Bah rlău 10 nar bah năp, nô Nguyễn Xuân Lộc, dôl rgum rƀŭn ta giáo xứ Ea Tul, xă Ea Tul, nkuăl Cư M’gar ndrel kônh wa kon chroh lĕ râng nkra giáo xứ, mbrơi mbrơi tĭng mbli, lĭr tĭng păng keo ta trôm lŭ têh ta ngih brah nsum an lĕ giáo họ. Nuĭh nglăp ŭnh, nuĭh dô̆t điện, nuĭh nkra trôm lŭ, nuĭh rdâk mpông pêr. Ăp nuĭh răm rhơn.

Tâm mông nar rhơn Noel gâp ndrel đah ăp nuĭh kon chroh bah giáo xứ Ea Tul nkra ăp trôm lŭ giáng sinh gay rhơn brah deh, gay ăp nuĭh geh yan noel dơi đăp mpăn, uĕh lăng, gâp saơ dŭt răm.

Rnôk aơ, bôl dôl mô ru đah nău lêh cà phê, yơn ƀon lan kon chroh bap ntŭk aơ hôm e an mông nar gay nkra, jut rao ngih wâl, wơt Noel n’hanh năm mhe dôl êp tât. Yuh Hly Ktala, ƀon Cheh, xă Ea Tul, nkuăl Cư M’gar rhơn nkoch, năm aơ rnoh ăp ntil ndơ lŏ mir hao da dê, nău geh âk jêng kônh wa nchrăp wơt noel tâm du nău yan răm rhơn:

Năm aơ jay gâp nchrăp trôm lŭ gay wơt brah deh. Năm aơ êng đah ăp năm yor cà phê hao khlay, nĕ lah nău răm têh jêng năm aơ ăp nuĭh rhơn da dê.

Linh mục Hoàng Nguyên Vũ mât uănh giáo xứ Ea Tul an gĭt, noel năm aơ kon chroh dơi răm rlău 2 tơ̆ rnôk ngih brah dôl ntuh kơl ndâk ƀư mhe. Nchrăp an Noel năm aơ, bah bôk khay 12, kônh wa kon chroh lĕ rgop soan ndrel, rgop ndơ, ndrel đah ăp cha xứ n’hanh hội đồng mục vụ nchrăp an nar Noel uĕh lăng, saơ nuih n’hâm “ryơk Brah, rŏng dak’, tâm rnglăp rnoi nuĭh.

Noel năm aơ nchrăp tơm si, giáng sinh, thánh lễ. Đah kônh wa ri Noel lah lễ têh jêng nuih n’hâm rhơn noel bah kônh wa dŭt uĕh. Lơn lah ta Ea Tul ri lĕ rngôch kơt ăp jay ƀư trôm lŭ gay rhơn giáng sinh, nuih n’hâm bah kônh wa ri dŭt răm. Năm aơ dơi n’gâng kan ƀon lan ăp gưl an ndâk njêng ngih wâl mhe, aơ lah nău răm bah kônh wa jêng kônh wa dŭt răm, ty nơm ƀư êng hăn nđak ƀư ngih brah ma mô kâp manh nuĭh êng.

Nkuăl Cư Mgar geh 5 giáo xứ, 2 giáo họ n’hanh 1 ntŭk rgum rƀŭn chroh bap, wa Vũ Hồng Nhật, Kruanh UBND nkuăl Cư Mgar, an gĭt, yan Noel năm aơ, nkuăl lĕ ndâk njêng 5 rmôt gay tât khâl, an ndơ n’hanh mbah rhơn ăp ntŭk chroh, chức sắc. Nkre ntĭm rđău an ăp xă, nkuăl têh kuăl jă ăp nuĭh ntop kơl gay chop khâl, an ndơ ăp rnăk kon chroh geh nău rêh jêr jŏt kơl kônh wa wơt du yan Noel uĕh lăng, răm m’ak.

Yan Noel năm 2023 aơ, UBND nkuăl ntĭm rđău an ăp xă, phường, nkuăl têh geh ntŭk chroh mât uănh an kônh wa wơt yan noel uĕh, đăp mpăn tĭng nuih n’hâm tĭng ăp nău ntrŭnh pháp luật bah ngih dak n’hanh lơn lah mât uănh an ăp rnăk chroh ach o, nău kơl wơt du yan noel răm m’ak, uĕh lăng.

Wa Dương Văn Tuệ, Groi Kruanh rnâng kan Ủy ban Đoàn kết Công giáo n’gor Dak Lak an gĭt, lam n’gor geh 100 ntŭk chroh đah 217.000 kon chroh. Năm 2023 nău rêh bah ƀon lan chroh bap ta lam n’gor dơi rgâl dŭt âk. Ăp nău ƀư lŏng bôk tôr; ăp ntrong ƀư mât njrăng rnă njrăng ta ăp Giáo xứ, mpôl chroh; ntrong leo “Lam ƀon lan tâm rnglăp ndâk njêng thôn ƀon mhe n’hanh uĕh lăng nkual ƀon têh”. dơi ƀon lan chroh Bap rƀŏng tĭng uĕh n’hanh rgop ndâk njêng ƀon tơm Dak Lak nar lơ uĕh ndrŏng.

Năm 2023 ƀon lan chroh Bap lĕ tâm rlong pah kan jan sa gay hun hao wăng sa n’hao nău rêh rnăk wâl. Mông nar wơt Noel dôl geh n’gŭr răm ta ăp giáo xứ, mpôl chroh n’hanh nkual ƀon lan ta âk ntŭk tâm n’gor. Du mông nar răm rhơn dôl rêng tâm ƀon kan kon chroh ta nkual ƀon têh kơt ăp nkual jru ngai.

Du yan Noel tay lŏ tât tâm nău răm m’ak bah kônh wa kon chroh Dak Lak. Ăp nuĭh rƀŏng tât mbơh sơm n’hanh mpŏng đah du yan Noel uĕh lăng, du năm âk nău răm m’ak n’hanh uĕh lăng.