Kêng măng 9/1, N’gor ủy Dak Lak ƀư Rƀŭn nchră n’gul gâl 5 năm ƀư tĭng Nghị quyết mrô 35/2018 bah Bộ Chính trị khóa 12 mpeh “N’hao mât njrăng n’gâng tơm nău mĭn bah Đảng, njrăng n’gang nău dun bah ăp nău mĭn tih, nuĭh rlăng tâm nu nău mhe”, N’glôch jêh trong kan Tuyên giáo năm 2023, mbơh ƀư nău kan năm 2024. Tâm ăp năm bah năp, trong kan njrăng n’gang nău mplư rlăm “nu nău đăp mpăn” n’hanh nău ƀư dun phah bah ăp nuĭh rlăng n’hanh rŭng răng ta Dak Lak lĕ dơi geh du đêt săk rnglăy dơi kơp dơn.

Tĭng Đảng bộ lĕ nsrôih rgâl mhe, n’hao uĕh n’hanh săk rnglăy trong kan tâm nău mĭn văn hóa. Yơn lah, ta Dak lak hôm e geh nău mpôn ăp nkô̆ nău jêr jŏt mpeh rnă njrăng, đăp mpăn, ngăn lah ăp nău geh tât neh ntu, rnoi nuĭh, chroh rƀŭn. Ăp nuĭh rlăng, geh nău nsŭk nsôr tay, kuăl jă, ndâk njêng rmôt dun phah Đảng, Ngih dak, nău kơl. Ntoh ngơi ta rƀŭn nchră, wa Phạm Minh Tấn, Groi Bí thư Rnâng kan N’gor ủy Dak Lak đă, năm tât, ăp gưl ủy, n’gâng kan ƀon lan ntrôl dăng tay trong kan dun n’gang nău mĭn tih, nuĭh rlăng, mât njrăng n’gâng tơm nău mĭn bah Đảng, uănh aơ lah nău kan khlay ƀa ƀơ bah lĕ trong chính trị n’hanh bah ăp cán bộ, đảng viên. Nkre, gĭt tay nu nău, mĭn njêng, uănh nđôi nău lư kon nuĭh gay ơm tâm ôp tâm nchră, mkra ơm ăp nău ndal mhe ntoh tă bah dâng.