VOV4.M’nông:  Ta nkuăl Nam Trà My, n’gor Quảng Nam, geh du nkual bri brah dơi nuĭh ƀon lan nkual prêh kuăl săk “Ntŭk bri wa Năm Công”. Ntŭk aơ tă lah ntŭk Liên khu ủy 5, đah nău rđău bah Bí thư Liên khu ủy 5 Võ Chí Công lĕ jêng ntŭk lịch sử tâm lvang tâm lơh tâm su mprơh Mỹ (1959-1964), ƀư tĭng lơh dơi bôk năp mpeh Trong hăn bah Cách mạng miền Nam tâm ăp năm 1960. Nkah gĭt n’hâm soan bah wa Võ Chí Công, ƀon lan rnoi đêt ntŭk aơ ndrel soan mât njrăng bri aơ, mât ndrăy ndơ ơm kăl e tâm ăp năm khay tâm lơh tâm su hô ngăn.

          Tât nkuăl nkual prêh Nam Trà My, n’gor Quảng Nam, âk nuĭh mô bah ndrăt rnôk tât ta nkuăl lŏ geh du nkual bri krŏng têh 30 ha, dơi mât ndrăy bơi kơt nâm ơm. Bah mpông pêr nkual Di tích lịch sử Quốc gia Liên khu ủy 5 n’hanh Ban Quân sự khu 5 hăn jâng rlău 30 mnĭt trong yôk tât ntŭk ƀư brah Kruanh hội đồng Ngih dak Võ Chí Công, saơ bah năp măt âk tơm si têh rlău du rhiăng năm, têh bah 4 tât 5 nuĭh ut mô lôch. Nkual bri aơ tă nking n’gang cán bộ, tahen Liên khu ủy 5 tâm lvang hô ngăn tâm lơh mprơh Mỹ. Yuh Hồ Thị Hạ, ta thôn 2 xă Trà Mai, nkuăl Nam Trà My, n’gor Quảng Nam an gĭt, bah rnôk jêt, ăp rơh hăn “bri wa Năm Công”, yuh dơi mê̆ bơ̆ ntĭnh na nê̆ mô dơi muih kăl du ntil tơm si têh jêt. Mô hŏ geh tât ăp nău ntrŭnh pháp luật mpeh mât njrăng bri, ăp rơh kơn nuĭh ƀon lan Nam Trà My tâm nkoch nău kan mât njrăng nkual bri aơ.

“Bri aơ lah bri bah wa Năm Công, bu mô sreh kăl jêng he mô sreh kăl, mô geh nuĭh lăp tâm bri ma mô janh djôt pêh, djôt yêh. Mpôl hên knŭng hăn joi biăp dơm mô janh phah bri, mô janh sreh tơm si đŏng”.

Nkual bri tam dơi nuĭh ƀon lan nkual prêh kuăl đah săk “Nkual bri wa Năm Công” têh 30 ha.

Năm 1959, nkual yôk Nước Là ta xă Trà Mai, nkuăl Nam Trà My dơi Liên Khu ủy 5 n’hanh ban Quân sự Liên khu 5 săch ƀư ntŭk bôk năp đah săk kuăl Mật khu Đỗ Xá. Rnôk nĕ, đồng chí Võ Chí Công-Bí thư Liên khu ủy 5 sĭt rêh ta aơ gay ntĭm rđău cách mạng. Bí thư Liên khu ủy 5 lĕ ntĭm rđău cán bộ, tahen n’hanh rgŏ jă ƀon lan phah rseh loih, pơk hvi nkual yôk, ntrôl dăng nău kan jŭr dâng rđŭng, ntop kơl rmôt tahen, pơk hvi trong kan. Đah nău rđău bah wa Võ Chí Công, tahen n’hanh ƀon lan Liên khu ủy 5 lĕ ƀư dơi Nghị quyết 15 (1959) bah Ban chấp hành Trung ương Đảng khóa 2, rgop pơk trong an rơh lơh rklaih đăp mpăn miền Nam, kơp dơn ngoăy neh dak.

