Kêng măng 26/7, tâm nău rngot n’hanh dŭt nkah klâng, Ban Chấp hành Trung ương Đảng Cộng sản Việt Nam, Quốc hội dak Cộng hoà xã hội chủ nghĩa Việt Nam, Kruanh dak Cộng hoà xã hội chủ nghĩa Việt Nam, Chính phủ dak Cộng hoà xã hội chủ nghĩa Việt Nam, Uỷ Ban Trung ương Mặt trận Tổ quốc Việt Nam ƀư rgum nkah tay du bông nău kan, lễ tung băng n’hanh tâp bôr wa  Nguyễn Phú Trọng, Tổng Bí thư Ban Chấp hành Trung ương Đảng Cộng sản Việt Nam, tĭng nău ƀư nar wer lam dak.

Di 1h kêng măng, ƀư nkah tay du bông nău kan Tổng Bí thư Nguyễn Phú Trọng dơi ƀư rgum ta Jay njor khĭt gưl neh dak mbrô 5 Trần Thánh Tông, Hà Nội. Lôch goh nău mprơ Việt Nam dơi đă hao goh huêng khlay, Kruanh dak Tô Lâm ntơh măt kruanh rđău kan Đảng, Ngih dak rŏ siƀŭt nkah gĭt Tổng Bí Nguyễn Phú Trọng. Kruanh dak Tô Lâm nkah tay du bông nău rêh n’hanh du njăr trong kan cách mạng bah Tổng Bí thư Nguyễn Phú Trọng, lah rjăp, bơi 60 năm kan cách mạng âk mpưm, nâp dăng, Giáo sư, Tiến sĩ, Tổng Bí thư Nguyễn Phú Trọng đah bôk rngok wên rbăn, sôt hơr hŏ ntlơi an tay lam Đảng, lam ƀon lan, lam tahen he du rêng nău mĭn n’hanh lý luận khlay mpeh gung trong cách mạng Việt Nam tâm rơh mhe.

Rôih sŏng, kơt dŏng blău mhe chủ nghĩa Mác - Lênin, nău mĭn Hồ Chí Minh, đah nău ŭch đăp mpăn rnoi nuĭh n’hanh chủ nghĩa xã hội, nuĭh rƀŏng trong mĭn Nguyễn Phú Trọng, chông cờ lý luận bah Đảng hŏ ƀư sol kloh lý luận mpeh chủ nghĩa xã hội n’hanh gung trong hao chủ nghĩa xã hội ta Việt Nam, mpeh nău khlay  kan bah Đảng Cộng sản, mpeh wăng sa ntŭk tăch rgâl rƀŏng tât xã hội chủ nghĩa... Drăp ndơ ntlơi an tay dŭt khlay nê hŏ rdâk tay nău nsing nơm rđău kan lĕ n’hâm suan dăng mpeh gung trong hao tât chủ nghĩa xã hội, rgop khlay an nău hun hao bah trong leo kan cộng sản lam ntŭr neh, hun hao chủ nghĩa Mác - Lênin, nău mĭn Hồ Chí Minh tâm rơh aƀaơ.

Kruanh dak lah rjăp: Ntĭnh n’glơ̆ n’glơi Tổng bí thư, lam Đảng, lam ƀon lan, lam tahen du nuih n’hâm tĭng ƀư nău ŭch rŏng bah Wa, lĕ nuih n’hâm, lĕ brăt suan rhŏ dŏng an neh dak, rhŏ dŏng an ƀon  lan, tĭng ƀư geh nău dơi rnoh tât rdâk njêng neh dak Việt Nam bah tâm lơh tâm su, đăp mpăn, dơn ngoăy, geh nău tâm ban, têh ndrŏng, rsang rnglăy gĭt blău, rhơn răm .

Di rnôk du mông 30 mnĭt, nau leo ntrơn tâp geh ntơm ƀư. Kruanh dak Tô Lâm, Thủ tướng Chính phủ Phạm Minh Chính, Kruanh Quốc hội Trần Thanh Mẫn, Rnâng kan Ban Bí thư Lương Cường ndrel âk đồng chí rđau kan ơm, mhe bah Đảng, Ngih dak, rđau kan ăp dak hŏ ryơk, hăn bar ding săk Tổng Bí thư Nguyễn Phú Trọng, leo đồng chí tât ntŭk dŭt lôch tâm ntŭk môch Mai Dịch, Hà Nội. Di rnôk 3h kêng măng naơ neu leo tâp Tổng Bí thư Nguyễn Phú Trọng geh ƀư tâm ntŭk tâp Mai Dịch, Hà Nội.

Tâm nau rngot nklâng dŭt n’hâm, ntoh măt Rnâng kan ƀư ăp nau kan rnôk tâp ndrel rnăk vâl đồng chí Tổng Bí thư Nguyễn Phú Trọng, đồng chí Lương Cường, Uỷ viên Bộ Chính trị, Rnâng kan Ban Bí thư, Kruanh Rnâng kan ƀư nau tâm rnôk leo tâp hŏ geh nau ntoh nau lah ueh tât ăp ntoh măt ndrel ƀon lan: “Ntoh măt Rnâng kan ƀư nau kan leo tâp rnôk aơ ndrel rnăk vâl đồng chí Nguyễn Phú Trọng, gâp dăn lah ueh tât ăp đồng chí rđau kan ơm, rđau kan mhe bah Đảng, Ngih dak, Mặt trận Tổ quốc Việt Nam; ăp dồng chí ntoh măt lah bu năch khlay ndrel kônh wa, đồng chí tâm lam dak, ăp rmôt kan tahen, ăp nŭih ƀư ăp nau kan têh, blau, rđau kan rmôt ntoh, ăp rmôt kan nchră nau, ntoh măt ăp ntŭk kan bah dak ba dih tât chang, njoăl kao, điện pă nau rngot, râng nau lăp chang ndrel leo đồng chí Nguyễn Phú Trọng, Tổng bí thư Rnâng kan rđau kan Trung ương Đảng Cộng sản Việt Nam tât ntŭk dŭt lôch”.