh dak jong rlau 292km tâm dăch ma dak băl Lào ndrel Campuchia, rmôt tahen biên phòng Kon Tum hôm geh nau rgop khlay đah nau kan “tăm nŭih” tâm nkuăl n’har bri./.