Lah ngoăy tâm âk druh ndăm dŭt n’hâm hăn lor, kơt dŏng ntrong kan nkra njêng mhe, nô Y Luật Niê, rnoi Êđê, ta ƀon Mghí, xă Yang mao, nkuăl Krông Bông, n’gor Dak Lak aƀaơ dôl hun hao ntrong kan tăm âk ntil, mât rong âk kon. Ta rnoh neh rlău 2ha neh bah rnăk wâl, nô tăm srah âk ntil tơm kơt dổi, cà phê, sầu riêng, prit rkŏ n’hanh kuih ntu ka têh rlău 100 m2 gay mât klo ônh. Nô hôm tâm rgop tăch tơm ntil, rwăt cà phê rih gay hao nău geh. Y Luật Niê nkoch: lah đảng viên mom, têh bah ăp nău ƀư đoàn, hội ta ntŭk, nô nsrôih nti nsơm, kơt dŏng ăp ntrong kan mhe, hăn lor, ntrong leo bah nuĭh đảng viên.

“Săk gâp lah đảng viên ri geh nău mĭn tâm bôk na nao lah đảng viên hăn lor ƀon lan tĭng bah kơi. Săk gâp dơi hăn uănh nsong âk ntrong kan tâm n’hanh bah dih n’gor, bah nĕ sĭt kơt dŏng tâm mir bah jay nơm, saơ geh săk rnglăy ri nkoch trêng an kônh wa ƀư tĭng ndrel”.

Nô Y Luật Niê nkoch ntrong kan wăng sa bah rnăk wâl.Nô Y Luật Niê nkoch ntrong kan wăng sa bah rnăk wâl.

Kơt Y Luật đŏng, năm bah năp, âk druh ndăm ta xă Yang Mao têh jêng bah ăp ntrong kan đoàn, hội lĕ dơi koch ăp jrô mĭn joi gĭt wât mpeh Đảng n’hanh lah ăp nuĭh ntoh lư dơi uănh nglăp Đảng. Tâm 7 năm bah năp, Đảng ủy xă lĕ nglăp geh bơi 90 đảng viên mhe, rnoh hun hao đảng viên ăp năm dơi geh da dê n’hanh hao rlău trong nchrăp. Tât aƀaơ, xă Yang Mao geh bơi 300 đảng viên rgum rƀŭn ta 18 chi bộ thôn, ƀon n’hanh ăp ngih pah kan, đoàn thể.

Wa Trần Thế Thành, Bí tư Đảng ủy xă Yang Mao an gĭt, jêr jŏt nsum tâm nău hun hao đảng viên ta ntŭk lah joi nuĭh gay ntĭm nti nglăp. Yor âk nuĭh ƀon lan ntoh lư ƀa ƀơ hăn ƀư sa ngai, jêr jŏt tâm nău mkra lý lịch. Bôl ndrĭ, ăp chi bộ lĕ nsrôih rgŏ jă, tâm rgop đah ăp rmôt kan, nsum mpôl êng gay ngăch saơ, kơl, ntĭm nti gay “mât rong”, hun hao đảng viên ta tĭng chi bộ.

Bí thư Đảng ủy xă Yang Mao Trần Thế Thành (ao nglang) hăn uănh nsong ntrong kan bah đảng viên mom ntoh lư

“Tâm rgop ăp ntrong kan “Druh ndăm ndâk njêng nău kan, druh ndăm mât njrăng neh dak”, rgŏ jă an Đoàn viên druh ndăm ndâk njêng ăp ntrong kan ta ntŭk, bah nĕ geh nuĭh, ƀư n’hâm soan an oh nô nkre hun hao wăng sa, nkre râng trong kan Đảng, trong kan ta ăp thôn ƀon. Lah nkô̆ nău khlay an n’hâm soan ăp mon, ăp mon ri dôl prêng lăp Đảng, klach rgum rƀŭn. Ndrĭ aƀaơ ndâk njêng ăp rmôt ŭch, ndơ̆ ăp mon hăn uănh nsong ntrong kan sĭt ƀư tĭng. Bah ăp ntrong kan bah ăp nuĭh n’gâng tơm aơ gay pơk hvi ta lam xă”.

          Tĭng uănh lah bah Nkuăl ủy Krông Bông, lah ntŭk nkual jru ngai n’hanh jêr jŏt, yơn xă Yang Mao lah ntŭk ang tâm trong kan hun hao đảng viên ta nkuăl Krông Bông n’ăp mpeh uĕh nâp n’hanh rnoh nuĭh. Xă uănh mĭn hun hao đảng viên nuĭh druh ndăm, nuĭh rnoi mpôl đêt. Nkre uănh khlay n’hao uĕh rgum rƀŭn chi bộ, kơt uĕh trong kan uănh nđôi, tâm rmôt đảng. Ndrel đah nău ƀư tơm bah gưl ủy n’hanh ăp chi bộ ri nău ƀư tơm bah nuĭh djôt bôk đảng ủy lah dŭt khlay. Wa Lâm Thanh Tùng, Kruanh ban tổ chức Huyện ủy Krông Bông uănh lah, đah nău blău ơm jŏ năm ƀư trong kan đảng, bí thư đảng ủy xă Yang Mao lĕ geh âk trong mkra tâm nău joi nuĭh an hun hao đảng viên.

      Rup gui thôn ƀon ta xă Yang Mao dôl geh âk nău rgâl uĕh.

    “Xă Yang Mao lah du nkual jru ngai, geh âk nuĭh rnoi mpôl đêt. Trong kan hun hao đảng viên tâm âk năm bah năp ri mâp jêr jŏt, wăk kol. Yơn lah, đah nău nsrôih bah êng đồng chí Thành n’hanh bah nsum mpôl Ban Chấp hành Đảng bộ ri tâm âk năm bah năp Đảng bộ xă Yang Mao lĕ ƀư uĕh trong kan hun hao đảng viên, ngăn lah bah ƀon lan lah nuĭh rnoi mpôl đêt. Âk săk rnglăy aơ lĕ rgop dŭt khlay tâm nău kơl an Đảng bộ nkuăl lôch jêh ăp trong kan hun hao đảng viên lam đảng bộ, lơn lah tâm nkual rnoi mpôl đêt”.

Uănh mĭn jru hvi, hăn ndrel đah ăp ntrong leo n’hanh tâm rgop rjăp đah nuĭh ƀon lan lĕ kơl ăp chi bộ, đảng bộ ta xă Yang Mao ngăch saơ, ntĭm nti tay ƀon lan ntoh lư gay nglăp Đảng, n’hao rmôt đảng viên ta ntŭk. Rnôk dâk tâm rmôt bah đảng, du đảng viên n’hao prêh nuih n’hâm rlet rlău jêr jŏt gay hun hao wăng sa, hăn lor tâm ăp nău kan bah thôn, ƀon. N’hao prêh nuih n’hâm ntrong leo lor tâm ndâk njêng ƀon lan mhe, rgop ndâk njêng ƀon lan nar lơ hun hao.