Ndrel đah nĕ, ta rơh lễ hội cà phê Buôn Ma Thuột tal 8 tât tay, ăp nău kan rveh tâm rlong re dak, tâm rlong nchoăt, tâm rlong chưng play mô hôm geh ƀư đŏng. Yơn lah, năch tât ta Dak Lak hôm nha geh uănh ăp nău kan geh tât rveh nĕ lah kuăl brah vơt bôk n’hao săk an rveh, an rveh sa buffet, tâm rlong nkơ̆ an rveh, tâm rlong vơt năch, chup rup đah rveh.

Tĭng nău mbơh bâh ntŭk kan pâl nđaih n’hanh ngih năch gŭ Biệt Điện ta nkuăl ƀon têh Buôn Ma Thuột, n’gor Dak Lak, bâh nar 10/2, ntŭk mbơh mô hôm an năch pâl nđaih ncho rveh ta ntŭk pâl nđaih ntung yŭng Buôn Đôn  ta xã Krông Na, nkuăl Buôn Đôn; ndơn đah ntil ndơ pâl nđaih mhe geh âk nău ueh êng văn hóa ta ntŭk ndrel đah ăp nău pâl nđaih ueh đah rveh kơt an rveh hăn nsong, tâm pâl rlưn đah năch. Nău kan aơ gay ma ƀư tĭng nău ntrŭnh bâh n’gor Dak Lak mpeh nău kan mô hôm an ncho rveh tâm nău pâl nđaih gay ma mât mpôl rveh ƀon ta n’gor, rgâl jêng nău pâl nđaih dăch bên đah rveh.

Geh tât trong kan aơ, ta bôk nău kan mpôl mât rong rveh Buôn Đôn- ngoăy tâm âk nău kan tơm bâh lễ hội cà phê Buôn Ma Thuột tal 8, năm 2023 geh ƀư ta khay 3 tay ta n’gor Dak Lak, mbra mô hôm geh ăp nău kan kơt: tâm rlong rveh nchoăt, tâm rlong rveh re, tâm rlong rveh chưng play, mô tâm rlong rveh tâm têk rse đah nuĭh. Ndơn ta nĕ mbra geh du đê̆ nkô̆ nău kơt: Kuăl brah vơt săk n’hao bôk an rveh, an rveh sa buffet, tâm rlong nkơ̆ an rveh, tâm rlong vơt năch, an rveh tâm bên n’hanh chup rup đah năch pâl nđaih...Wa Vũ Minh Thoại, kruanh ntŭk kan văn hóa- thông tin nkuăl Buôn Đôn an gĭt.

“Nău aơ lah ƀư tĭng nău tâm ton kan bâh Ủy ban nhân dân n’gor đah nău leo ƀư ndơ rong châu Á. Aơ lah du nău ntrŭnh n’hanh nău mĭn kan dŭt ueh. Mpôl hên dŭt ŭch yor nău ngăn aƀaơ gay ma dơi geh ăp bôk rveh ma ăp nar hăn nsong rĭ lah du ntil ndơ khlăy kơl an nău pâl nđaih hôm. Jêng tâm nău nĕ rĭ mpôl hên mô êng nuĭh tơm rveh ma nđâp lĕ mpôl hên ŭch lah he an geh mât ueh, ƀư ueh nkô̆ nău aơ. Dŭt ŭch lah bâh mpeh đah năch rĭ tât ta Buôn Đôn uănh rveh dơm, mô hôm dơi ncho ka lơ săk rveh, gay ma he mât ueh ăp bôk rveh nĕ lơ ma jŏ lơ ma ueh. Nău mĭn nsum bâh nkuăl tâm bah kơt lĕ rngôch ƀon lan geh nău tâm ban kơt nĕ”.

Nău ntrŭnh aơ bâh n’gâng kan têh n’hanh n’gâng kan ta ntŭk dŭt ŭch geh năch pâl nđaih kơl an. Wa Nguyễn Xuân Thủy, du năch pâl nđaih ta Vĩnh Phúc âk tơ̆ tât ta Bản Đôn hăn pâl an lah, rup rveh lĕ dŭt dăch bên đah nkual neh Bản Đôn âk năm ba năp n’hanh geh năch tâm dak n’hanh bah dak bah dih gĭt tât. Yơn lah, tĭng wa Thủy, ncho rveh hăn văr nkual pâl nđaih n’hanh hăn ta dak me Serepok lĕ mô hôm ueh, nău rgâl mhe ăp ntil nău pâl nđaih ta aơ lah tâm di ngăn.

“Mpôl he an nklơi nău pâl nđaih an năch ncho ka lơ săk rveh yor lah mbra geh nău tât hô ngăn. Bâh 3-4 nuĭh ncho ta săk rveh lôch nĕ hăn văr nĕ lôch nĕ mô geh nău ueh đŏng. Rnăk gâp tă hăn Thái Lan pâl nđaih. Ta aơ, khân păng ƀư pâl nđaih đah rveh dŭt ueh. Nuĭh Thái Lan an rveh tâm du ntŭk geh mpêr n’gar êng, ƀư an rveh chưng play, nchoăt maraton, ƀư xiếc..dŭt ueh. Ăp oh kon gâp dâk dăch mpêr n’gar sŏk ndơ sa an rveh dŭt đăp mpăn ngăn”.

Yuh Hà Nhi Phương Thảo, năch tât bâh nkuăl ƀon têh Hồ Chí Minh tât Bản Đôn pâl nđaih mpơl nău mĭn, aƀaơ mpôl rveh ƀon ta Dak Lak lĕ bơi sêng ngăch yor ê hŏ geh deh kon. Nău sŏk dŏng ntil pâl nđaih ncho rveh mbra ƀư an rveh ngăch sêng, geh rnôk lah mô hôm geh. N’gâng kan pâl nđaih ta ntŭk rgâl ăp nău pâl nđaih geh tât rveh klâp lah mbra ueh lơn.

“Tĭng gâp mĭn an geh rdâk njêng ăp nău pâl nđaih geh tât rveh mô di ah ƀư ncho rveh. Kơt lah rdâk njêng ăp nău joi gĭt mpeh jâng têl rveh ta Bản Đôn, ƀư ăp nău pâl nđaih tât chup rup, ŭm n’hanh mât an rveh, lah ma an ncho rveh mbra mô dăng săk soan an rveh, lôch nĕ mbra sêng dơm”.

Hôm kahgĭt, tâm 2 năm dăch aơ, du hê năch tât bâh Khoái Châu, Hưng Yên lĕ tât râng du rơh pâl nđaih ncho rveh ta nkual pâl nđaih Bản Đôn nkuăl Buôn Đôn, mô lah geh rveh rđăt tup ta neh jêng geh sôt rmanh hô hăn ta ngih dak si. Lôch nĕ, ndơn kan công ty pâl nđaih Biệt Điện lĕ geh nău mbơh lah mô hôm an pâl nđaih ncho rveh.

Mhe aơ, Hội đồng nhân dân n’gor Dak Lak lĕ mbơh an dŏng Nghị quyết mpeh nău kơl rveh ƀon deh kon. Tĭng nĕ, prăk ta ntŭk mbra kơl an 500 rbăn prăk/du bôk rveh me/nar n’hanh 600 rbăn prăk/rveh dăm/nar, tâm rnôk 30 nar bar bôk rveh gŭ ndrel. Lah rveh me deh kon, nuĭh tơm rveh mbra geh kơl an 300 rbăn prăk/nar tâm 10 khay bôk năp geh bŭn, 600 rbăn prăk/nar bâh khay 11 geh bŭn tât rveh deh kon.