Rgum nkah klâng du bông nău rêh nău kan Tổng Bí thư Nguyễn Phú Trọng dơi ƀư rnôk 1h  kêng măng nar 26/7 ta Jay njor khĭt gưl neh dak mbrô 5 Trần Thánh Tông (Hà Nội); ƀư ndrel mông nê ta Hội trường Thống Nhất (nkual ƀon têh Hồ Chí Minh) n’hanh ta ƀon tơm xã Đông Hội, nkuâl Đông Anh (Hà Nội) đŏng. Tâm mông huêng khlay n’hanh rngot klâng, quân nhạc hŏ đă Quốc thiều gay goh ntĭnh n’glơ̆ n’glơi Tổng Bí thư Nguyễn Phú Trọng – Kruanh rđău kan dŭt prăl mha êng, du bông nău rêh an neh dak an ƀon lan. Đah nău rngot n’hanh dŭt n’hâm nkah klâng, Ủy viên Bộ Chính trị, Kruanh dak Tô Lâm, Kruanh Ban Lễ tang rŏ siƀŭt nkoch kloh: Wa roh lah du nău roh yot têh, mô dơi săp bêng bah Đảng he, rnoi nuĭh he,  ƀon lan he.

Neh dak he roh du hê kruanh rđău kan ngăch prăl hăr blău; trong leo ƀư cộng sản, rgâl mhe lam ntŭr neh roh du hê nuĭh lý luận sôt hơr; băl mpôl dak bah dih roh du hê băl, du hê ndrăng băl dêh bên; rnăk wâl, rnoi deh, ƀon  tơm Đông Hội roh du hê nuĭh kon ntoh lư gĭt blău. Drăp ndơ ntlơi an tay bah wa Tổng Bí thư Nguyễn Phú Trọng mbra rêh mbro tâm lịch sử Việt Nam, mbra dơi nđơn tay n’hanh ntik n’hao lơn đŏng tâm rơh rgâl mhe; tĭng ƀư geh nău dơi rnoh tât rdâk  njêng neh dak Việt Nam bah tâm lơh  tâm su, đăp mpăn, dơn ngoăy, geh nău tâm ban, geh ndrŏng, rsang rnglăy, rhơn răm ma du bông nău rêh wa mĭn rvê, n’groh an.