Ôi lơ 7/9/2023, Thủ tướng Chính phủ Phạm Minh Chính ndrel đah nuĭh leo kan ăp dak ASEAN n’hanh ăp dak kan ndrel an geh tât râng rơh rƀŭn nchră gâl têh ASEAN- Ấn Độ tal 20 n’hanh rơh rƀŭn nchră gâl têh Đông Á (EAS) tal 18. Ta rơh rƀŭn nchră gâl têh ASEAN- Ấn Độ tal 20, ăp ding n’hao nău tâm boh kan ndrel lĕ rngôch njêng năm 2022.

Thủ tướng Ấn Độ Narendra Modi lah na nê̆ ASEAN lah jrŏng tơm tâm nău kơl pah kan Hướng Đông n’hanh lah nău tơm khlăy  tâm nău mĭn kan Ấn Độ Dương  - Thái Bình Dương bâh Ấn Độ. ASEAN n’hanh Ấn Độ tâm ban rgum an lor mpeh nău tâm kơl kan nâp nâl, wăng sa ta dak lêng ueh nđir, njrăng ƀư rlăng, nuĭh tih rgŏ ngih dak, n’hao nău dơi kan mpeh dak si, ntrôl tâm rgop kan, dŏng khoa học công nghệ, rgâl mhe rnoh mbrô, nkre lah pơk hvi nău tâm kơl kan rgâl mhe ŭnh nar, tâm rdâng đah rgâl trôk nar mih sial. Thủ tướng Ấn Độ mbơh njêng ntŭk tâm rgop kơl ASEAN - Ấn Độ yor nău rêh rnoh mbrô. Ta rơh rƀŭn nchră gâl têh ASEAN Đông Á tal 18 (EAS-18), ăp ntŭk kan ndrel ton kơl nău kan ƀư tơm bâh ASEAN, ndrel rdâk njêng nău kan ta nkual pơk, kloh rjăp, lĕ rngôch n’hanh knơm ta luật pháp lam ntur neh n’hanh Hiến Chương LHQ.