Đại hội 13 Công đoàn Việt Nam năm kan 2023-2028 đah trong way ƀư “Rgâl mhe-Ƀon lan ƀư tơm-Tâm rnglăp-hun hao” ƀư bah nar aơ (1/12) tât 3/12 tât. Râng đại hội geh rlău 1 rbăn 100 đại biểu ntoh măt an rlău 11 rkeh đoàn viên tâm lam dak. Aơ lah nău ƀư khlay bah giai cấp công nhân n’hanh nuĭh pah kan, pơk bôk an lvang hun hao mhe bah rmôt kan công đoàn.

Đại hội 13 Công đoàn Việt Nam geh nău kan uănh lah lôch uĕh ƀư tĭng Nghị quyết Đại hội 12 Công đoàn Việt Nam, Mĭn nău rƀŏng, nău kan năm kan 2023-2028; Săch Ban chấp hành Tổng Liên đoàn Lao động Việt Nam khóa 13. Năm kan 2018-2023, Công đoàn Việt Nam lĕ an n’hanh mbơh ƀư ăp ndơ ntop kơl âk ntil, têh hvi an đoàn viên, nuĭh pah kan n’hanh nuĭh ƀon lan bah nuĭh pah kan geh khuch yor srê Covid-19 đah rnoh prăk bơi 6 rbăn rmen prăk; Rlău 30 rkeh đoàn viên, nuĭh pah kan geh nău rêh jêr jŏt dơi chop khâl, mbah rhơn Tết, ntrŭt nsôr, an ndơ di rơh “Tết rgum răm” đah rlău 28 rbăn rmen prăk.