Ôi 4/3 n’hah kêng măng nar 8/3, mpôl hên geh măt ta nkual sŏk choih ta dak me Krông Nô, lvang hoch rlău xă Quảng Phú, nkuăl Krông Nô, n’gor Dak Nông. Ta lvang dak me knŭng hôm 2 km, geh 6 bôk tàu rhôp choih măy n’gôr. Du đêt tàu dôl rhôp choih tâm dak, choih na naơ dơi bơm hao tâm tàu. Ta nkual dơi UBND n’gor Dak Nông an samƀŭt an ăp doanh nghiệp joi choih, âk ntŭk dôl pĭch rlâm jru lăp kơh dak, ƀư djơh kơh, yơn tàu hôm e rhôp choih na nao. Du hê nuĭh ƀon lan ta thôn Phú Lợi, xă Quảng Phú dŭt ji nuih an gĭt, nău sŏk choih tâm âk năm aơ lĕ ƀư pĭch rlâm nar lơ jêng hô, ƀư roh dŭt âk neh tuch tăm:

“Lah nsum ta aơ mhe 5 mông ôi lah khân pơng rhôp hôm, khân pơng rhôp tât 6-7h măng mư rlu. Geh he ri khân pơng rhôp dể ntŭk êng ngai du đêt, hôm mô geh he ri khân pơng ndơ̆ dĭng lăp kơh dak, lah pĭch rlâm dơm. Nĕ, kơt nô saơ đah ri, aƀaơ pơng nklăch dĭng tâm trôm nĕ dâl, lah tâm 2 nar dơm kơh neh nĕ pĭch rlâm lĕ dâl. N’gâng kan ƀon lan an joi trong mkra m’hâm ƀư lah an nău nĕ kơt aơ ri neh lŏ mir jŭr lĕ tâm dak”.

Wa Nguyễn Chung Huy, Kruanh jrô kan tuch tăm mât rong n’hanh hun hao ƀon lan Krông Nô, n’gor Dak Nông an gĭt, nu nău pĭch rlâm kơh dak me Krông Nô ta xă Quảng Phú nar lơ jêng hô ta ăp ntŭk ăp doanh nghiệp dơi pă an sŏk joi choih. Tĭng rnoh kơp tât dŭt năm 2022, geh 28 rnăk ta xă Quảng Phú geh khuch đah neh tuch tăm, tơm tăm yor pĭch rlâm ta ăp gưl dak me pă an 3 doanh nghiệp sŏk joi choih geh. Ăp ăp lĕ ƀư samƀŭt dăn đă njuăl tât UBND xă Quảng Phú n’hanh aƀaơ n’gâng kan ƀon lan dôl dâk ƀư ta n’gul gay an doanh nghiệp tâm ton trok đah ăp rnăk ƀon lan. Wa Nguyễn Chung Huy an lah, nău sŏk joi choih aƀaơ dŭt jêr, nău pĭch rlâm jêng tât nău phong, dŭt jêr jŏt. Wa Huy mĭn lah đŏng, ăp lvang dak me dơi UBND n’gor Dak Nông pă an sŏk joi an ăp doanh nghiệp sŏk joi choih rnôk bôk năp mô geh pĭch rlâm. Tĭng nău ntrŭnh, doanh nghiệp dơi sŏk joi tă kơh dak me 20m, yơn bôl ta ntŭk mô ntrŭnh kloh ngai 20m kơh dak me rnôk bôk năp pă an mô lah ta ăp ntŭk. Jêng tât nău pĭch rlâm hô ri ăp tàu rhôp choih lơ lăp jru lơn ta ăp ntŭk kơh dak me ơm. Aƀaơ, du đêt ntŭk lĕ pĭch rlâm rlău 10 mét, tàu dŭt dôl sŏk joi jru tâm ntŭk kơh dak bah năp đaơ. N’hanh aơ lah nău pháp lý n’gluh an ăp n’gâng kan nău kan n’hanh UBND n’gor Dak Nông uănh mĭn tay gay mkra di:

“Tih samƀŭt an sŏk joi nking n’gang ntŭk bôk năp, ntŭk n’gleh dŭt, rlău ma tĭng nău rgop tâm nchră ntrŭnh an sŏk joi ngai kơh dak 20m. Bôk nău rgop tâm nchră sŏk joi lah kơt nĕ hôm e kơh dak lah du nău khlay, bôl tĭng rnôk, dôl geh kol ta aơ. Nkuăl âk tơ̆ geh dăn đă uănh mĭn m’hâm ƀư, nău mĭn êng lah kơh dak ta rnôk uănh lah nău ngăn pă an, yơn rnôk pĭch rlâm hôm ri nuĭh gĭt saơ ntŭk pĭch rlâm lah du nău pháp lý”.

          Nkre, đah nău pĭch rlâm lĕ dŭt hô, khay 11/2022, UBND nkuăl Krông Nô lĕ geh sam ƀŭt dăn đă UBND n’gor Dak Nông an rlu sŏk joi choih ta ăp ntŭk pĭch rlâm xă Quảng Phú. Yơn, nkuăl kâp n’gor kâp bah rnôk nĕ tât aƀaơ, tâm rnôk pĭch rlâm geh ăp nar:

          “Đah nu nău pĭch râm njok dak me Krông Nô ri nkuăl lĕ geh du đêt dă đă, đă ăp ntŭk kan sŏk joi choih ndăn ndâk njêng n’hanh jêh trong nkra rgâl, rdâk nsơm tay ntŭk ntô tâm nău ƀư sŏk joi choih gay njuăl an ăp ngih pah kan dơi mkra, uănh năl n’hanh ŭch ƀư tĭng. Dăn đă N’gâng kan Tài Nguyên n’hanh Môi trường uănh mĭn tay, uănh nđôi uănh lah tay nu nău geh pĭch rlâm kơh dak me. Dăn đă rlu rhôp choih tĭng nău ntrŭnh ta Nghị định 23 bah chính phủ. Kuăl lah wah rlu gay nkra ntŭk ntô, jêh rnôk nkra jêh ri dơi joi rhôp tay. Nkuăl đă hôm n’gâng kan dơi kan bah n’gor uănh lah kơt nĕ, ndâng dơi dơm”.

Ta dak me Krông Nô ta xă Quảng Phú, nkuăl Krông Nô, UBND n’gor Dak Nông gưl 4 pă an samƀŭt sŏk joi choih ta 4 doanh nghiệp geh: Công ty TMHH MTV sŏk joi choih Phước Lộc, Doanh nghiệp tư nhân Văn Hồng, Công ty TNHH MTV sŏk joi choih Quảng Phú n’hanh Công ty TNHH MTV Hải Khánh Ngân. Tâm nĕ, Công ty TNHH MTV Hải Khánh Ngân lĕ rlu bah khay 1/2022. 3 doanh nghiệp hôm e dŏng geh samƀŭt pă an sŏk joi dĭng lĕ geh 68.000m3/năm ta dĭng lĕ jong lvang dak me nklăp 6,4km.

          Đah nău pĭch rlâm geh nar lơ hô ta xă Quảng Phú, nău an rlu sŏk joi choih gay ƀư tĭng ăp trong mkra mât njrăng kơh dak me, rdâk nkra ntŭk ntô gŭ âm tĭng Nghị đinh 23 bah Chính phủ n’hanh tĭng dăn đă bah nkuăl Krông Nô dŭt di. UBND n’gor Dak Nông an ơm geh nău ntrŭnh, dêr nău pĭch rlâm geh tay, phah khuch dak me Krông Nô kơt ƀư roh neh tuch tăm bah nuĭh ƀon lan.