Wa Hồ Văn Ni, Tă ƀư Kruanh UBND nkuăl Nam Trà My, tă geh năm tâm lơh đah nău rđău bah Bí thư Liên khu 5 Võ Chí Công nkah gĭt tay, ăp năm khay tâm lơh ta ntŭk Nước Là, đồng chí Võ Chí Công, rnôk aƀaơ moh săk Võ Toàn, ndrel đah nău njêng ndrel ƀon lan, dơi ƀon lan ăp rnoi mpôl ŭch, mât rgum. Wa Hồ Văn Ni nkoch tay: Đồng chí Võ Chí Công ƀa ƀơ hăn bah dâng rgŏ jă ntop hao pah kan jan sa đah nuĭh ƀon lan, tŏng ăp nău kơl nâp nâl rhŏ an tâm lơh tâm su.

“Bri aơ lah ntŭk wa Năm Công tă gŭ rêh ta aơ gay rgŏ jă kônh wa râng cách mạng, jêng ăp rơh tât đah Di tích Liên khu ủy 5 ri ăp nuĭh nkah gĭt wa Năm Công, nkah gĭt nkual bri wa Công. Bah rnôk nkhah êng nkuăl Trà My, mpôl hên tât ntĭm rđău, rgŏ jă kônh wa mô dơi phah bri, mô dơi ƀư mir. Nkre mât njrăng bri, nkre mât nâm ơm di tích aơ gay kon sau nkah gĭt đah lịch sử”.

Kruanh Hội đồng Ngih dak Võ Chí Công tâm du rơh sĭt khâl nuĭh ƀon lan nkuăl Nam Trà My, n’gor Quảng Nam.

Bah kơi năm 1964, nkual rklaih đăp mpăn dơi pơk hvi, Khu ủy khu 5 trơn bah dâng nkual Nước Oa, xă Trà Tân, nkuăl Bắc Trà My, n’gor Quảng Nam yơn nkual bri wa Năm Công hôm de dơi nuĭh ƀon lan Nam Trà My mât, njrăng. Năm 2003, nkuăl Nam Trà My đă N’gâng kan Văn hóa-thể thao n’hanh pâl nđaih kơp dơn Di tích lịch sử Khu ủy n’hanh Ban Quân sự khu 5 jêng nkual di tích lịch sử ngih dak. Tĭng wa Nguyễn Văn Cẩn, Kruanh Ban Tuyên giáo nkuăl ủy Nam Trà Mỹ, bah nkual bri wa Năm Công, Nuĭh ƀon lan Nam Trà My lơ dơi wât nău khlay bah mât njrăng bri. Tât aƀaơ, dĭng lĕ rnoh neh bri ơm bah Nam Trà My rlău 43 rbăn ha, geh rlău 62% dĭng lĕ rnoh neh bri bah nkuăl.

“Kônh wa saơ dơi mât bri wa Năm Công hôm e nâm ơm kơt nĕ lĕ dơi mât uănh ntŭk ntô bri bah lĕ nkuăl Nam Trà My. Aƀaơ mpôl hên pơk hvi lĕ rngôch ăp xă êng mât nâp ntŭk ntô bri yor rĭ nkuăl Nam Trà My dơi hun hao tơm sâm Ngọc Linh”.

Nkual Bri dơi mât rƀăy bơi kơt nâm ơm.

Tâm rnôk hôm e rêh, Kruanh Hội đồng Ngih dak Võ Chí Công rvê mro đah nău rêh bah kônh wa ăp rnoi mpôl đêt ntŭk chiến khu kăl e. Tâm lơh tâm su lĕ rŭch ngai bơi n’gul rach năm, ăp lôk bri krŏng nking n’gang tahen, mât mpôn cán bộ cách mạng aƀaơ hôm e dơi mât, nău rêh nuĭh ƀon lan nkual yôk lĕ hao âk knơm tăm ăp ntil dak si ta nâm bri. Wa Nguyễn Thanh Hồng, Kruanh N’gâng kan Văn hóa, Thể thao n’hanh Pâl nđaih n’gor Quảng Nam an gĭt, nkuăl mbra sŏk ntrong kan mât uănh bri, mât ndrăy nkual bri wa Năm Công ƀư ntrong leo gay pơk hvi ăp ntŭk nkual yôk n’gor Quảng Nam.

Nuĭh rlang: Y Sưng Phê Ja