Hôm du pơh tay đŏng lah Lễ hội cà phê Buôn Ma Thuột tâl 8 năm 2023 mbra ntơm pơk. Pah kan nchrăp dôl ƀư ndăn ngăch, gay nsĭt tay ăp nar Lễ hội săk tơm cà phê, rƀŏng ndơ̆ Buôn Ma Thuột n'hanh Dak Lak jêng ntŭk rgum tât bah cà phê lam ntŭr neh.

Nkual pâl nđaih bri dak nsum mpôl Ko Tam, ta xã Ea Tu, nkual ƀon têh Buôn Ma Thuột mbra lah ntŭk ƀư tâm rlong ƀư trah mon rup si ma n'gu  tơm cà phê. Aƀaơ, đơn vị dja dôl ƀư lôch jêh ăp nău kan n'glĕ dŭt gay nchrăp drăp ndơ du trong dŭt uĕh an rơh Tâm rlong tâm ban kơt tŏng an nău ŭch geh ntŭk hăn uănh pâl, rlu rlău bah năch rnôk hăn tât ta aơ. Wa Nguyễn Thị Ngọc Anh, Giám đốc nkual pâl nđail nsum mpôl Ko Tam an gĭt:

       "Mpôl hên mô dơn nchrăp way nkô̆ mpeh trah mon rup si ma mpôl hên hôm nchră rup uĕh, jay rlu rlău, manh gŭ nde đŏng. Aƀaơ mpôl hên dôl ndăn ƀư lôch jêh ngăch 10 mblâm jay manh gŭ bĭch măng gay n'hao lĕ rngôch rnoh âk lah 26 mblâm jay, lĕ rngôch ăp ntung trong mpôl hên hŏ kơi ƀư tay n'hanh nchrăp ăp ndơ ƀư n'hanh nchrăp ăp bôk nău kan ntơm pơk bah  rơh Tâm rlong gay ƀư an Rơh tâm rlong tâm di nău têh bah n'gor, rgop nkah uĕh an năch rnôk hăn tât pâl nđaih ta n'gor Dak Lak".

        Ntŭk rgum pâl nđaih cầu treo Buôn Đôn dôl nkra uĕh tay đŏng, nchrăp wơt năch. Lơn lah, bah năp mper Lễ hội cà phê năm aơ, Ntŭk rgum pâl rlu an ncho rveh gay mât ndray rveh  ƀon. Rgâl tâm nê, ƀư leo hăn pâl nđaih dêh bên đah rveh, lĕ ma ăp rlong uănh saơ uĕh kơt: năch mbra dơi hăn tât ntŭk uănh saơ na nê̆, joi gĭt mpeh rveh, chup rup ndrel rveh, an rveh sa...ndrel đah nê năch hôm dơi rlong ƀư ăp rhŏ ƀư hăn nkưp nde manh gŭ măng ta ƀon gôl dak, su ŭnh mpôi, ƀư tŭr chĭng goh gong, rlong sa ndơ kah khlay ta bri an năch hăn pâl nđaih đŏng ....

        Wa Trần Thị Kim Ánh, Giám đốc ntŭk kan pâl nđaih n'hanh khách sạn Biệt Điện, đơn vị tơm mât dŏng nkual pâl nđaih cầu treo Buôn Đôn an gĭt, tât aƀaơ 50 jrô bĭch bah Khách sạn Biệt Điện hŏ dăn gŭ lĕ. Pah kan nchrăp an ăp nău kan ta nkual pâl nđaih cầu treo Buôn Đôn hŏ đăp mpăn. Nău đăp mpăn mât kloh uĕh ndơ ngêt sa n'hanh đăp mpăn rnă njrăng dơi ntŭk kan uănh khlay đŏng:

        "Ntŭk kan mpôl hên dŭt uănh khlay tât pah kan mât đăp mpăn kloh uĕh ndơ sa n'hanh mât đăp mpăn ăp ntil nău an năch đŏng. Tâm nkô̆ nău đăp mpăn kloh uĕh ndơ ngêt sa mpôl hên hŏ sơch ăp nuĭh tơm  pă an nsing nơm, geh săk lư, ndơ tăch geh tơm luh kloh rvah gay đăp mpăn kloh uĕh ndơ ngêt sa an năch. Đah rhŏ dŏng an nănh manh gŭ rlu măng ri tâm rnôk Lễ hội pâl nđaih cầu treo Buôn Đôn ri mpôl hên manh tay nuĭh mât njrăng gay đăp mpăn rnă njrăng an năch đŏng".

