Nar ntri (30/8), ta nkual ƀon têh Pleiku, Văn phòng rnâng kan Ban rđău đă gưl neh dak mpeh njrăng n’gang tăch ntŭng ndơ, mplư rlăm tăch rgâl n’hanh ndơ rlăm mô nâp uĕh ƀư tâm nchră giao ban pah kan đah ăp n’gor Tây Nguyên.

Lah ta rnôk n’glôch jêh tâm nchră, wa Trịnh Mạnh Cường- Groi Chánh Văn phòng Rnâng kan Ban rđău đă 389 gưl neh dak năl lah, ăp khay kêng dŭt năm 2023, nău ŭch ƀư njêng, dŏng sa tâm rnôk lễ, Tết hao âk, ndrel đah tâm lĭn lơ rnoh khlay ndơ tăch đah ăp dak tâm nkual, tâm lam dak hôm âk, jêng dơh geh mô tŏng ndơ tăch êng tĭng du đêt ntil ndơ dŏng, jêng geh tât hao rnoh khlay, jêng dơh tât nău tăch ntŭng ndơ, mplư rlăm ndơ tăch n’hanh ndơ mô nâp uĕh mbra geh krit hô. Wa Cường dăn đă Ban rđău đă 389 ăp n’gor Tây Nguyên rgum pah kan njrăng n’gang tăch ntŭng, mplư rlăm ndơ tăch n’hanh ndơ mô nâp uĕh ta ăp trong n’har bri n’hanh tâm trôm nkual; rgum tâm ăp ntil ndơ tăch kơt phân poh, dak si mât njrăng si tăm, loih kông, pháo rtoh, pring xăng; n’hao dăng rdâng lơh tăch ntŭng, mplư rlăm ndơ tăch n’hanh ndơ mô nâp uĕh tâm nău kan tăch rgâl điện tử.