Lôch rlu Tết Nguyên Đán, ntŭk kan ta n'gor Dak Lak ntơm khuh n'gôr. Ndrel đah nău nuĭh kan plơ̆ tay ăp n'gor mpeh bah  dâng gay pah kan, ăp rơh nkoch mbơh joi nău kan khuh n'gôr đŏng yor nuĭh kan tât ôp joi nău kan tâm di.

Lôch 4 năm ƀư công nhân ƀư ndơ ntrŭp nkra ndeh ôtô ta Bình Dương, nô Nguyễn Văn Việt, xã Ea Na, nkuâl Krông Ana hŏ rlu joi nău kan êng ƀa ƀă. Tăng lư geh rơh mbơh joi nău kan dơi ƀư ta nkuâl, nô Việt hŏ tât joi gĭt. Lôch tăng mbơh nkoch n'hanh pơk ŭanh nău lư sơch lăp nuĭh kan ta ăp dak kơt Hàn Quốc, Đài Loan, Nhật Bản, nô Việt hŏ nôp hồ sơ hăn kan ta dak Nhật Bản. Nô Việt mĭn lah, đah nău tă ơm gĭt kan 4 năm bah nô mbra bên đah nău kan ta Nhật n'hanh aơ lah rnôk gay nô ntop geh nău gĭt blău tâm săk n'hanh n'hao nău geh wăng sa đŏng.

       "Lor rnôk hăn tât ntŭk mbơh joi nău kan ta nkuâl Krông Ana gâp hŏ uănh mpeh nău hăn kan dak bah dih đŏng. Aơ lah nău ŭch rŏng gay ntop geh nău gĭt tâm săk n'hanh nsĭt geh tưm wăng sa an rnăk wâl. Dơi  ăp yuh ta ntŭk rgum mbơh joi nău kan mbơh nti joi gĭt na nê̆ lơn mpeh nău sơch công ty gay he pah kan. Gâp n'glêh an tĭng nău kan ƀư ndơ ntrŭp nkra ndeh ta Nhật Bản".

        Mhe plơ̆ sĭt lôch 2 năm hăn ƀư tahen, nô Lê Anh Nam ta thôn 2, xã Quảng Điền ngăch hăn tât ntŭk mbơh joi nău kan gay ôp joi nău kan an he đŏng. Lôch rnôk mbơh nti mpeh trong kơl ntĭm nti nău kan n'hanh nta joi nău kan an druh ndăm lôch sĭt ƀư tahen nô Nam hŏ n'glêh an hăn nti ƀĭt ndeh gay joi geh nău kan tâm di an săk he nơm.

      Aƀaơ gâp mhe hăn sĭt ƀư tahen, jêng geh bôk nău kan mbơh gĭt nău lư an tahen mhe sĭt ri gâp râng, ta aơ ri geh ăp nău lư di, ngăn ngăn n'hanh gâp ŭch rŏng joi geh nău kan an he tâm nău rêh lơn. Ta năp măt gâp hăn nti ƀăng ƀĭt ndeh n'hanh công nghệ ôtô lôch nê hăn pah kan".   

        Tĭng wa Y Thắng B’đap, Groi kruanh Hội nông dân nkuâl Krông Ana, aƀaơ lam nkuâl geh nklăp 58% rnoh nuĭh di năm hăn kan. Gay kơl nuĭh kan rƀah gĭt nău lư tơm mpeh sơch lăp kan. Hội nông dân hŏ kan nsum đah Ntŭk rgum mbơh joi nău kan n'gor ƀư ăp rơh mbơh joi nău kan ta nkuâl n'hanh ăp xã geh âk nuĭh di năm hăn pah kan yơn mô hŏ joi geh nău kan tâm di. Nău n'glăp ăp rơh mbơh joi nău kan sĭt tât ntŭk kơl  nuĭh kan geh âk trong sơch ntŭk kan tâm di, rgop ƀư hŭch bah roh nău kan,  kơl nuĭh kan geh nău kan n'hanh nsĭt geh wăng sa đăp mpăn lôch Tết.

       "Hội nông dân nkuâl buăt nthoi tay an ntŭk rgum mbơh joi nău kan, an ăp doanh nghiệp gay mhâm ƀư kuăl jă, nkoch trêng Hội viên di  năm hăn pah kan geh nău ŭch joi geh nău kan gay tât đah ăp ntŭk kan, ntop kơl mbơh joi nău kan gay khân păng gĭt trong kơl bah Ngih dak đah nău ntop kơl an ăp nuĭh kan ŭch joi geh nău kan ta n'gor, bah dih n'gor mô lah hăn kan dak bah dih tĭng nău kan tơm. Bah meng nê Hội nông dân nkuâl kan nsum đah Ngân hàng Chính sách gay ntop kơl prăk manh gay manh an hăn kan dak bah dih."

        Wa Nguyễn Văn Cường, Groi Giám đốc ntŭk rgum mbơh joi nău kan n'gor Dak Lak an gĭt, tâm năm 2023, Ntŭk rgum mbơh joi nău kan nsrôih mbơh joi nău kan an nklăp 10 rbăn nuĭh, rnoh nuĭh hăn pah kan rlău 3.000 nuĭh n'hanh hăn kan dak bah dih lah  nklăp 1.500 nuĭh. Gay ƀư dơi nău dja, tâm năm 2023 Ntŭk rgum mbơh joi nău kan mbra ƀư way nkô̆ ta Ntŭk rgum mbơh joi nău kan. Rlău ma nê mbra kan nsum đah Sở Giáo dục ƀư ăp rơh mbơh joi nău kan an kon se nti jrô 12. Ăp rơh mbơh joi nău kan mbra dơi rgâl tĭng trong rƀŏng tât dăch đah nuĭh kan lơn:

     Bôk năm 2023 nău ŭch geh nuĭh kan bah ăp doanh nghiệp đăng ký bah Ntŭk rgum mbơh joi nău kan dŭt âk, gay kơl an ăp doanh nghiệp tŏng geh nuĭh kan ri Ntŭk rgum mbơh joi nău kan mbra ntrôl dăng lĕ rngôch ăp trong ƀư mpeh bôk nău kan, lơn lah rgâl trong ƀư lah Ntŭk rgum mbơh joi nău kan jŭr tât thôn ƀon, mô dơn nê ma hôm ƀư lĕ măng ngo, nar prao nar pơh tĭng nău đă bah n'gâng kan ta ntŭk đŏng, lơn lah năm 2023 dja Ntŭk rgum mbơh joi nău kan ntrôl dăng râng tâm ăp Lễ hội bah ăp ntŭk gay ƀư nkoch trêng an kônh wa gĭt kloh tâm ban kơt âk nkô̆ ta lễ hội đŏng, der bah geh mplư rlăm joi nău kan".

       Tĭng wa Nguyễn Văn Cường, Dak Lak aƀaơ geh nklăp 600 Doanh nghiệp ta n'gor dôl ŭch geh nuĭh kan, âk doanh nghiệp bah dih n'gor tât ôp joi tât Ntŭk rgum mbơh joi nău kan n'gor gay đăng ký sơch lăp  nuĭh kan bah Dak Lak hăn pah kan ta ăp n'gor đŏng. Đơn vị sơch lăp dŭt đêt lah 200 nuĭh n'hanh dŭt âk lah 5 rbăn nuĭh. Aơ lah rnôk gay nuĭh kan Dak Lak joi geh nău kan an he nơm./.