VOV4.M’nông: Gay nchrăp ân năm nti mhe 2022-2023, âk me mbŏ kon se ndrel kon se nti tâm Dak Lak hŏ nchrăp ngăch joi rvăt săm ƀŭt ntĭm nti, ngăn lah săm ƀŭt ntĭm nti ăp jrâu 3, 7, 10. Âk me mbŏ kon se rvê mra mô tŏng săm ƀŭt nti rnôk aơ lah năm bôk năp ntrŭnh ƀư bôk nau kan ntĭm nti phổ thông mhe.

            Năm aơ, wa Đỗ Hùng Thuần, Phường Tân An, nkuăl ƀon têh Buôn Ma Thuột mô geh năn rvăt săm ƀŭt ân kon păng ôh, ri ma păng đă bu. Wa Thuần nkoch: Năm aơ, ƀư tĭng nau kan ntĭm nti mhe, ndrôm săm ƀŭt rnôk aơ geh 3 blah geh ăp ngih nkra săm ƀŭt tăch nê lah Cánh Diều, Chân trời sáng tạo, Kết nối tri thức, ndrel ngih săm ƀŭt ntŭk kon păng nti ri đă rvăt săm ƀŭt tă bah âk ntŭk êng êng. Nau aơ, ƀư jêr ân wa rnôk joi rvăt:

            ‘Nsing tâm ăp ngih săm ƀŭt êng êng ma geh ăp ndrôm săm ƀŭt êng êng, ân geh đă ăp nŭih bu tăch nê săch, yơn me mbŏ ri mô gĭt ôh, mô gĭt mhâm nau săch gay ma sŏk ân lĕ ân tŏng săm ƀŭt ân kon nơm nti”.

            Hôm đah ăp kon se kơt Phan Ngọc Hân, kon se nti jrâu 7A1, Ngih săm ƀŭt THCS Nguyễn Tất Thành, nkuăl Cư M’gar bol ma hŏ geh ngih săm ƀŭt mbơh ăp ndrôm săm ƀŭt ân geh rvăt, yơn gay rvăt dơi tŏng du tủ săm ƀŭt, păng hŏ đă me mbŏ rdeng hăn tât ta ngih tăch săm ƀŭt tâm nkuăl ƀon têh Buôn Ma Thuột:

            ‘Gâp hăn tă bah nkuăl Cư M’gar, rnôk hăn tât ta aơ ri gâp kŏ vĭ vĕ đŏng rnôk ma săch âk ntil săm ƀŭt bah ăp ntŭk nkra săm ƀŭt kơt lah Chân trời sáng tạo, kết nối tri thức, cánh diều. Yơn rnơm geh nau kơl an bah ngih săm ƀŭt ri gâp hŏ săch ndrôm săm ƀŭt nti ân tâm di”.

            Tĭng nau ntrŭnh 1360, lơ 16/6/2022 bah UBND n’gor Dak Lak mpeh nau ân ƀư ndrôm săm ƀŭt nti jrâu 3, jrâu 7 ndrel jrâu 10 dŏng tâm nau ntĭm nti phổ thông ntơm năm 2022-2023 tâm n’gor, đah jrâu 3 lah 21 moh săm ƀŭt, jrâu 7 geh 26 moh săm ƀŭt, êng jrâu 10 geh 44 moh săm ƀŭt bah lĕ 3 blah Cánh Diều, Chân trời sáng tạo ndrel Kết nối tri thức đah rnoh 138 bôk săm ƀŭt, kơp n’ăp ma săm ƀŭt săch êng ndrel săm ƀŭt nchâp dŏng.