        Nkual ƀon têh Buôn Ma Thuột lah ntŭk ƀư tơm ăp nău kan bah lễ hội. Nchrăp, aơ mbra lah ntŭk wơt âk năch pâl nđaih. Lah ngoăy tâm ăp khách sạn 4 sao bah n'gor, khách sạn Elephants (phường Thắng Lợi) hŏ lĕ jrô bĭch bah nar 9 tât 11/3. Ăp nar bah kơi nê, rnoh năch dăn jrô bĭch hŏ âk tât 90%. Wa Lê Văn Đức, Giám đốc Khách sạn Elephants an gĭt, aƀaơ đơn vị hŏ ƀư lôch jêh ăp nău kan dŭt jê̆ gay năch pâl nđaih di nuih n'hâm rnôk hăn tât đah Lễ hội cà phê Buôn Ma Thuột:

        "Khách sạn Elephants hŏ nchrăp ăp tŏng lĕ rngôch ăp ndơ rhŏ dŏng, ăp ndơ rvăt năp hŏ ăp dăp đŏng, ăp ntŭk ntô ndơ dŏng ri lĕ rngôch ndrăp tay lĕ rngôch an păng kloh uĕh, đăp mpăn pah kan njrăng n'gang puh n'hât ŭnh sa, đăp mpăn mât kloh uĕh ndơ ngêt sa. Trenning tay lĕ  rngôch oh nô mpeh rêng rhŏ dŏng. Khách sạn ton lah mô n'hao rnoh khlay đŏng".

        Tĭng wa Nguyễn Thụy Phương Hiếu, Groi Giám đốc Sở Văn hóa, thể thao n'hanh pâl nđaih n'gor Dak Lak, nchrăp, lễ hội rơh dja wăch rgum 40.000 – 50.000 tơ̆ năch râng. Tât rnôk dja, geh rlău 80% khách sạn, ntŭk  manh gŭ nde ta nkual hŏ dăn gŭ lĕ. Gay tŏng an năch hăn tât âk, Sở đă ăp ntŭk kan tăch rgâl rhŏ dŏng pâl nđaih, rhŏ dŏng an gŭ pâl jong nar ôp uănh tay ăp tŏng lam lĕ rngôch ăp bôk nău kan pâl nđaih dôl geh aƀaơ, ôp uănh n'hanh nchrăp ăp tŏng ndơ, đăp mpăn rnă njrăng, uĕh an năch pâl nđaih. Wa Hiếu an gĭt, n'gor mbra rmal lhăt ngăn nău rŭn mpet năch hăn pâl nđaih.  

         "N'gor hŏ geh siƀŭt rđău đă an Ủy ban nhân dân ăp nkuâl thị xã ndrel n'gâng kan dak si, Cục Mât uănh ntŭk tăch rgâl, Sở Công thương ton đăp mpăn mpeh rnoh  khlay tâm ban kơt đăp mpăn rnă njrăng hôm pah kan njrăng n'gang nuh srê, mât kloh uĕh ndơ  ngêt sa. Hôm  Sở ri đah ăp nkual pâl nđaih ri Sở hŏ geh nău rđău đă ăp đơn vị tĭng ƀư jăp nău rhŏ dŏng năch đŏng, đăp mpăn lĕ rngôch tŏng geh ndơ rhŏ dŏng an năch, mô geh n'hao rnoh khlay. Pah kan ôp uănh tâm ban kơt geh trong nchrăp gay hăn rsong uănh nê lah ôp uănh lor bah năp, tâm n'hanh bah Lễ hội mpeh nkô̆ nău dja".

        Nău nchrăp ăp dăp bah ăp đơn vị, doanh nghiệp n'hanh n'gâng kan ta ntŭk an Lễ hội cà phê Buôn Ma Thuột rơh dja mpŏng mbra nsĭt tay an năch pâl nđaih ăp rơh rlong gĭt saơ uĕh, nkah jŏ n'hanh đăp mpăn rnôk hăn tât Dak Lak tâm ăp nar ƀư Lễ hội./.