Ôi 6/9, ta hội trường Dinh Độc Lập, Kruanh dak Võ Văn Thưởng râng bôk nău kan tâm mâp n’hanh mpư rnê ăp rơh kơn druh ndăm hăn râng êng, rnăk mât ntoh lư nkah ndray 30 năm ăp bôk nău  kan, trong hăn kơl êng khay rlu nti bah druh ndăm nkual ƀon têh Hồ Chí Minh.

Năm 2023 hŏ ntơm nkah ndray 30 năm ăp bôk nău kan, trong hăn kơl êng khay rlu nti druh ndăm nkual ƀon têh Hồ Chí Minh (1994 - 2023), lah rjăp nău khlay têh kuâng bah trong leo hăn kơl êng bah mpôl kan Đoàn, Hội nkual ƀon têh hŏ ƀư n’hanh rgum âk mpưm đoàn viên, druh ndăm ndrel râng. Lah ta rơh mâp măt, Kruanh dak lah rjăp, ăp nău kan dja hŏ kơl druh ndăm ntrăm săk he tâm nău ngăn geh bah nău rêh, gĭt wât tay mpeh neh dak, n’gâng kan rnoi nuĭh, ntơm bah nê druh ndăm mbra geh nău kan di đah n’gâng kan ma Đảng n’hanh lam nău rêh dôl tĭng. Rlău 30 năm ăp bôk nău kan, trong kơl êng khay rlu nti bah druh ndăm nkual ƀon têh Hồ Chí Minh hŏ wăch rgum 5 rkeh druh ndăm râng kơl êng.