Năm nti 2023-2024, Ngih săm ƀŭt THCS Lê Duẩn, xã Ea Puk, nkuăl Krông Năng geh 710 kon se nti jrâu 6-9. Ntơm n’gul khay 8, ngih săm ƀŭt ƀư jêh nau săch kon se, ntĭm nti ân rmôt nau nti kon se tâm ăp jrâu ntơm bah jrâu 4 ndrel jrâu 8 tĭng nau ntĭm nti bah năm 2019. Nkre, rvăt năp, ntop ndơ dŏng nti, rep kloh jrâu nti, nglan ngih, ân ueh tâm năm nti mhe. Wa Nguyễn Duy Nghĩa, Hiệu trưởng ngih săm ƀŭt mbơh:

‘Ngih săm ƀŭt hŏ nkra ngih ăch, răk ân kloh, rgâl ver ŭnh ndrel rvăt dnơ dŏng kơl an kon se hăn nti tâm jrâu 4 ndrel jrâu 8. Hôm nau ntĭm nti ân jrâu 5 ndrel jrâu 9 tĭng nau ơm ri ma ăp ntil ndơ bah ngih săm ƀŭt hôm tŏng kơt ơm”.

Ndrel ma nau nkra, n’hao mhe ăp ntŭk jê̆, âk nkual tâm n’gor hŏ pă tơm prăk âk rmen gay ma nkra ngih săm ƀŭt, jrâu nti mhe, ngih kan, nglan ngih săm ƀŭt ƀư ân nâp. Ngăn lah, tâm nkuăl Cư Mgar, năm nti aơ, nkuăl dŏng rlau 33 rmen 500 rkeh gay ma nkra ngih nti ndrel ntop tay ndơ dŏng nti ân âk ngih săm ƀŭt. Tât rnôk aơ, ngih săm ƀŭt hŏ geh tŏng nau dơi bah nau ntĭm nti phổ thông mhe. Wa Nguyễn Tự Do, Kruanh jrâu kan ntĭm nti nkuăl Cư M’gar, mbơh:

‘Âk ntŭk kan ntĭm nti bah nkuăl Cư M’gar hŏ rđau ăp ngih săm ƀŭt kơl mbơh nchră nau ân n’gâng kan, UBND nkuăl lŏ ntop nkra ân nâp ân nau rvăt năp dnơ dŏng kơl an nau ntĭm ndrel nti ntop âk tay nai ntĭm kon se đăp mpăn rnoh tĭng nau ntrŭnh bah n’gâng kan ntĭm nti, gay ma ƀư nau kan ntĭm nti kơt năm 2018 ndrel nau kan ntĭm nti rnôk mhe aơ, đăp mpăn ăp ngih săm ƀŭt lăp năm nti mhe ân ueh ngăn”.

 Năm nti 2023-2024, n’gor Dak Lak geh rlau 1000 ngih ntĭm nti tă bah mầm non tât jrâu 12. Bah năp năm nti mhe, n’gor Dak Lak hŏ rđau n’gâng kan ntĭm nti ntĭm mbơh nau blau ân nai ntĭm kon se, pă tŏng ăp nai nti ntơm rnôk rmeh tât ntŭk mô tŏng. Rgum ăp tơm gay ma nchrăp ntŭk ntu, ngih vâl ndơ dŏng kơl an nau kan ntĭm nti ân ăp ntŭk tĭng nau ŭch bah nau kan ntĭm nti pjổ thông năm 2018. Năm nti aơ, lam ntŭk kan ntuh kơl ân rlau 965 rmen gay ma nti mhe, nkra nâp, rvăt ndơ dŏng ntĭm nti. Wa Lê Thị Kim Oanh, Groi Giám đốc n’gâng kan ntĭm nti n’gor Dak Lak mbơh:

‘Mpeh nau kan đah ăp ngih săm ƀŭt tâm dâng bah n’gâng kan ntĭm nti ri tât rnôk aơ hŏ tŏng dơi mpeh ntŭk ntĭm nti kŏ kơt lah ndơ dŏng gay ma ntrŭnh ƀư nau kan ntĭm nti ngăn lah tâm rnôk ntrŭnh ƀư nau kan ntĭm nti năm 2018. Êng nê, đah ăp ngih săm ƀŭt ntơm mầm non tât jrâu 12 hŏ pă tât ân ăp nkuăl nau kan yơn kŏ geh nau đă ăp jrâu kan ntĭm nti nchrăp lor tâm nau kơp uănh ăp nau dơi gay ma nkra ân nâp ndơ dŏng gay ma tă bah nê mbơh đah UBND nkuăl gay ma nchră mbơh ăp tơm prăk gay ma đăp mpăn nau dơi ntĭm nti ân năm nti mhe”.

Kŏ tĭng nau mbơh bah n’gâng kan ntĭm nti Dak Lak năm nti rlau aơ, lam n’gor geh 30 rbăn kon se lôch nti jrâu 9. Tâm nê, rlau 23.100 kon se lăp nti jrâu 10, rlau 400 kon se lăp nti tam ăp ntŭk ntĭm nti ƀa ƀơ, nti kan. Rnoh hôm e rlau 2.400 kon se ê geh ngih săm ƀŭt nti. Gay rklaih nau aơ, UBND n’gor Dak Lak đă N’gâng kan ntĭm nti lŏ kơp rnoh ntĭm nti tâm ăp ngih săm ƀŭt ân tŏng rnoh nŭih tĭng nau đă. Nkre kơp ân ăp rnoh kon se mô tŏng jrâu nti bah ăp nkuăl gay ma pă ân kon se lăp nti tâm ăp ntŭk ntĭm nti ƀa ƀơ. Ăp nkuăl pă ntop tơm prăk ân ngăch gay đăp mpăn ntŭk ntu, leo jă nai nti kon se ân ăp ngih săm ƀŭt ntĭm nti ƀa ƀơ, nti nau kan gay ma tŏng dơi nau ŭch hăn nti bah kon se./.