            Wa Trương Văn Băng, Giám đốc Công ty Cổ phần Săm ƀŭt-ndơ dŏng ntĭm nti Dak Lak mbơh: Gay ma đăp mpăn nau pă tăch săm ƀŭt ntĭm nti năm mhe, ngăn lah đah ăp jrâu ƀư tĭng bôk nau ntĭm nti phổ thông năm 2018, Công ty cổ phần Săm ƀŭt-Ndo dŏng nti tâm ngih săm ƀŭt Dak Lak hŏ rgum dĭng lĕ ndơ dŏng, ndơ nkra ntop tay ntŭk ân săm ƀŭt, ƀư nau ntĭm nti ân ăp nŭih kơl tăch nkra tâm nau kơl mbơh ân me mƀ kon se, kon se nti ndrel ăp ntŭk săch, rvăt săm ƀŭt tâm di:

            ‘Ăp ngih săm ƀŭt, ăp xã bah ăp nkuăl, nkuăl têh, nkuăl ƀon têh, ăp ngih săm ƀŭt ri săch săm ƀŭt êng êng ndrel mô geh săch tâm ban, ri ma công ty mâp âk nau jêr, yơn công ty hŏ ton đah Ngih ê nkra săm ƀŭt ntĭm nti Việt Nam lah công ty mra pă ân tŏng ăp ndrôm săm ƀŭt, săm ƀŭt bài tập ân ân ăp kon se nti tâm n’gor Dak Lak, mô ân tŏng săm ƀŭt tâm ăp nkuăl tâm năm nti mhe 2022-2023”.

            Nau nchrăp ndrôm săm ƀŭt ntĭm nti ân năm nti mhe mro lah nau rvê bah ăp nŭih me mbŏ, kon se nti. Ndri ma, gay ma nau kơl an nau rvăt năp săm ƀŭt ntĭm nti ân ăp oh geh dŏng săm ƀŭt ân tâm di nau ntrŭnh, N’gâng kan ntĭm nti Dak Lak hŏ geh nau mbơh đă ăp ngih săm ƀŭt ân geh mbơh năn rnoh săm ƀŭt ƀư tŏng tâm di tâm năm nti mhe. Nkre ma đă ăp me mbŏ kon se nti, kon se nti nơm mpeh nau “mô geh tŏng” săm ƀŭt nti mro geh tâm bôk ndrel nklang khay 8, gay ma mô ir ma rvê mpeh nau joi rvăt tâm rnôk aơ. Ndrel ma nê ân geh joi rvăt săm ƀŭt tâm ăp ngih tăch geh nau rnơm, der nau rvăt săm ƀŭt mô tâm di ndrel mô nâp tam.

            N’gâng kan ntĭm nti Dak Lak kŏ ntrŭnh nau ntĭm mbơh ƀư săch dơi ndrôm săm ƀŭt ăp jrâu 3, 7 ndrel 10 ân năm nti 2022-2023 tĭng nau ntrŭnh rgâl mhe bôk nau kan ndrôm săm ƀŭt ntĭm nti phổ thông ân N’gâng kan ntĭm nti ntrŭnh. Tĭng nê, N’gâng kan ntĭm nti Dak Lak đă ăp rmôt, ăp ngih săm ƀŭt tâm n’gor ân ndơn nau ndâk nau ntrŭnh ƀư nau nchrăp leo dŏng săch ân ndrôm săm ƀŭt tĭng nau ntĭm nti bah N’gâng kan ntĭm nti ndrel UBND n’gor, N’gâng kan hŏ ntrŭnh mbơh tŏng ăp nau ntĭm jti, rđau mhe mpeh nau rgâl mhe bôk nau kan ntĭm nti phổ thông ndrel săch ndrôm săm ƀŭt ân dĭng lĕ cán bộ, nai ntĭm nti, nŭih pah kan, kon se ndrel me mbŏ kon se nti.

            Bah năp nê, gay ma pơk trong nơih ân ăp rmôt cán bộ, nai ntĭm nti ndrel me mbŏ geh nar gay ma joi gĭt, mĭn ndrel gĭt kloh nkô̆ nau ăp ndrôm săm ƀŭt yor ăp ntŭk ê nkra pă, N’gâng kan ntĭm nti Dak Lak hŏ tâm rgop ntrŭnh ƀư 2 rơh mbơh nkoch tât ndrôm săm ƀŭt ăp jrâu 3, 7 ndrel 10 tĭng nau kan trực tuyến đah ăp n’gâng kan ntĭm nti, ăp ngih ê nkra săm ƀŭt ndrel ăp rmôt ngih săm ƀŭt ntĭm nti tâm lam n’gor./.

                                                Nŭih rblang: H’Thi