Ôi (23/7), Thủ tướng Chính phủ Phạm Minh Chính ƀư tơm Rơh hop Chính phủ way nkô̆ rdâk njêng pháp luật khay 7 năm 2025 gay mĭn uănh, an nău rgop tâm 8 nkô̆ rdâk njêng pháp luật, lah 7 trong nchrăp luật n’hanh dăn đă bah Chính phủ mpeh bôk nău kan njêng pháp luật năm 2026. 

An nău rgop tâm trong nchrăp Luật rgâl nkra, kơi ntop du đêt nkô̆ bah Luật Lý lịch tư pháp, Thủ tướng Phạm Minh Chính an lah, trong nchrăp Luật quy định rgâl an Bộ Công an mât mpeh lý lịch tư pháp lah njuat hŭch đêt ƀư siƀŭt, hŭch đêt rêng ƀư ndranh an nuĭh ƀon lan, doanh nghiệp, ăp nhih pah kan, ƀư glêh tam nuĭh kan, pah kan yach ngăch n’hanh geh nău dơi âk. Thủ tướng dăn đă Bộ Công an ôp uănh tay ăp quy định bah dak bah dih, ăp nuĭh rnâng kan, nuĭh geh tât khuch gay ƀư ăp tŏng trong nchrăp Luật, đăp mpăn tĭng ƀư rnôk n’gluh an dŏng. Ta Rơh hop, ăp nuĭh tâm Chính phủ an nău rgop tâm trong nchrăp Luật Ntĭm nti đại học (rgâl); Trong nchrăp Luật ntĭm nti nău kan (tơh rgâl); Trong nchrăp Luật Báo chí (tơh rgâl) n’hanh dăn đă bah Chính phủ mpeh bôk nău kan njêng pháp luật năm 2026.